CAB. IV

1As ayns y laa shen, nee shiaght mraane goaill greme er yn un dooinney, gra, Ee mayd yn arran ain hene, as nee mayd ceau yn coamrey ain hene; ynrycan lhig dooin ve cowrit liorish dty ennym’s, dy ghoaill ersooyl nyn oltooan. 2Bee banglane y Chiarn ayns y laa shen aalin as gloyroil, as bee mess y thallooin kenjal as stoamey da scapailtee Israel. 3As hig eh gy-kione, dy bee eshyn ta faagit ayns Zion, as eshyn ta er-mayrn ayns Jerusalem, enmyssit casherick, dy jarroo dagh unnane ta e ennym currit stiagh son bio ayns Jerusalem: 4Tra vees y Chiarn er niee ersooyl broïd inneenyn Zion, as er ghlenney ersooyl fuill Yerusalem veih’n vean eck, liorish spyrryd dy vriwnys, as liorish spyrryd dy lossey. 5As er ooilley ynnydyn-vaghee cronk Zion, as er e slane sheshaght, nee’n Chiarn bodjal as jaagh y chiaddey ’sy laa, as soilshean aile sollys ’syn oie: bee coodagh er ooilley yn ghloyr. 6As bee cabbane-agglish ayn son scadoo ’sy laa veih’n chiass, as son ynnyd dy hauchys as fastee veih’n dorrin, as veih’n fliaghey.