CAB. XL

1Jean-jee gerjaghey, jean-jee my phobble y gherjaghey, ta’n Jee eu dy ghra. 2Loayr-jee dy gerjoilagh rish Jerusalem, as eïe-jee dy vel y seaghyn eck harrish, dy vel y vee-chairys eck er ny phardooney; son t’ee er gheddyn veih laue yn Chiarn [kerraghey] dooble son ooilley e peccaghyn.

3Yn coraa echeysyn ta geamagh ayns yn aasagh, Jean-jee aarloo raad y Chiarn, kiartee-jee ayns yn eaynagh raad-mooar da’n Jee ain. 4Bee dy chooilley choan er ny lhieeney, as dagh slieau as cronk er nyn injillaghey; as bee ny raaidyn cam er ny yannoo jeeragh, as ny ynnydyn lieh-chiart jeant rea: 5As bee gloyr y Chiarn er ny hoilshaghey; as nee dy chooilley eill fakin shoh, chammah yn derrey yeh as yn jeh elley: son ta beeal y Chiarn er loayrt eh. 6Dooyrt y coraa, Cur eam. As dooyrt eshyn, Cre nee’m geamagh? Dy nee faiyr dy chooilley eill, as dy vel ooilley’n aalid echey myr blaa ny magheragh: 7Ta’n faiyr fioghey, ta’n blaa tuittym; son dy vel geay yn Chiarn sheidey er: shickyr ta’n pobble faiyr. 8Ta’n faiyr fioghey, ta’n blaa tuittym; agh nee goo yn Jee ain shassoo shickyr son dy bragh.

9O Zion, ta coyrt lhiat naightyn mie, immee seose er y chronk ard; O Yerusalem, ta coyrt lhiat naightyn mie, trog seose dty choraa lesh niart; trog seose eh, ny bee aggle ort: abbyr rish ard-valjyn Yudah, Cur-jee my-ner yn Jee eu. 10Cur-my-ner, hig yn Chiarn y Jee eu lesh laue niartal, as nee e roih gymmyrkey reill er e hon: cur-my-ner ta’n leagh echey mârish, as e obbyr kiongoyrt rish. 11Nee eh fassaghey e hioltane myr bochilley; nee eh chaglym ny eayin lesh e roih, as ver eh lesh ad ayns e oghrish, as dy meeley adsyn ta trome y leeideil.

12Quoi ta er howse ny ushtaghyn ayns bass e laue, as er n’ghoaill towshan yn aer lesh reaish, as er n’ghoaill stiagh [thummyd] joan ny hooirey ayns saagh, as er weighal ny sleityn ayns meihaghyn, as ny croink ayns co-hrimmid? 13Quoi ta er chur roish Spyrryd y Chiarn? ny quoi yn er-coyrlee t’er n’ynsaghey eh? 14Quoi jeh t’eh er n’ghoaill coyrle, as quoi ta er chur roish, as er n’ynsaghey eh ayns cassan briwnys, as er chur toiggal da, as er hoilshaghey raad tushtey da? 15Cur-my-ner, ta ny ashoonyn myr bine ’sy chruick, as t’ad coontit myr brinneen ayns ny meihaghyn: cur-my-ner, t’eh troggal ny ellanyn myr red feer fardalagh. 16As cha vel Lebanon dy liooar son aile, ny’n maase t’er dy liooar son oural-losht. 17Ta dy chooilley ashoon myr red gyn veg kiongoyrt rish, t’ad coontit liorish ny sloo na veg as fardail.

18Quoi rish eisht nee shiu Jee y hoylaghey, ny cre’n caslys ver shiu da? 19Ta’n obbree cummey jalloo grainnit, as ta’n gaaue-airh, dy skeayley airh harrish, as jannoo linkyn argid. 20Eshyn ta cha boght, nagh vel fort oural echey, t’eh reih billey nagh jean loau: t’eh jeeaghyn magh son obbree aghtal, dy yannoo jalloo grainnit nagh vod ve scughit. 21Nagh vel fys eu hene? nagh vel shiu er chlashtyn? nagh row eh inshit diu er-dyn toshiaght? nagh vel shiu er hoiggal veih undinyn y thallooin? 22Eshyn eh ta soie er combaase y theihll, as ta ny cummaltee echey myr lheimeyderyn-faiyr; ta sheeyney magh ny niaughyn myr curtan, as skeayley magh ad myr cabbane dy chummal ayn; 23Nagh vel soiaghey monney jeh princeyn; t’eh jannoo briwnyn y thallooin eer fardail. 24Dy jarroo, cha bee ad er nyn soiaghey; lioar, cha bee ad er nyn guirr; eer cha gow yn bun oc fraue ayns yn ooir: sheidee eh orroo myrgeddin, as nee ad fioghey; as gowee yn gheay-chassee ersooyl ad myr y coau. 25Quoi rish eisht nee shiu m’y hoylaghey? ny quoi rish nee shiu m’y chormal? ta’n Jee casherick dy ghra. 26Trog-jee seose nyn sooillyn dy ard, as cur-jee my-ner quoi t’er chroo ny reddyn t’ayns shen, ta cur magh yn cheshaght oc rere nyn earroo: t’eh geamagh orroo ooilley lurg ny enmyn oc, lesh mooadys e niart; son t’eh niartal ayns pooar; cha vel unnane failleil. 27Cre’n-fa t’ou uss gra, O Yacob, as dy vel oo loayrt, O Israel, Ta’n raad aym’s follit veih’n Chiarn, as my vriwnys er n’gholl shaghey veih my Yee?

28Nagh vel fys ayd hene, nagh vel oo er chlashtyn, nagh vel yn Jee dy bragh, beayn, yn Chiarn, Fer-croo king y theihll, gannooinaghey, ny gaase skee? cha vod roshtyn ve jeant er y tushtey echey. 29T’eh coyrt bree ayndoosyn ta annoon; as dauesyn ta faase t’eh bishaghey niart. 30Bee eer yn aegid moal as deinagh, as nee ny deiney aegey tuittym dy bollagh: 31Agh yiow adsyn ta farkiaght er y Chiarn niart ass-y-noa; etlee ad seose myr er skianyn urley; nee ad roie as cha bee ad skee, nee ad shooyl, as cha jed ad neeal.