CAB. XXXIII

1Smerg dhyt’s ta spooilley, as nagh r’ou hene spooillit; as ta dellal dy molteyragh, as nagh ghell adsyn dy molteyragh rhyt’s! tra nee oo scuirr veih spooilley, bee oo hene er dty spooilley; as tra scuirrys oo veih dellal dy molteyragh, dellee adsyn dy molteyragh rhyt’s. 2O Hiarn, bee graysoil dooin; ta shin er farkiaght er dty hon: bee uss nyn niart dagh laa, nyn saualtys myrgeddin ayns traa dy heaghyn. 3Ec tharmane y voirey ren y pobble chea; tra hrog oo ort, va ny ashoonyn er nyn skeayley. 4As bee yn spooilley eu er ny hymsagh dy ve stroit, myr braddagyn; myr ny locustyn ta roie noon as noal, nee eh roie orroo. 5Ta’n Chiarn er ny yrjaghey; son t’eh cummal ayns yn yrjid: t’eh er lhieeney Zion lesh briwnys as ynrickys. 6As bee creenaght as tushtey shickyrys dty laghyn, as niart dty haualtys: ta aggle y Chiarn yn verchys echey. 7Cur-my-ner, nee ny treanee oc geamagh er cheu-mooie; nee ny chaghteryn dy hee keayney dy sharroo. 8Ta ny raaidyn mooarey gyn taaghey, cha vel troailtagh ry-akin orroo: t’eh er vrishey yn conaant, t’eh er hoiaghey beg jeh ny ard-valjyn, cha by-vooar lesh dooinney erbee. 9Ta’n cheer dobberan, as lheïe ersooyl; ta Lebanon er ny leodaghey as giarit sheese; ta Sharon myr yn aasagh; ta Bashan as Carmel craa nyn mess jeu. 10Nish nee’m girree, ta’n Chiarn dy ghra; nish bee’m er my yrjaghey; nish neem’s mee hene y hroggal seose. 11Nee shiu gientyn coau; nee shiu gymmyrkey magh stubble: yn ennal eu hene myr aile nee stroie shiu. 12As bee yn pobble er ny lostey myr eayl; myr drineyn buinnit bee ad er nyn lostey ’syn aile.

13Clasht-jee, shiuish ta foddey jeh, cre ta mee er n’yannoo; as shiuish ta er-gerrey, gow-jee rish my niart. 14Ta aggle er ghreimmey ny peccee t’ayns Zion; ta creau doaltattym er ghoaill ny crauee-oalsey: quoi ny mast’ ain oddys cummal ayns yn aile lhome-loshtee! quoi nyn mastey oddys surranse ayns loshtaghyn dy bragh farraghtyn! 15Eshyn ta gimmeeaght ayns ynrickys, as loayrt yn irriney; eshyn ta dwoaie echey er cosney tranlaasagh, ta craa e laueyn veih goaill leagh briwnys, ta dooney e chleayshyn veih clashtyn fuill, as jeigh e hooillyn veih fakin olk; 16Nee eshyn cummal ’syn yrjid: bee troshid ny creggyn cashtal e endeilys, bee arran er ny choyrt da, bee e ushtaghyn shickyr. 17Nee dty hooillyn fakin yn ree ayns aalid e ooashley; ver ad my-ner yn cheer ta feer foddey jeh. 18Nee dty chree smooinaghtyn er yn atchim t’er n’gholl shaghey. Cre vel yn ard-scrudeyr? cre vel y resowr? cre vel eshyn va currym ny tooryn er? 19Cha jean oo fakin pobble dewil; pobble jeh glare ro ghowin er dty hon; jeh chengey yoarree, ro ghoillee dhyt dy hoiggal. 20Jeeagh er Zion, ard-valley nyn ooashley crauee: hee dty hooillyn Jerusalem ynnyd-vaghee sheeoil, cabbane nagh bee goit sheese; cha bee veg jeh ny kibbinyn eck dy bragh er ny scughey, chamoo vees veg jeh ny coyrdyn eck er nyn veaysley. 21Agh shen y raad bee’n Chiarn gloyroil dooinyn ammyr ny hawinyn lheaney as strooanyn; ayn nagh jed gallee erbee lesh maidjyn-raue, chamoo hed lhong ard-voyrnagh shaghey. 22Son ta’n Chiarn y briw ainyn, yn Chiarn fer-toyrt nyn leigh, ta’n Chiarn nyn ree; nee eh shin y hauail. 23Ta dty choyrdyn er ny lhaggaghey; cha row fort ayndoo dy yannoo shickyr yn chroan; cha row dy niart ayndoo dy skeayley yn shiaull: eisht ta cragh yn spooilley mooar er ny rheynn; ta’n eer baccagh goaill y spooilley. 24As cha jir y cummaltagh, Ta mee ching: bee drogh-yannoo ny fir-vaghee er ny leih daue.