CAB. XVII

1Errey Ghamascus. Cur-my-ner, ta Damascus goit ersooyl veih ve ny ard-valley; bee eh ny charnane dy holtanyn. 2Ta ard-valjyn Aroer treigit; bee ad cour shioltaneyn dy lhie sheese ayn, as cha jean unnane ad y agglagh. 3Bee yn charrick myrgeddin goit veih Ephraim, as y reeriaght veih Damascus; as bee fooilliagh Syria myr gloyr cloan Israel, ta Chiarn ny flaunyssee dy ghra. 4As hig eh gy-kione ayns y laa shen, dy bee gloyr Yacob jeant thanney, as riurid e challin jeant shang. 5As shen myr vees eh, myr tra ta beaynee chaglym yn arroo, as buinn ny jeeassyn lesh e laue; as bee eh goll-rishyn ta jeeassyragh ayns coan Rephaim.

6Foast bee jeelym messyn-feeyney faagit ayn, myr craa yn villey-olive, ghaa ny three dy verrishyn ayns mullagh ny banglaneyn syrjey, kiare ny queig ayns ny banglaneyn messoil, sodjey magh, ta’n Chiarn, Jee Israel, dy ghra. 7Ayns y laa shen nee dooinney jeeaghyn gys e Er-croo, as chyndaa e hooillyn gys Jee casherick Israel. 8Cha der eh geill da ny altaryn, obbyr e laueyn hene, chamoo nee eh soiaghey jeh shen ta e veïr hene er n’yannoo, edyr ny keylljyn, ny ny jallooyn grianagh.

9Ayns y laa shen bee ny ard-valjyn lajer echey myr banglane treigit, as y banglane syrjey t’ad er aagail, kyndagh rish cloan Israel: as shen y raad vees traartys. 10Er-yn-oyr dy vel oo er yarrood Jee dty haualtys, as nagh vel oo er smooinaghtyn er Creg dty niart; shen-y-fa nee oo soiaghey biljyn aegey aalin, as nee oo soiaghey eh lesh settyn joarree: 11Ayns y laa ver oo er dty phlant dy vlaaghey, as ayns y voghrey ver oo er dty rass dy heet er-ash; agh bee yn fouyr ny horran ayns y laa doogh as dy hrimshey trome.

12Smerg da co-chruinnaght yn vooarane pobble ta jannoo feiyr myr feiyr ny faarkaghyn; as da tharmane ny ashoonyn, ta freaney myr sheean thooilley ymmodee ushtaghyn! 13Nee ny ashoonyn roie dy cheilley myr thooillaghyn ymmodee ushtaghyn: agh nee Jee ad y chastey, as nee ad chea foddey jeh, as bee ad er nyn imman myr coau ny sleityn roish y gheay, as myr floagyn roish y gheay-chassee. 14As cur-my-ner, ec yn astyr t’eh ayns anvea; as my jig y moghrey cha vel arragh jeh. Shoh yn cronney ocsyn ta spooilley shin, as y leagh ocsyn ta dy roostey shin.