CAB. XVI

1Eeck-jee yn eayn gys fer-reill y cheer, veih Selah gys yn aasagh, derrey cronk inneen Zion. 2Son hig eh gy-kione, myr ushag er-shaghryn agglit ass yn edd, shen myr vees inneenyn Voab ec aaghyn Arnon. 3Gow coyrle, jean cairys; lhig da dty scadoo ve myr yn oie ec yn ard-vunlaa; follee ny eebyrtee, ny jean eshyn y vrah ta chea hood’s son kemmyrk. 4Lhig da ny eebyrtee aym’s cummal mayrt’s, Voab: bee uss scaa dauesyn veih eddin y spooilleyder: son ta’n chenjagh ec kione, ta’n cragheyder harrish, ta ny tranlaasee stroit ass y cheer. 5As ayns myghin vees yn stoyl-reeoil er ny hickyraghey, as ayns ynrickys nee eh soie er ayns cabbane-agglish Ghavid, briwnys, as shirrey briwnys, as cur cairys er y hoshiaght.

6Ta shin er chlashtyn jeh moyrn Voab; (t’eh feer voyrnagh:) eer jeh e vooaralys, as e voyrn, as e yymmoose: agh bee e vreagyn ayns fardail. 7Shen-y-fa nee Moab dobberan son Moab, nee dagh unnane dobberan: son undinyn Kir-hareseth bee shiu ayns trimshey; son shickyrys t’ad naardey. 8Ta magheryn Heshbon shymley, as billey-feeyney Sibmah: ta chiarnyn ny ashoonee er vrishey e reih biljyn-feeyney; t’ad er roshtyn gys Jazer, t’ad er skeayley trooid yn aasagh; ta ny banglaneyn eck sheeynt magh, t’ad er n’gholl harrish yn aarkey.

9Shen-y-fa neem’s dobberan lesh dobberan Yazer son billey-feeyney Sibmah: neem’s gushtagh oo lesh my yeïr, O Heshbon, as Elealeh; er-yn-oyr dy vel dty chiaulleeaght son dty hroar souree, as dty veilley ’syn ouyr er n’gholl naardey. 10As ta gennallys goit ersooyl, as boggey ass y vagher messoil; as ayns ny garaghyn-feeyney cha bee arrane, chamoo vees yllaghey: cha jean ny fir-traashtee veg y feeyn y hraastey ayns nyn bressyn; ta mee er choyrt er eam nyn vouyr-feeyney dy scuirr. 11Shen-y-fa nee my veeghyn feiyral myr claasagh son Moab, as eer my chree son Kir-haresh.

12As hig eh gy-kione, tra vees eh ry-akin, dy vel Moab er n’yannoo skee jeh hene er yn ard-altar, dy jig eh gys chiamble e Yee dy ghoaill padjer; agh cha vow eh couyr. 13Shoh yn goo ta’n Chiarn er loayrt mychione Moab er-dyn traa shen. 14Agh nish ta’n Chiarn er loayrt, gra, Cheu-sthie jeh three bleeaney, myr bleeantyn fer ny faillee, as bee gloyr Voab er ny hoiaghey beg jeh, lesh ooilley yn cheshaght vooar shen; as bee yn fooilliagh feer fardalagh, as gyn bree.