CAB. XXXII

1Cur-my-ner, nee ree reill ayns ynrickys, as nee princeyn gymmyrkey reill ayns briwnys. 2As bee yn dooinney shen myr scaa veih’n gheay, as fastee veih’n dorrin; myr awin ushtey ayns thalloo chirrym; myr scadoo creg vooar ayns cheer sponkit. 3As cha bee ny sooillyn ocsyn moal ta fakin; as nee ny cleayshyn ocsyn ta clashtyn geaishtagh. 4Nee yn cree ocsyn myrgeddin ta gyn tort toiggal tushtey, as nee yn chengey moandagh loayrt dy floaoil. 5Cha bee yn moodjeen ny smoo enmyssit feoilt, ny’n goo ec yn er-sondagh dy ve toyrtyssagh. 6Son nee’n drogh pheccagh loayrt drogh ghoan, as nee’n cree echey gobbraghey mee-chraueeaght, dy chur-rish kialgeyrys, as dy ockley magh oltooan noi yn Chiarn, dy olmaghey annym ny accryssee, as dy lhiettal ushtey vouesyn ta paagh. 7Ta aghtyn yn er-sondagh myrgeddin an-chiart: t’eh smooinaghtyn er saaseyn cluicagh dy stroie yn boght lesh goan breagagh, eer ayns cooish chairal yn ymmyrchagh. 8Agh ta’n cree ooasle smooinaghtyn er nheeghyn ooasle, as liorish cooishyn ooasle nee eh shassoo.

9Irree-jee seose, shiuish vraane t’ec nyn aash; clasht-jee rish my ghoo, shiuish inneenyn neu-harroogh; cur-jee tastey da my ghlare. 10Ymmodee laghyn as bleeantyn vees shiu seaghnit, shiuish vraane mee-rioosagh; son ta’n fouyr-feeyney failleil, cha bee mess er y thalloo dy haglym. 11Bee-jee er-creau, shiuish vraane ta ec nyn aash; bee-jee seaghnit, shiuish inneenyn mee-rioosagh: jean-jee rooisht, as cur-jee j’iu, as kiangle-jee aanrit-sack mysh nyn meeghyn. 12Nee ad dobberan son ny sheeintyn, son ny magheryn aalin, son y billey-feeyney messoil. 13Er cheer my phobble hig seose drineyn as dressyn, dy jarroo er ooilley ny thieyn dy reaïd, ayns yn ard-valley rouanagh. 14Son bee ny plaaseyn treigit; bee co-chruinnaght yn ard-valley er ny leodaghey; bee ny cashtallyn as ny tooryn son ooigyn rish earish foddey, boggey ny assylyn oaldey, aber shioltaneyn; 15Derrey vees y Spyrryd er ny gheayrtey orrym veih’n yrjid, as dy bee yn aasagh magher messoil, as y magher messoil dy ve myr keyll. 16Eisht nee briwnys cummal ayns yn aasagh, as nee ynrickys tannaghtyn ayns y vagher messoil. 17As bee obbyr ynrickys, shee; as jerrey ynrickys, fea as shickyrys son dy bragh. 18As nee my phobble cummal ayns ynnyd sheeoil, as ayns cummallyn sauchey, as ayns fasteeyn feagh, 19Tra vees eh ceau claghyn-sniaghtee, cheet neose er y cheyll; as bee yn ard-valley er ny injillaghey kiart rish y thalloo. 20Bannit ta shiuish ta cuirr rish oirr ooilley ny ushtaghyn, ta coyrt magh gys shen cassyn y dow as yn assyl.