CAB. II

1Yn goo hug Isaiah mac Amoz my-ner mychione Judah as Jerusalem. 2As hig eh gy-kione ayns ny laghyn jerrinagh, dy bee slieau thie yn Chiarn er ny hoiaghey er mullagh ny sleityn; as nee dy chooilley ashoon chionney stiagh huggey. 3As hed ymmodee pobble, as jir ad, Tar-jee, as lhig dooin goll seose gys slieau yn Chiarn, gys thie Yee Yacob; as ynsee eh dooin eh raaidyn, as nee mayd shooyl ayns e chassanyn: son magh ass Zion hig y leigh, as goo yn Chiarn veih Jerusalem. 4As nee eh briwnys mastey ny ashoonyn, as ver eh oghsan da ymmodee pobble; as obbree ad seose nyn gliwenyn gys yiarnyn-shesheree, as nyn shleiyghyn gys yiarnyn-foldyragh: cha jean ashoon cliwe y hroggal seose noi ashoon, chamoo nee ad gynsaghey yn keird-caggee ny smoo. 5O hie Yacob, tar-jee as lhig dooin gimmeeaght ayns soilshey yn Chiarn.

6Shen-y-fa t’ou er hreigeil dty phobble thie Yacob, son dy vel ad er vishaghey [ayns obbeeys] veih’n niar, as dy vel ad fir-faishnee myr ny Philistinee, as t’ad goaill taitnys ayns cloan yoarree. 7Ta’n cheer oc myrgeddin lane dy argid as dy airh, chamoo ta kione er ny tashtaghyn oc: ta’n cheer oc myrgeddin lane dy chabbil, chamoo ta jerrey er ny fainee oc. 8Ta’n cheer oc myrgeddin lane dy yallooyn: t’ad ooashlaghey obbyr ny laueyn oc hene, shen ta ny meïr oc hene er chummey. 9As ta’n boght croymmey sheese eh-hene, as ta’n dooinney ooasle gliooney dy injil: shen-y-fa ny leih daue. 10Stiagh lhiat ’sy chreg, as follee oo hene ’sy joan, roish aggle y Chiarn, as son gloyr e ard-ooashley. 11Bee shilley mooaralagh dooinney er ny injillaghey, as bee moyrn deiney er ny chroymmey, as bee yn Chiarn ny-lomarcan er ny yrjaghey ’sy laa shen. 12Son bee laa Chiarn ny flaunyssee er dagh unnane ta moyrnagh as mooaralagh, as er dagh unnane ta ard-chreeagh, as bee eh er ny injillaghey; 13As er ooilley cedaryn Lebanon, ta ard as troggit seose, as er ooilley biljyn-darragh Vashan, 14As er ooilley ny sleityn ard, as er ooilley croink yn yrjid, 15As er dy chooilley hoor ard, as er dy chooilley voalley fencit, 16As er ooilley lhongyn Tarshish, as er ooilley ny pictureyn aalin. 17As bee moyrn dooinney er ny chroymmey, as bee mooaralys deiney currit sheese dy injil; as she yn Chiarn ynrycan syrjey vees ’sy laa cheddin. 18As ny jallooyn nee eh dy bollagh y stroie. 19As follee sleih ad-hene ayns guaggyn ny creggyn, as ayns ooigyn ny hooirey, ayns aggle roish y Chiarn, as son gloyr e ard-ooashley, tra t’eh girree dy chraa yn thalloo dy atchimagh. 20Nee dooinney ayns y laa shen ceau gys ny lughee as ny craitnagyn, e yallooyn argid as e yallooyn airhey, ren ad, dagh dooinney da hene, dy ooashlaghey: 21Dy gholl stiagh ayns scoltaghyn ny creggyn, as fo mullagh ny creggyn brishtagh, kyndagh rish aggle y Chiarn, as gloyr e ard-ooashley, tra t’eh troggal er dy chraa yn thalloo dy atchimagh. 22Ny treisht-jee ayns dooinney, ta e ennal ayns e stroanyn; son cre ayns ta soiaghey dy ve jeant jeh?