CAB. XLII

1Cur-my-ner my harvaant, ta mee dy niartaghey; my er-reiht, ayn ta my annym goaill taitnys: ta mee er choyrt my Spyrryd ersyn; ver eh magh briwnys gys ny ashoonee. 2Cha jean eh gyllagh, ny troggal seose e choraa, dy v’er ny chlashtyn ayns ny straïdyn. 3Yn chuirtlagh vroojit cha jean eh brishey, as y bite giare-cheaut cha der eh ass: ver eh magh briwnys ayns ynrickys. 4Cha jean eh failleil ny coayl e chree, derrey t’eh er hoiaghey seose briwnys er y thalloo: as nee ny ellanyn farkiaght son e leigh.

5Shoh myr ta’n Chiarn Jee dy ghra, eh chroo ny niaughyn, as ren skeayley magh ad; eh hug er y thalloo dy heet rish, as ooilley ny ta cheet ass; eshyn hug ennal ’sy phobble ta er, as bioys ayndoosyn ta cummal ayn; 6Mish y Chiarn t’er n’eamagh ort ayns ynrickys; as goym oo er y laue, as freill-ym oo, as ver-ym oo son conaant da’n pobble, son soilshey da ny ashoonee; 7Dy osley sooillyn y doal, dy choyrt feaysley da ny pryssoonee, as dauesyn ta soie ayns dorraghys veih diunid y phryssoon. 8Mish y Chiarn; shen m’ennym: as my ooashley cha der-ym da fer erbee elley, ny my voylley da jallooyn grainnit. 9Cur-my-ner, ta shen dinsh mee ro-laue er jeet gy-kione, as nish ta mee soilshaghey reddyn noa: roish my jig ad er-ash ta mee fockley-magh ad. 10Gow-jee arrane noa gys y Chiarn, as cur-jee moylley da er feaï-ny-cruinney; shiuish ta taaghey yn aarkey, as ooilley ny ta ayn; ny ellanyn, as nyn gummaltee. 11Lhig da’n aasagh as ny ard-valjyn mygeayrt troggal seose nyn goraa, eer baljyn Chedar; lhig da cummaltee yn chreg goaill arrane; lhig daue kiaulleeaght veih mullagh ny sleityn. 12Lhig daue gloyr y choyrt da’n Chiarn, as soilshaghey e voylley ayns ny ellanyn. 13Hed y Chiarn magh myr treanagh, greinnee eh seose e ghunnallys myr dooinney-caggee: nee eh gyllagh, as s’agglagh vees e choraa; ver eh fo-chosh e noidyn. 14S’foddey ta mee er ve my host; ta mee er lhiggey shaghey, as dreill mee orrym pene: nish ver-ym eam gyere myr ben er-troailt; nee’m stroie as sluggey seose er-y-chooyl. 15Ver-yms naardey sleityn as croink, as fiogh-ym nyn ghlassyraght: nee’m ellanyn ayns awinyn, as chyrmee-ym seose ny loghanyn. 16As ver-ym lhiam ny doail er raad nagh row nyn oayll; leeid-ym ad ayns cassanyn nagh bione daue: nee’m yn dorraghys y yannoo sollys rhymboo, as ny raaidyn cammey jeeragh. Ny reddyn shoh nee’m er nyn son, as cha dreig-ym ad.

17Bee adsyn er ny chastey, as bee nearey trome orroosyn, ta coyrt nyn marrant er jallooyn grainnit, ta gra rish ny jallooyn lheït, Shiuish ny jeeghyn ainyn. 18Eaisht-jee, shiuish vouranee: as jeeagh-jee, shiuish vooinjer ghoal, dy vod shiu fakin. 19Quoi ta doal, agh my harvaant? ny bouyr, agh my haghter? quoi ta cha doal rishyn ta slane ynsit, cha moal ayns soilshey as shirveishagh y Chiarn? 20T’ou fakin ymmodee reddyn, agh cha vel oo goaill tastey; fosley dty chleayshyn, agh cha vel oo clashtyn. 21Ghow yn Chiarn taitnys ayn er graih e ynrickys; ren eh mooar as ooasle jeh liorish e leigh. 22Agh ta’n pobble shoh er ny roostey as spooillit; t’ad ooilley goit ayns tuill, as t’ad dooint stiagh ayns pryssoonyn: son spooilley t’ad, as cha vel fer coyrt livrey-ys; son cragh, as cha vel fer erbee gra, Jean-jee lhiasaghey. 23Quoi ta ny mast’ eu eaishtys rish shoh? quoi ver geill, ny clashtyn son y traa ry-heet? 24Quoi hug Jacob son spooilley, as Israel da ny roosteyryn? nagh nee yn Chiarn, eshyn, n’oï va shiu er n’yannoo peccah? son cha shooylagh ad ayns ny raaidyn echey, chamoo v’ad biallagh da e leigh. 25Shen-y-fa t’eh er gheayrtey magh orroo eulys e yymmoose, as dewilys yn chaggey; as hug eh aile er ooilley mygeayrt, ny-yeih cha dug eh geill da; as v’eh er ny lostey liorish, ny-yeih cha ghow eh shoh gys e chree.