CAB. XV

1Errey Voab. Son shickyrys ayns yn oie, ta Ar jeh Moab jeant ny hraartys, as ny host; son ayns yn oie ta Kir jeh Moab jeant ny hraartys, as ny host: 2T’eh er n’gholl seose er ny ard-ynnydyn dy cheayney, ec Bajith as ec Dibon; nee Moab gullyrnee harrish Nebo, as harrish Medeba; bee ooilley ny king oc meayl, as dy chooilley aasaag baarit. 3Ayns ny straïdyn oc, nee ad cryssey ad-hene lesh aanrit-sack: er mullagh nyn dhieyn, as ayns ny straïdyn, nee dagh unnane gullyrnee, keayney dy sharroo. 4As nee Heshbon gyllagh, as Elealeh: bee nyn goraa er ny chlashtyn eer gys Jahaz: shen-y-fa nee sidooryn eillit Voab gullal: bee e vioys seaghnagh da. 5Nee my chree dobberan son Moab; nee ny scapailtee echey chea gys Zoar, myr colbagh three bleeaney: son lesh keayney hed ad seose lesh ughtagh Luhith; son ayns raad Horonaim troggee ad eam traartys. 6Son bee ushtaghyn Nimrim treigit: son ta’n traagh fiojit ersooyl, ta’n faiyr failleil, cha vel glassyraght erbee faagit. 7Shen-y-fa yn ymmodee cooid t’ad er chosney, as shen ny t’ad er hashtey seose, ver ad lhieu ersooyl gys coan ny Arabianee. 8Son ta’n eam er n’gholl ooilley mygeayrt ardjyn Voab; yn ghullyrnee echey gys Eglaim, as yn yllaghey gys Beer-elim. 9Son bee ushtaghyn Dimon lane fuill: son ver-ym lhiam ny smoo er Dimon, lionyn er scapailtee Voab, as er fooilliagh y cheer.