CAB. XX

1Ayns y vleïn haink Tartan gys Ashdod, (tra hug Sargon ree Assyria magh eh,) as ren eh caggey noi Ashdod, as ghow eh eh; 2Ec y traa cheddin loayr y Chiarn liorish Isaiah, mac Amoz, gra, Immee, as feayshil yn aanrit-sack jeh dty veeghyn, as cur jeed dty vraagyn. As ren eh myr shen, shooyl rooisht as cass rooisht. 3As dooyrt y Chiarn, Myr ta my harvaant Isaiah er hooyl rooisht as cass rooisht three bleeaney, son cowrey as yindys er Egypt as er Ethiopia; 4Myr shen nee ree Assyria leeideil ersooyl ny Egyptianee nyn bryssoonee, as ny Ethiopianee nyn gappee, aeg as shenn, rooisht as cass rooisht, dy jarroo lesh nyn geasyn gyn coodagh, gys nearey Egypt. 5As bee ad agglagh as naareydagh jeh Ethiopia nyn marrant, as jeh Egypt nyn moggyssagh. 6As jir cummaltee yn ellan shoh ayns y laa shen, Cur-my-ner, lheid shoh ta’n jerkal ain, raad ta shin chea son cooney dy v’er nyn livrey veih ree Assyria: as kys nee mayd scapail?