CAB. XXIX

1Smerg da Ariel, da Ariel, yn ard-valley, raad va David cummal! cur-jee bleïn gys bleïn; lhig daue marroo ny ourallyn. 2Ny-yeih nee’m seaghney Ariel, as bee dobberan as trimshey ayn; as bee yn clane dooys myr Ariel. 3As nee’m campal dt’oï ooilley mygeayrt, as cruinnaghey stiagh oo lesh carnane-caggee, as troggal tooryn dt’oï. 4As bee oo er dty injillaghey, as nee oo loayrt myr fo-halloo, as bee e ghlare tassane myr ass y joan, as bee dty choraa myr fer ta spyrryd dy obbeeys echey veih fo-halloo, as nee dty ghlare sansheraght myr ass y joan. 5Myrgeddin, bee earroo dty yoarreeyn goll-rish yn joan meein, as bee earroo yn vooinjer atchimagh myr coau ta sheebey ersooyl; dy jarroo bee shoh jeant ayns tullogh doaltattym. 6Bee oo er dty cherraghey liorish Chiarn ny flaunyssee lesh taarnagh, as lesh craa-hallooin, as feiyr mooar, lesh sterrym, as dorrin, as lossey dy aile stroialtagh.

7As bee earroo dy chooilley ashoon ta caggey noi Ariel, myr dreamal ashlish ny hoie, eer ooilley ta caggey noi eck, as noi troshid e voallaghyn, as ta dy heaghney ee. 8Bee eh eer myr tra ta dooinney accryssagh dreamal, as er-lesh dy vel eh gee; agh t’eh doostey, as ta e volg shang: ny myr tra ta dooinney paagh dreamal, as er-lesh dy vel eh giu; agh t’eh doostey, as cur-my-ner t’eh annoon as cha vel e vian jeant magh: shoh myr vees earroo dy chooilley ashoon ta caggey noi cronk Zion.

9Fuirree-jee, as gow-jee yindys; eïe-jee magh, as yllee-jee, T’ad er-meshtey, agh cha nee lesh feeyn; t’ad loagan, agh cha nee lesh jough lajer. 10Son ta’n Chiarn er gheayrtey magh erriu yn spyrryd dy chadley dowin, as er yeigh ny sooillyn eu: ny phadeyryn as ny fir-reill eu, ny fakyderyn, t’eh er choodaghey lesh dorraghys. 11As ta’n ashlish jeh ooilley shoh diuish goll-rish goan lioar ta sealit, ta deiney livrey gys fer ta ynsit, gra, Lhaih shoh, ta mee guee ort: as t’eshyn gra, Cha voddym; son te sealit. 12As ta’n lioar er ny livrey huggeysyn nagh vel ynsit, gra, Lhaih shoh, ta mee guee ort: as t’eshyn gra, Cha vel ynsagh aym.

13Shen-y-fa dooyrt y Chiarn, Son wheesh as dy vel yn pobble shoh tayrn er-gerrey dooys lesh nyn meeal, as dy my ooashlaghey lesh nyn meillyn, agh ta’n cree oc er ny scughey foddey voym, as ta nyn aggle roym er ny ynsaghey liorish oardagh deiney: 14Shen-y-fa, cur-my-ner, hem er my hoshiaght dy yannoo obbyr virrilagh mastey yn pobble shoh, dy jarroo obbyr virrilagh as yindyssagh: son nee creenaght ny deiney creeney oc cherraghtyn, as bee tushtey ny deiney keeayllagh er ny choyrt naardey. 15Smerg dauesyn ta shirrey dy dowin dy cheiltyn y choyrle oc veih’n Chiarn, as ta ny obbraghyn oc jeant ’sy dorraghys, as t’ad gra, Quoi ta fakin shin? as quoi ta coyrt enney orrin? 16Dy firrinagh bee shoh yn camlaagys euish er ny choontey myr cray yn phasheyder: son jean yn obbyr gra mychione-syn ren eh, Cha ren eshyn mee? ny jean yn saagh cummit gra mychione-syn ren cummey eh, V’eh gyn tushtey? 17Nagh vel eh foast tammylt feer yiare, as bee Lebanon er ny hyndaa gys magher messoil, as bee’n magher messoil er ny choontey myr y cheyll?

18As ’sy laa shen nee ny beuyr clashtyn goan y lioar, as nee sooillyn ny doail fakin trooid y dooid as y dorraghys. 19Nee yn vooinjer imlee myrgeddin bishaghey nyn moggey ayns y Chiarn, as nee ny boghtyn mastey deiney boggey ’ghoaill ayns Jee casherick Israel. 20Son ta’n dewilagh er ny choyrt mow, as yn oltooanagh er ny stroie, as ta ooilley t’er nyn arrey son olkys er ny yiarey jeh; 21Ta jannoo dooinney ny ghrogh-yantagh son fockle, as soiaghey ribbey er e hon-syn ta cur oghsan ’sy yiat, as cassey cooish yn er-cairal son red fardalagh. 22Shen-y-fa, shoh myr ta’n Chiarn, ren Abraham y livrey, dy ghra mychione thie Yacob, Cha bee nearey nish er Jacob, chamoo vees drogh neeal er e eddin. 23Agh tra t’eh fakin e chloan, obbyr my laueyn, kiongoyrt rish, nee ad casherickey my ennym, as bannaghey Jee casherick Yacob, as goaill aggle roish Jee Israel. 24Nee adsyn myrgeddin t’er ny ve fo shaghrynys spyrrydoil chyndaa gys tushtey, as nee adsyn ren tallagh goaill ynsaghey.