CAB. XXXVI

1Nish haink eh gy-kione ayns y chiarroo vleïn jeig jeh ree Hezekiah, dy daink Sennacherib ree Assyria seose noi ooilley ard-valjyn fencit Yudah, as ghow eh ad. 2As hug ree Assyria Rabshakeh veih Lachish gys Jerusalem, gys ree Hezekiah, lesh sheshaght-caggee vooar: as hass eh liorish coorse-ushtey yn loghan syrjey t’er y raad-vooar liorish magher yn ghialleyder. 3Eisht haink magh huggey Eliakim mac Hilkiah va harrish y lught-thie, as Shebna yn ard-scrudeyr, as Joah mac Asaph yn ard-chleragh.

4As dooyrt Rabshakeh roo, Loayr-jee nish rish Hezekiah, Shoh myr ta’n ree mooar, ree Assyria, dy ghra, Cre’n shickyrys shoh t’ou coyrt dty varrant er? 5Ta mee gra, jir oo, (agh she goan fardalagh ad,) Ta coyrle as niart aym son y chaggey: nish quoi er t’ou coyrt dty varrant, dy vel oo girree-magh m’oï? 6Cur-my-ner, t’ou cur dty varrant er lorg yn chuirtlagh vroojit shoh, eer er Egypt; er my ver dooinney barrant, nee eh roie ayns e laue, as lhottey eh: shen myr ta Pharaoh ree Egypt da dagh unnane ta treishteil huggeysyn. 7Agh my jir oo rhym, Ta shin treishteil ayns y Chiarn nyn Yee: nagh nee shen eshyn, ny ynnydyn ard as ny altaryn echeysyn ta Hezekiah er ghoaill ersooyl, as er ghra rish Judah as Jerusalem, Ec yn altar shoh nee shiu ooashlaghey? 8Nish er-y-fa shen, cur raanteenyn, ta mee guee ort, da my vainshtyr ree Assyria; as ver-ym dhyt daa housane cabbyl, my oddys oo jeed hene markee y choyrt orroo. 9Kys eisht ver oo eddin da’n er sloo jeh captanyn sharvaantyn my vainshtyr, as dty varrant y choyrt er Egypt son fainee as son markee? 10As vel mish nish er jeet seose fegooish y Chiarn noi yn cheer shoh, dy stroie eh? Dooyrt y Chiarn rhym, Seose lhiat noi yn cheer shoh, as stroie eh.

11Eisht dooyrt Eliakim as Shebna as Joah rish Rabshakeh, Loayr, ta mee guee ort, rish dty harvaantyn ayns glare ny Syrianee; son ta shin toiggal eh: as ny loayr rooin ayns glare ny Hewnyn, ayns clashtyn y phobble ta er y voalley.

12Agh dooyrt Rabshakeh, Vel my vainshtyr er choyrt mish er y chaghteraght shoh gys dty vainshtyr, as hood’s, dy loayrt ny goan shoh? nagh nee gys ny deiney ta soie er y voalley hug eh mee, dy bee ad êginit dy ee yn eoylley oc hene, as dy iu yn ushtey oc hene mêriuish. 13Eisht hass Rabshakeh, as deïe eh lesh ard-choraa ayns glare ny Hewnyn, as dooyrt eh, Eaisht-jee rish goan y ree mooar, ree Assyria: 14Myr shoh ta’n ree gra, Ny lhig-jee da Hezekiah shiuish y volley, son cha vod eh shiu y livrey. 15Chamoo lhig-jee da Hezekiah cur erriu treishteil ayns y Chiarn, gra, Nee yn Chiarn son shickyrys shinyn y livrey; cha bee yn ard-valley shoh er ny livrey gys laue ree Assyria. 16Ny eaisht-jee rish Hezekiah; son myr shoh ta ree Assyria gra, Jean-jee coardail rhym liorish gioot, as tar-jee magh hym’s; as ee-jee dy chooilley ghooinney jeh e villey-feeyney hene, as dy chooilley ghooinney j’iu jeh e villey-figgagh hene, as iu-jee dy chooilley unnane jeh ushtaghyn yn chibbyr echey hene; 17Derrey hig-ym as goym shiu ersooyl gys cheer goll-rish y cheer eu hene, cheer dy arroo as feeyn, cheer arran as garaghyn-feeyney. 18Cur-jee twoaie nagh der Hezekiah erriu credjal, gra, Nee yn Chiarn livrey shin. Vel veg jeh jeeghyn ny ashoonyn er livrey yn cheer echey ass laue ree Assyria? 19Cre’n erree t’er jeet er jeeghyn Hamath as Arphad? cre vel jeeghyn Sepharvaim? as vel adsyn er livrey Samaria ass my laue’s? 20Quoi ad hene mastey ooilley jeeghyn ny cheeraghyn shoh ta er livrey ny cheeraghyn oc hene ass my laue’s, dy jinnagh yn Chiarn Jerusalem y livrey ass my laue’s? 21Agh v’ad nyn dhost, as cha dug ad fockle dy ansoor da: son va sarey yn ree, gra, Ny cur-jee ansoor da.

22Eisht haink Eliakim mac Hilkiah, va harrish y lught-thie, as Shebna yn scrudeyr, as Joah mac Asaph yn ard-chleragh, gys Hezekiah lesh nyn goamraghyn raipit, as dinsh ad da goan Rabshakeh.