CAB. III

1Son cur-my-ner, ta’n Chiarn, Chiarn ny flaunyssee, goaill ersooyl voish Jerusalem, as voish Judah, yn kemmyrk, as yn lorg, yn slane troar arran, as slane kemmyrk yn ushtey, 2Yn dooinney niartal, as y dooinney-caggee, yn briw, as y phadeyr, yn dooinney creeney, as yn chenn-ayr, 3Yn captan er lieh-cheead, yn dooinney onnoroil, as yn er-coyrlee, as y fer-keirdee schleioil, as y pleadeyr floaoil. 4As ver-yms daue cloan dy ve princeyn orroo, as nee paitchyn reill harrystoo. 5As bee yn pobble tranlaasit, yn derrey yeh liorish yn jeh elley, as dagh unnane liorish e naboo: nee yn lhiannoo gymmyrkey eh-hene dy roonagh noi yn chanstyr, as y moodjeen noi yn dooinney onnoroil. 6Tra nee dooinney goaill greme er e vraar, ayns thie e ayrey, gra, Ta coamrey ayd, bee uss nyn ver-reill, as lhig da’n stayd treih shoh ve fo dty laue: 7Ayns y laa cheddin nee eh breearrey, gra, Cha beem’s yn er-lhee; son ayns my hie’s cha vel arran ny coamrey: ny jean-jee mish fer-reill y phobble. 8Son ta Jerusalem naardey, as ta Judah er duittym; er-yn-oyr dy vel yn chengey as yn jannoo oc noi yn Chiarn, dy vrasnaghey sooillyn e ghloyr. 9Ta daanys nyn eddin son feanish nyn ’oï, as t’ad fockley-magh nyn beccah myr Sodom, as cha vel ad dy cheiltyn eh: smerg da’n annym oc! son t’ad er cherraghey olk orroo hene. 10Abbyr-jee rish y dooinney ynrick, Dy jig eshyn jeh dy mie; son nee ad soylley y ghoaill jeh mess nyn yannoo. 11Smerg da’n drogh ghooinney! hig eshyn jeh dy doogh; son bee leagh e laueyn er ny choyrt da.

12Agh son my phobble, ta paitchyn nyn dranlaasee, as ta mraane reill harrystoo. O my phobble, ta dty leeideilee cur oo er-shaghryn, as t’ad stroie raad dty chesmadyn. 13Ta’n Chiarn troggal er dy phleadeil, as t’eh shassoo seose dy vriwnys yn pobble. 14Hig y Chiarn dy vriwnys shanstyr e phobble, as ny princeyn oc: son ta shiu er ee seose yn garey-feeyney; ta spooilley ny boghtyn ayns ny thieyn eu. 15Cre’n-oyr t’eu dy vel shiu broo my phobble gys peeshyn, as scryssey eddin ny boghtyn? ta’n Chiarn, Jee ny flaunyssee, dy ghra.

16Ny-sodjey na shoh, ta’n Chiarn dy ghra, Er-y-fa dy vel inneenyn Zion mooaralagh, as shooyl dy ard-wannallagh, as lesh sooillyn rouanagh, shooyl as keimyragh myr t’ad goll, as clinkeragh lesh nyn gassyn: 17Shen-y-fa nee yn Chiarn bwoalley lesh y screb kione carragh inneenyn Zion, as nee’n Chiarn ad y roostey. 18Nee yn Chiarn ’sy laa shen goaill ersooyl aalid gaihghyn bingey nyn gassyn, as nyn goifyn obbrit, as ny breidyn runt oc goll-rish yn eayst, 19Ny chainyn sollys, as beadyn ny roihaghyn, as ny breidyn, 20Ny bonnettyn, as coamrey ny lurgaghyn, as ny rybbanyn, as ny beadyn grainnit, as ny fainaghyn-cleaysh, 21Ny fainaghyn meïr, as ny jewellyn stroaney, 22Ny caghlaaghyn coamrey, as ny cloagaghyn, as ny apronyn, as ny freeniaghyn folt, 23Ny glessyn, as yn aanrit keyl, as ny hoodyn, as coodaghey nyn eddinyn. 24As hig eh gy-kione, ayns ynnyd soar millish, dy bee breinnid; as ayns ynnyd cryss aalin, frytlagyn; as ayns ynnyd folt soit magh dy stoamey, vees meaylid; as ayns ynnyd stomacher, aanrit-sack; as ayns ynnyd aalid eddin, lostey greïney. 25Nee dty gheiney tuittym liorish y chliwe, as dty hreanee ayns y chaggey. 26As nee ny giattyn eck keayney as dobberan, as ee hene lhie treigit er y thalloo.