CAB. XXXI

1Smerg dauesyn ta goll sheese gys Egypt son cooney, as coyrt nyn marrant er cabbil, as treishteil ayns fainee, er-yn-oyr dy vel ad ymmodee; as ayns markee, son dy vel ad feer lajer! agh cha vel ad jeeaghyn gys Jee casherick Israel, chamoo t’ad shirrey yn Chiarn. 2Ny-yeih ta eshyn myrgeddin creeney, as ver eh lesh olk, as cha jed eh noi e ghoan: agh nee eh girree seose noi thie ny drogh-yantee, as noi yn cooney ocsyn ta cur-rish mee-chairys. 3Nish ta ny Egyptianee deiney, as cha nee Jee; as ta ny cabbil oc feill, as cha nee spyrryd. Tra heeynys y Chiarn magh e laue, nee chammah yn er-coonee tuittym, as eshyn t’eh cooney lesh, as hed ad ooilley naardey dy cheilley. 4Son shoh myr ta’n Chiarn er loayrt rhym, Casley rish y lion, as y lion aeg buirroogh er e chragh, tra ta ymmodee bochillyn eït magh n’oï, cha bee aggle er roish yn coraa oc, chamoo ver eh cooyl ec yn yllagh oc: myr shen hig Chiarn ny flaunyssee neose, dy chaggey son cronk Zion, as son y slieau eck. 5Myr eeanlee lesh nyn skianyn, myr shen nee Chiarn ny flaunyssee fendeil Jerusalem; fendeil nee eh myrgeddin ish y livrey, as goll harrish nee eh ish y choadey.

6Chyndaa-jee huggeysyn veih ta cloan Israel er n’gholl dy mooar er-shaghryn. 7Son ayns y laa shen ceau-ee dagh dooinney ersooyl e yallooyn argid, as e yallooyn airh, ta ny laueyn eu hene er chummey son peccah diu hene.

8Eisht tuittee yn Assyrian liorish y chliwe, cha nee dy ghooinney niartal; as nee cliwe, cha nee dy ghooinney moal, eh y stroie: agh nee eh chea veih’n chliwe, as bee ny deiney aegey echey ny haart. 9As hed eh harrish gys e chummal lajer son aggle, as bee e gheiney ooasle agglit roish y mergey, ta’n Chiarn dy ghra, ta’n aile echey ayns Zion, as e choirrey ayns Jerusalem.