CAB. XIX

1Errey Egypt. Cur-my-ner, ta’n Chiarn markiagh er bodjal bieau, as hig eh gys Egypt; as bee jallooyn Egypt tilgit bun-ry-skyn ec yn enish echey, as cree Egypt nee lheïe ersooyl cheu-sthie jeh. 2As soie-yms ny Egyptianee noi ny Egyptianee: as nee ad caggey dagh unnane noi e vraar, as dagh unnane noi e naboo; ard-valley noi ard-valley, as reeriaght noi reeriaght. 3As nee dunnallys Egypt failleil ayns y vean echey; as ver-yms yn choyrle echey naardey: as nee ad shirrey gys ny jallooyn, as gys fir-obbee, as gys fir-faishnee, as gys buitchyn. 4As neem’s ny Egyptianee y livrey gys laue reejerey dewil; as ree fargagh nee reill harrystoo, ta’n Chiarn dy ghra, eer Chiarn ny flaunyssee. 5As nee ny ushtaghyn failleil veih’n aarkey, as bee’n awin naardey as chyrmit seose. 6As chyndaa-ee ad ny awinyn foddey ersooyl; as bee ny strooanyn dy endeilys folmit as chyrmit; yn chuirtlagh neesht as y chlioagagh nee fioghey. 7Yn chuirtlagh-phabyr liorish ny strooanyn, liorish beïll ny strooanyn, as dy chooilley nhee cuirt liorish ny strooanyn, nee fioghey, hed eh naardey, as cha bee arragh jeh. 8Bee ny eeasteyryn myrgeddin ayns trimshey, as nee dy chooilley unnane ta tilgey dooan ayns ny strooanyn dobberan, adsyn ta skeayley lieenteenyn er ny ushtaghyn nee ad shymley ersooyl. 9Adsyn myrgeddin ta gobbragh ayns lieen keyl, as lheid as ta fee obbyr jeebinagh, vees er ny choyrt mow. 10As bee yn obbyr oc ayns fardail, ooilley ny ta jannoo arraghyn as loghanyn son eeast.

11Shickyr ta princeyn Zoan mee-cheeayllagh, ta coyrle fir-choyrlee creeney Pharaoh er jeet dy ve bolvaneagh: kys ta shiu gra rish Pharaoh, Mish mac yn er-creeney, mac dy henn reeaghyn? 12Cre vel adsyn? cre vel dty gheiney creeney? as lhig daue ginsh dhyt nish, as lhig da fys ’ve oc, cre ta Chiarn ny flaunyssee er chiarail er Egypt. 13Ta princeyn Zoar er choayl nyn geeayl, ta princeyn Noph fo shaghrynys; t’ad er vrah Egypt, eer adsyn ta barrant ny rheamyn echey. 14Ta’n Chiarn er heaymey ny mast’ oc spyrryd dy voirraneys: as t’ad er choyrt shaghrynys er Egypt ayns dy chooilley nhee t’ad goaill ayns laue, myr dooinney meshtal gymmylt ayns e skeay hene. 15Chamoo vees obbyr erbee ayns Egypt dy yannoo, son kione ny farbyl, banglane ny shuin. 16Ayns y laa shen vees Egypt goll-rish mraane: bee aggle as atchim er, kyndagh rish laue baggyrtagh Chiarn ny flaunyssee, t’eh dy chraa harrish. 17As bee cheer Yudah ny atchim da Egypt: bee dy chooilley unnane ta gimraa er, agglagh er e hon hene, kyndagh rish coyrle Chiarn ny flaunyssee, t’eh er chiarail n’oï.

18Ayns y laa shen nee queig ard-valjyn ayns cheer Egypt loayrt glare Chanaan, as breearrey gys Chiarn ny flaunyssee: unnane vees enmyssit, Ard-valley ny greiney. 19Ayns y laa shen vees altar da’n Chiarn ayns mean cheer Egypt, as pillar ayns e ardjyn sodjey magh gys y Chiarn. 20As bee eh son cowrey, as son feanish da Chiarn ny flaunyssee ayns cheer Egypt; son nee ad geamagh gys y Chiarn, kyndagh rish ny tranlaasee, as ver eh huc saualtagh, eer fer niartal, as nee eh ad y livrey. 21As bee yn Chiarn er ny hoilshaghey da Egypt, as ver ny Egyptianee enney er y Chiarn ayns y laa shen, as oural as chebbal y yannoo; dy jarroo nee ad breearrey gys y Chiarn as cooilleeney eh. 22As nee’n Chiarn bwoalley Egypt; nee eh bwoalley, as eh y lheihys: as nee ad chyndaa eer gys y Chiarn, as bee eh myghinagh daue, as nee eh ad y lheihys.

23Ayns y laa shen vees raad-mooar ass Egypt gys Assyria; as hig yn Assyrian gys Egypt, as yn Egyptian gys Assyria; as nee ny Egyptianee shirveish [Jee] marish ny Assyrianee. 24Ayns y laa shen vees Israel yn trass ashoon marish Egypt, as marish Assyria, eer bannaght ayns mean y cheer. 25Adsyn nee Chiarn ny flaunyssee bannaghey, gra, Bannit dy row Egypt my phobble, as Assyria obbyr my laueyn, as Israel my eiraght.