CAB. XXIII

1Errey Tyre. Gull-jee, shiuish lhongyn Tarshish; son te ny hraartys, myr shen nagh vel thie faagit, ny boayl erbee dy gholl stiagh ayn: veih cheer Chittim te er ny ockley magh orroo. 2Bee-jee nyn dhost, shiuish chummaltee yn ellan; uss ta marchanyn Zidon, ta goll harrish yn aarkey, er aa-lhieeney. 3As liorish ny ushtaghyn mooarey ta rass Sihor, fouyr yn awin, yn cheet-stiagh eck; as t’eeish ard-vargey ny ashoonyn. 4Gow nearey, O Zidon; son ta’n aarkey er loayrt, eer niart yn aarkey, gra, Cha vel mee er-troailt, ny gymmyrkey cloan, chamoo ta mee boandyrys deiney aegey, ny troggal seose moidynyn. 5Myr ec y skeeal mychione Egypt, myr shen bee ad dy mooar seaghnit ec y skeeal mychione Tyre. 6Shiaull-jee harrish gys Tarshish, yllee-jee; shiuish chummaltee yn ellan. 7Nee shoh ard-valley nyn moggyssagh, ta’n toshiaght eck ’sy chenn earish? ver ny cassyn eck hene lhieu ee ny joarree ayns cheeraghyn foddey jeh. 8Quoi t’er n’ghoaill yn choyrle shoh noi Tyre, yn ard-valley reeoil, ta ny marchanyn eck princeyn, ta ny dellaryn eck deiney ooasle y thallooin? 9Ta Chiarn ny flaunyssee er chiarail eh, dy chur sheese moyrn dy chooilley ghloyr, as dy choodaghey lesh nearey ooilley deiney ooasle ny cheerey. 10Immee trooid yn cheer ayd myr awin, O inneen Tarshish: cha vel niart smoo aynyd. 11Heeyn eh magh e laue harrish yn aarkey; t’eh er chraa ny reeriaghtyn: ta’n Chiarn er chur sarey noi ard-valley ny marchanyn, dy stroie ny cashtallyn lajer eck. 12As dooyrt eh, Cha jean oo arragh boggey y ghoaill, O voidyn tranlaasit, inneen Zidon: trog ort, gow harrish gys Chittim; ayns shen neesht cha vow veg y fea. 13Cur-my-ner, cheer ny Caldeanee: cha row ad shoh ny ashoon derrey va’n Assyrian er hroggal eh dauesyn ta cummal ’syn aasagh: hoie ad seose ny tooryn echey, hrog ad seose e chummallyn reeoil; as hug eh lesh eh gys toyrt-mow. 14Yllee-jee, shiuish lhongyn Tarshish: son ta’n niart eu currit naardey. 15As hig eh gy-kione ’sy laa shen, dy bee Tyre er ny yarrood three-feed as jeih bleeaney, rere laghyn un ree: lurg kione three-feed as jeih bleeaney gowee Tyre arrane myr ben-oainjyr. 16Gow claasagh, immee mygeayrt yn ard-valley, uss ven-oainjyragh ta er ny ve jarroodit: jean kiaulleeaght ving, gow ymmodee arraneyn, dy vod aa-chooinaghtyn ve jeant jeed.

17As hig eh gy-kione ec jerrey ny three-feed as jeih bleeaney, dy jean y Chiarn jeeaghyn er Tyre, as nee ish chyndaa reesht gys e cosney, as eiyrys ee er maarderys rish ooilley reeriaghtyn y theihll er feaï-ny-cruinney. 18As bee yn dellal eck as yn cosney eck casherickys gys y Chiarn: cha bee eh er ny hashtey seose ny keillit; son bee yn varchantys eck ny chour ocsyn ta shirveish fenish y Chiarn, son sonnys beaghey, as son coamrey farraghtyn.