CAB. XXXVIII

1Ayns ny laghyn shen va Hezekiah ching, as ayns raad y vaaish. As haink Isaiah yn phadeyr, mac Amoz, huggey, as dooyrt eh rish, Shoh myr ta’n Chiarn dy ghra, Jean dty hymney: son yiow baase, as cha jean oo coural. 2Eisht hyndaa Hezekiah e eddin gys y voalley, as ghow eh padjer gys y Chiarn, 3As dooyrt eh, Cooinee nish, O Hiarn, ta mee guee ort, kys ta mee er n’immeeaght kiongoyrt rhyt ayns ynrickys, as lesh cree firrinagh, as er n’yannoo shen ny ta mie ayns dty hilley: as cheayn Hezekiah dy sharroo.

4Eisht haink goo yn Chiarn gys Isaiah, gra, 5Immee, as abbyr rish Hezekiah, Myr shoh ta’n Chiarn, Jee Ghavid dty ayr, gra, Ta mee er chlashtyn dty phadjer, ta mee er vakin dty yeïr: cur-my-ner, ver-ym gys dty eash queig bleeaney jeig. 6As livrey-ym uss, as yn ard-valley shoh, ass laue ree Assyria, as nee’m fendeil yn ard-valley shoh. 7As bee shoh cowrey dhyt veih’n Chiarn, dy jean y Chiarn shen ny t’eh er loayrt; 8Cur-my-ner, ver-ym lhiam back scadoo ny hooryn, eer ny jeih ooryn, ta er n’gholl sheese er dial Ahaz. Myr shen hyndaa yn ghrian ny jeih ooryn back, lioroo v’eh er n’gholl sheese.

9Yn screeu ren Hezekiah ree Yudah, erreish da ve ching, as v’er choural veih e hingys 10Dooyrt mee, ayns giarey jeh my eash, Hem sheese gys giattyn yn oaie; ta mee giarit jeh slane coontey my vleeantyn. 11Dooyrt mee, Cha vaik-ym y Chiarn, dy jarroo yn Chiarn ayns cheer ny bioee; cha der-ym ny sodjey my-ner dooinney marish cummaltee yn theihll. 12Ta my eash er n’gholl shaghey, as te scughit voym myr bwaag bochilley: ta my vea giarit magh myr eggey fidderagh: lesh doghan baasoil ver eh mee naardey: veih’n voghrey eer gys yn astyr ver oo jerrey orrym. 13Smooinee mee derrey’n voghrey, dy jinnagh eh myr lion ooilley my chraueyn y vrishey: veih’n voghrey eer gys yn astyr ver oo jerrey orrym. 14Myr eean coar, ny gollan-geayee, shen myr ren mee gaccan; ren mee cooagey myr calmane: ta my hooillyn failleil lesh jeeaghyn seose: O Hiarn, ta mee seaghnit; gow seose my chooish. 15Cre jir-ym? t’eh chammah er loayrt rhym, as t’eh hene er chooilleeney eh: bee yn chooid elley jeh my vea ayns kiunid, lurg yn sherriuid anmey shoh. 16O Hiarn, lioroo shoh ta deiney beayn, as ayndoo ta bioys my annym: lioroo nee oo my lheihys, as freayll mee bio. 17Cur-my-ner, ayns ynnyd shee, va mee ayns diunid sproght; agh t’ou uss, O Hiarn, jeh dty ghraih er hayrn my annym veih’n ooig dy loauid: son t’ou er hilgey ooilley my pheccaghyn er cheu dty chooylloo. 18Son cha vod yn oaie cur moylley dhyt, ny yn baase oo y ghloyraghey; as cha vod adsyn ta goll sheese gys yn oaie soilshaghey magh dty ynrickys. 19Yn vio, yn dooinney bio, eshyn ver moylley dhyt, myr ta mish jiu; nee yn ayr da e chloan soilshaghey dty ynrickys. 20Va’n Chiarn aarloo dy hauail mee: shen-y-fa gowee mayd arraneyn-moyllee er greïnyn-kiaullee strengit, ooilley laghyn nyn mea, ayns thie yn Chiarn. 21Son va Isaiah er ghra, Gow-jee dhossan dy figgyn, as lhie-jee eh son plaister er yn askaid, as nee eh coural. 22As va Hezekiah myrgeddin er ghra, Cre ta’n cowrey dy jem’s seose gys thie yn Chiarn?