CAB. XLI

1Bee-jee nyn dhost ayns my enish, O ellanyn; as lhig da’n pobble jannoo mie nyn gooish; lhig daue shassoo stiagh, as eisht loayrt; lhig dooin tayrn dy cheilley ayns briwnys. 2Quoi eshyn hug lesh yn dooinney ynrick veih’n niar, dy ve fo e rere? quoi hug yn varriaght da harrish ashoonyn, as hug reeaghyn fo e reill? ren eh ad myr joan roish e chliwe, as myr coau sheebit roish e vhow. 3Deiyr eh ad gyn assee da hene, eer ayns raad gyn oayll. 4Quoi dobbree as ren shoh y chooilleeney, cowraghey ny sheelogheyn veih’n toshiaght? Mish eh, eer mish y Chiarn va er-dy-rieau, as vees dy bragh. 5Honnick ny ellanyn shoh, as va aggle orroo; va atchim er cummaltee ardjyn sodjey magh y thallooin, hayrn ad dy cheilley, as haink ad. 6Ren dagh fer jeu cooney lesh e naboo, as dooyrt dy chooilley ghooinney rish e vraar, Gow cree. 7Myr shen ren y seyir yn gaaue-airh y ghreinnaghey, as eshyn ta cummey lesh yn oayrd yn fer ta goaill garrey er yn ingan, gra, Te aarloo son taa: as ren eh shickyr jeh lesh treinaghyn, nagh beagh eh er ny scughey. 8Agh t’ou uss Israel, my harvaant, Jacob ta mee er reih, sluight Abraham my charrey. 9Uss ta mee er ghoaill veih slystyn cheer foddey, as er dty reih veih mastey ny ard-gheiney echey, as dooyrt mee rhyt, T’ou uss my harvaant, ta mee er dty reih, as cha treig-ym oo.

10Ny bee aggle ort, son ta mish mayrt; ny bee lhag-chreeagh, son mish y Jee ayd’s: nee’m dty niartaghey; dy feer, neem’s cooney lhiat; neem’s dy jarroo uss y reir lesh laue yesh my ynrickys. 11Cur-my-ner, bee nearey as atchim orroosyn ooilley ta ayns noidys rhyt: bee ad gyn veg; as nee adsyn ta streeu rhyt cherraghtyn. 12Nee oo briaght nyn yeï, agh cha bee ad ry-gheddyn, eer adsyn dirree-magh dt’oï: bee adsyn ta caggey rhyt gyn bree, as myr red gyn veg. 13Son mish y Chiarn dty Yee nee dty laue yesh y niartaghey, gra rhyt, Ny bee aggle ort; coon-yms lhiat. 14Ny bee aggle ort, uss veishteig Jacob, as shiuish gheiney Israel; coon-yms lhiat, ta’n Chiarn dy ghra, eer dty Haualtagh, Jee casherick Israel. 15Cur-my-ner, nee’m oo y yannoo myr greïe noa gyere-feeacklagh, ry-hoi tasteraght: as nee oo tasteraght ny sleityn, as broo ad dy myn, as nee oo ny croink myr coau. 16Fasnee oo ad, as hed ad lesh y gheay, as nee geay-chassee ad y scaalheaney: as gowee oo boggey ayns y Chiarn, as nee oo boggyssagh ayns Jee casherick Israel. 17Tra ta’n boght as yn ymmyrchagh gannooinaghey son ushtey, as nagh vel veg ry-gheddyn, as nyn jengey sponkit lesh paays, mish y Chiarn ver couyr daue, mish Jee Israel nagh jean treigeil ad. 18Nee’m awinyn y osley daue er mullagh ny sleityn, as farraneyn ayns mean glionteenyn; nee’m yn aasagh ny loghan ushtey, as y thalloo chirrym geillyn ushtey. 19Neem’s soiaghey nyn gour ayns yn aasagh yn cedar, yn billey-shittah, yn myrtle, as y billey-olive; nee’m soiaghey ’syn eaynagh yn billey-juys, as y pine, as myrgeddin yn billey-vox; 20Dy vod ad fakin, dy vod tushtey as toiggal ’ve oc, as goaill gys nyn gree, dy nee laue yn Chiarn t’er n’yannoo shoh, as dy nee Jee casherick Israel t’er chooilleeney eh. 21Jean-jee nyn gooish y hoilshaghey, ta’n Chiarn dy ghra; cur-jee roïn nyn resoonyn lajer, ta Ree Yacob dy ghra. 22Lhig daue soiaghey magh nyn yallooyn, as faishnagh dooin cre vees maghey shoh: lhig daue soilshaghey dooin cre t’ad hannah er n’yannoo, dy vod mayd feysht ad, daink ad rieau gy-kione; er-nonney lhig daue phadeyrys y yannoo dooin cre ta ry-heet. 23Soilshee-jee cre hig gy-kione maghey shoh, dy vod fys ’ve ain dy nee jeeghyn shiu: dy jarroo, jean-jee mie ny sie, dy vod mayd goaill aggle reue tra ta shiu cur-my-ner eh. 24Cur-my-ner, reddyn gyn veg shiu, as gyn foaynoo nyn obbyr: dwoaiagh ta eshyn ta goaill taitnys ayndiu. 25Ta mee er hroggal seose fer veih’n twoaie, as hig eh: veih irree ny greïney nee eh fockley-magh my ennym; as ver eh princeyn fo-chosh myr y morter, as myr ta pasheyder stampey’n chray. 26Quoi jeu t’er hoilshaghey nhee erbee veih’n toshiaght, dy chur dooin baght jeh? as ro-laue, dy vod mayd gra my-e-chione, T’eh ’sy chair? agh cha vel fer jeu ta soilshaghey, chamoo ta fer jeu ta fockley-magh; dy jarroo cha vel unnane ta clashtyn ny goan eu. 27Jir yn chied er rish Zion, Cur-my-ner, cur-my-ner ad: as ver-yms gys Jerusalem chaghter ver lesh naightyn mie. 28Son hug mee my-ner, as cha row oc dooinney, eer ny mast’ oc; as cha row pleadeyr, tra vrie mee jeu, va fockle echey dy ghra. 29Cur-my-ner, fardail ad ooilley; dyn veg ta nyn obbraghyn: ta nyn yallooyn lheït geay as shaghrynys.