CAB. XXVIII

1Smerg da’n attey dy voyrn, da meshtyllee Ephraim, ta’n aalid gloyroil oc ny vlaa fioghey, t’er kione ny coanyn mea ocsyn ta’n feeyn er ghoaill mainshtyraght orroo! 2Cur-my-ner, t’ec y Chiarn fer trean as niartal, nee, myr dorrin dy chlaghyn sniaghtee, as sterrym stroialtagh, myr thooilley dy ushtaghyn niartal lhieeney harrish, ad y hilgey sheese gys y thalloo lesh yn laue. 3Bee yn attey dy voyrn, meshtyllee Ephraim, er ny stampey fo-chosh. 4As bee yn aalid gloyroil ta er kione yn choan mea ny vlaa fioghey, as myr yn chied-vess appee toshiaght yn tourey: ta eshyn ta dy haglym jeeaghyn er as gee, choud as te foast ayns e laue.

5’Sy laa shen bee yn Chiarn son attey dy ghloyr, as son crown dy aalid, da fooilliagh e phobble. 6As son spyrryd dy vriwnys dasyn ta soie ayns briwnys, as son niart dauesyn ta chyndaa yn chaggey gys y yiat.

7Agh t’adsyn myrgeddin er n’gholl er-shaghryn liorish feeyn, as liorish jough lajer t’ad ass y raad: ta’n saggyrt as y phadeyr fo shaghrynys liorish jough lajer, t’ad baiht ayns feeyn, t’ad ass y raad liorish jough lajer; t’ad mollit ayns ashlish, t’ad leaystey ayns briwnys. 8Son ta ooilley ny buird sollit lesh skeay as broïd, myr shen nagh vel boayl erbee glen.

9Quoi da nee eh gynsaghey tushtey? as quoi er ver eh dy hoiggal ynsagh? adsyn t’er ny harbaa veih’n bainney, as er ny hayrn veih ny keeaghyn. 10Son shegin da sarey ve er sarey, sarey er sarey; line er line, line er line; nish ny veggan, as reesht ny veggan. 11Son lesh meillyn joarree, as glare quaagh nee eh loayrt rish y pobble shoh. 12Roosyn dooyrt eh, Shoh’n aash oddys shiu y choyrt da’n vooinjer gheinagh; as shoh’n ooraghey: foast cha jinnagh ad clashtyn. 13Agh va goo yn Chiarn dauesyn sarey er sarey, sarey er sarey; line er line, line er line; nish ny veggan, as reesht ny veggan; dy voddagh ad gimmeeaght, as tuittym gour nyn drommey, as ve brisht, as sniemmit, as goit ’sy ribbey.

14Shen-y-fa eaisht-jee rish goo yn Chiarn, shiuish chraidoilee, ta reill yn pobble shoh t’ayns Jerusalem: 15Er-yn-oyr dy vel shiu er ghra, Ta shin ayns conaant rish y vaase, as rish niurin ta shin er n’yannoo coardail; tra ta’n slatt goll trooid y cheer myr thooilley, cha jig eh orrin; son ta shin er n’yannoo breagyn nyn gemmyrk, as fo molteyrys ta shin er ollaghey shin hene.

16Shen-y-fa shoh myr ta’n Chiarn Jee dy ghra, Cur-my-ner, ta mee soiaghey ayns Zion son undin, clagh, clagh phrowit, clagh-chorneilagh costal, undin shickyr: ersyn ta credjal cha bee oyr nearey. 17Briwnys myrgeddin neem’s layal gys y line, as cairys gys y level; as nee’n sniaghtey-garroo sheebey ersooyl kemmyrk ny breagyn, as nee ny ushtaghyn lhieeney harrish ny cooillyn folliaght.

18As bee yn conaant eu rish y vaase er ny rassey, as cha jean yn coardail eu rish niurin shassoo; tra nee yn slatt goll trooid y cheer myr thooilley, eisht bee shiuish broojit dy myn liorish. 19Cha leah as hed eh magh nee eh berraghtyn erriu: son moghrey lurg moghrey hed eh magh, fey-ny-laa as fud-ny-hoie; as bee eh seaghnagh ynrycan dy hoiggal yn goo. 20Son ta’n lhiabbee ro yiare son dooinney dy heeyney eh-hene er; as yn eaddagh lhiabbee ro choon da dy hoïlley eh-hene ayn. 21Son nee yn Chiarn troggal er myr ayns cronk Pherazim, bee eh jymmoosagh myr ayns coan Ghibeon, dy yannoo e obbyr, e obbyr yindyssagh; as dy chooilleeney e yannoo, e yannoo yindyssagh. 22Nish er-y-fa shen, ny bee-jee nyn ghannidee, er-aggle dy bee nyn gheulaghyn jeant ny s’chenney: son ta mee er chlashtyn veih’n Chiarn, Jee ny flaunyssee, yn kerraghey trome ta kiarit noi ooilley’n seihll.

23Cur-jee geill, as eaisht-jee rish my choraa; clasht-jee, as eaisht-jee rish my ghlare. 24Vel yn erroo traaue dy chooilley laa dy chuirr? vel eh fosley as brishey ceabyn e halloo? 25Erreish da v’er n’yannoo rea yn eaghtyr echey, nagh vel eh spreih yn phishyr, as skeayley yn cummin, as cuirr ayn yn reih curnaght, as yn ard-oarn, as yn shoggyl ayns nyn dhalloo cooie? 26Son ta e Yee cur roish, cre dy yannoo, as gynsaghey eh ayns tushtey. 27Son cha vel y pishyr er ny woalley lesh greïe-woaillee, chamoo ta queeyl chart er ny hyndaa er y cummin; agh ta’n pishyr er ny woalley lesh soost, as yn cummin lesh slatt. 28Ta arroo-arran er ny vlieh, nagh bee eh dy kinjagh bwoalley, ny brishey eh lesh queeyl e chart, ny broo eh lesh e chabbil. 29Ta shoh myrgeddin cheet magh veih Chiarn ny flaunyssee, ta yindyssagh ayns coyrle, as ooasle ayns e obbraghyn.