CAB. XXX

1Smerg da’n chloan vee-viallagh, ta’n Chiarn dy ghra, ta goaill coyrle, agh cha nee jeem’s; as ta goaill fastee fo coodagh, agh cha nee fo coodagh yn Spyrryd aym’s, dy vod ad peccah y choyrt gys peccah: 2Ta gimmeeaght dy gholl sheese gys Egypt, (as cha vel ad er ghoaill coyrle ec my veeal’s,) dy niartaghey ad-hene ayns niart Pharaoh, as dy hreishteil ayns scadoo Egypt. 3Shen-y-fa bee niart Pharaoh nyn nearey, as nyn marrant er scadoo Egypt nyn doyrt-mow. 4Son ta e phrinceyn ec Zoan, as haink e haghteryn reeoil gys Hanes. 5V’ad ooilley naareydagh roish pobble dy veggan foaynoo, gyn cooney ny vondeish, agh nearey as myrgeddin oltooan. 6Errey maase y jiass: as ver ad lhieu nyn merchys er geayltyn assylyn aegey gys cheer dy heaghyn as angaish, as nyn dashtaghyn er droynyn camelyn gys pobble jeh beggan foays daue, veih shen ta cheet yn lion aeg as shenn, yn cretoor nieunagh, as yn ard-nieu aileagh skianagh. 7Son nee ny Egyptianee cooney ayns fardail, as gyn ymmyd: shen-y-fa ta mee er n’eamagh mychione shoh, She yn niart oc dy ve ny haaue.

8Immee nish, scrieu eh kiongoyrt roo er boayrd, as soie sheese eh ayns lioar, dy vod eh ve ry-akin son y traa ry-heet, son dy bragh as dy bragh; 9Dy nee pobble mee-viallagh shoh, cloan vreagagh, cloan nagh jean clashtyn leigh yn Chiarn; 10Ta gra rish ny fakyderyn, Ny jean-jee fakin; as rish ny phadeyryn, Ny jean-jee phadeyrys dooin reddyn cairagh; loayr-jee rooin goan brynnagh, jean-jee phadeyrys foalsey: 11Cosne-jee ass y raad, chyndaa-jee dy lhiattee jeh’n chassan, lhig da Jee casherick Israel scughey veih ny mast’ ain. 12Shen-y-fa, shoh myr ta Jee casherick Israel gra, Er-yn-oyr dy vel shiu soiaghey beg jeh’n fockle shoh, as cur nyn marrant er molteyrys, as camlaagys, as tannaghtyn ayn: 13Shen-y-fa bee yn mee-chairys shoh diu myr assee aarloo dy huittym, gatt magh ayns voalley ard, ta’n brishey echey cheet doaltattym ayns tullogh. 14As nee eh brishey eh myr brishey saagh craie t’er ny vrishey ayns peeshyn; cha jean eh sparail; myr shen nagh bee er ny gheddyn ayns y vrishey echey wheesh shlig dy ghoaill aile veih’n chiollagh, ny dy hroggal ushtey ass yn phouyl 15Son shoh myr ta’n Chiarn Jee dy ghra, Jee casherick Israel, Ayns caghlaa coyrle as fea bee shiu ayns sauchys; ayns shee as ayns treishteil vees nyn marriaght; agh cha goghe shiu coyrle: 16Son dooyrt shiu, Cha jean mayd shen; agh nee mayd chea er cabbil; shen-y-fa nee shiu chea: as, Markee mayd er baagh gastey; shen-y-fa bee adsyn gastey hed nyn eiyrt’s. 17Nee thousane chea ec oghsan unnane; ec oghsan queig nee shiu roie er-chea; derrey vees shiu faagit myr aile son cowrey-caggee er mullagh slieau, as myr mergey er cronk.

18As shen-y-fa nee’n Chiarn farkiaght dy ve graysoil diu, as shen-y-fa, bee eh er ny ghloyraghey, dy vod eh jannoo myghin erriu: son ta’n Chiarn ny Yee dy vriwnys: bannit t’adsyn ooilley ta farkiaght ersyn. 19Son nee’n pobble cummal ayns Zion ec Jerusalem; cha jean oo keayney arragh: bee eh feer ghraysoil dhyt ec coraa dty accan; tra nee eh clashtyn eh, nee eh dty reggyrt. 20As ga dy der y Chiarn diu yn arran dy arkys, as yn ushtey dy heaghyn, ny-yeih cha bee dty ir-ynsee er ny scughey arragh gys corneil, agh ver dty hooillyn my-ner dty ir-ynsee: 21As nee dty chleayshyn clashtyn yn goo cheu dty chooylloo, gra, Shoh’n raad, shooyl-jee ayn, tra ta shiu chyndaa gys y laue yesh, as tra ta shiu chyndaa gys y laue chiare. 22Nee shiu myrgeddin coontey myr neu-ghlen coodagh dty yallooyn grainnit dy argid, as coamrey dty yallooyn lheït dy airh: nee oo ad y cheau ersooyl myr aanrit neu-ghlen; jir oo rish, Fow ass my enish. 23Eisht ver eh fliaghey er dty rass nee oo cuirr ayns dty halloo, as bee yn arran jeh bishaghey yn thallooin kenjal as palchey: ’sy laa shen nee dty vaase gyndyr ayns aberyn lheaney. 24Nee ny dew myrgeddin, as ny assylyn aegey, ta traaue yn thalloo, gee arroo glen t’er ny ve fasnit lesh y chleayst as lesh y dollan-bennalt. 25As bee roie er dy chooilley lieau ard, as er dy chooilley chronk ard, awinyn as strooanyn ushtey, ayns laa yn traartys mooar, tra nee ny tooryn tuittym. 26Myrgeddin, bee soilshey yn eayst myr soilshey yn ghrian, as bee soilshey yn ghrian shiaght-filley, myr soilshey shiaght laa, ’sy laa ta’n Chiarn soïlley seose assee e phobble, as lheihys guinn nyn lhottyn.

27Cur-my-ner, ta ennym y Chiarn cheet veih foddey, lostey lesh e eulys, as ta’n errey echey trome; ta e veillyn lane dy yymmoose, as e hengey myr aile loshtee. 28As nee e ennal, myr thooilley ta lhieeney harrish, roshtyn gys mean y wannal, dy chreearey ny ashoonyn lesh y chreear dy ardalys: as bee streean ayns beïll y phobble, dy choyrt ad er-shaghryn. 29Nee shiu goaill arrane myr ayns yn oie, tra ta feailley casherick er ny reayll; as gennallys cree, myr tra ta fer goll lesh kiaulleeaght gys slieau yn Chiarn, gys Jee niartal Israel. 30As ver y Chiarn er e choraa gloyroil dy ve er ny chlashtyn, as nee eh soilshaghey trimmid atchimagh e roih, lesh eulys e yymmoose, as lesh lossey dy aile stroialtagh, lesh geay-chassee, as dorrin, as claghyn-sniaghtee. 31Son trooid coraa yn Chiarn bee yn Assyrian er ny chur fo-chosh, ren bwoalley lesh y lorg. 32As ayns dy chooilley voayl raad huittys builley atchimagh y lorg, shen lhie-ys y Chiarn er, bee eh lesh tabretyn as claasaghyn: son ayns caggaghyn atchimagh nee eh caggey nyn ’oï. 33Son s’foddey neayr’s va Tophet er ny oardaghey, eer cour yn ree te kiarit; t’eh er n’yannoo eh dowin as lhean: ta yn chreagh echey aile as lane fuygh, ta ennal y Chiarn myr strooan dy vrimstone dy oaddey eh.