CAB. XLIII

1Agh nish, ta’n Chiarn ren dty chroo gra, O Yacob, as eshyn ren dty chummey, O Israel, Ny bee aggle ort; son ta mee er dty eaysley; t’ou uss enmyssit orrym’s, t’ou uss lhiam’s. 2Tra hed oo trooid ny ushtaghyn, bee’m mayrt; as trooid ny awinyn cha jean ad thooilley ort: tra t’ou shooyl trooid yn aile cha bee oo losht; chamoo nee yn lossey brishey magh ort. 3Son mish y Chiarn dty Yee, Jee casherick Israel, dty Haualtagh: hug mee Egypt son dty choonrey, Ethiopia as Seba son dty eaysley. 4Neayr’s v’ou deyr ayns my hilley t’ou er ve onnoroil, as va graih aym ort: shen-y-fa ver-ym deiney ayns coonrey er dty hon, as sleih son dty vioys. 5Ny bee aggle ort, son ta mee mayrt: ver-yms lhiam dty luight veih’n niar, as chaglym oo veih’n neear; 6Jir-ym rish y twoaie, Cur seose; as rish y jiass, Ny jean lhiettal: cur-jee lhieu my vec veih foddey, as my inneenyn veih ardjyn ny cruinney; 7Eer dagh unnane ta enmyssit orrym’s: son ta mee er chroo eh son my ooashley, ta mee er chummey eh; dy jarroo, ta mee er chiaddey eh.

8Cur-jee lhieu magh yn pobble doal ta sooillyn oc, as ny beuyr ta cleayshyn oc. 9Lhig da ooilley ny ashoonyn v’er nyn jaglym cooidjagh, as y pobble cheet dy cheilley: quoi ny mast’ oc oddys shoh y hoilshaghey, ny ginsh dooin reddyn ro-laue? lhig daue nyn veanishyn y chur stiagh, dy phrowal eh; er-nonney lhig daue goaill-rish as gra, S’feer eh. 10Shiuish my eanishyn, ta’n Chiarn dy ghra, as my harvaant ta mee er reih; dy vod fys ’ve eu, as m’y chredjal, as toiggal dy nee mish eh: roym’s cha row Jee erbee er ny chummey, chamoo vees my yeï. 11Mish, dy jarroo mish, y Chiarn; as cheu-mooie jeem’s cha vel Saualtagh erbee. 12Ta mee er hoilshaghey as er n’yannoo eh mie, as er n’insh ro-laue, tra nagh row Jee erbee joarree ny mast’ eu: shen-y-fa ta shiu my eanishyn, ta’n Chiarn dy ghra, dy nee mish yn Jee. 13Dy jarroo roish my row soilshey laa er ny chroo, va mish; as cha vel fer oddys livrey ass my laue: neem’s jannoo, as quoi lhiettys eh?

14Shoh myr ta’n Chiarn nyn Saualtagh, Jee casherick Israel, dy ghra, Er y ghraih euish hug mee my haghter gys Babylon; as ta mee er choyrt fo-chosh ooilley nyn gheiney ooasle, as ny Caldeanee, va boggyssagh ass nyn lhuingys. 15Mish y Chiarn nyn Yee casherick, Fer-croo Israel, nyn Ree. 16Myr shoh ta’n Chiarn dy ghra, eh ren raad trooid yn aarkey, as cassan ayns ny ushtaghyn mooarey; 17Ta cur lesh magh yn ainagh as yn cabbyl, yn armee, as y phooar; nee ad lhie sheese cooidjagh, as cha n’irree ad arragh: t’ad mooghit, t’ad currit ass myr cainle. 18Ny smooinee-jee er ny t’er n’gholl shaghey, chamoo cur-jee geill da cooishyn y chenn earish. 19Cur-my-ner, neem’s red noa y yannoo: eer nish hene te cheet er-ash; nagh der shiu geill da? nee’m raad y yannoo ’syn aasagh hene, as awinyn ’syn eaynagh. 20Ver beishtyn y vagher ooashley dou, ny dragonyn as ny hulladyn: son dy vel mee cur ushtaghyn ayns yn aasagh, as awinyn ’syn eaynagh, dy ooraghey my phobble, my vooinjer reiht. 21Ta mee er chummey yn pobble shoh dou hene; nee ad my voylley y hoilshaghey magh.

22Agh cha vel uss er n’eamagh orrym’s, O Yacob; as t’ou uss er ve skee jeem’s, O Israel. 23Cha nee dooys t’ou er hebbal eayin ny mannanyn dty ourallyn-losht, chamoo t’ou er ooashlaghey mish lesh dty hebballyn: cha nee mish t’er chiangley lheid yn oural ort, ny er choyrt oo gys cost incense. 24Cha nee my chour’s t’ou er chionnaghey cuirtlagh villish lesh dty argid, chamoo dy nee mish t’ou er lhieeney lesh meeaylys dty ourallyn; agh t’ou er my hirveish lesh dty pheccaghyn, as er my laadey lesh dty ghrogh-yannoo. 25Mish, dy jarroo mish hene eh, ta leih dhyt dty loghtyn er my ghraih hene, as cha gooin-ym er dty pheccaghyn. 26Tayrn mee gys cooinaghtyn: lhig dooin pleadeil ry-cheilley: soilshee dty chooish, my oddys oo v’er dty heyrey. 27Ta dty henn-ayr er n’yannoo peccah, as ta dty ir-ynsee er ve foiljagh m’oï. 28Shen-y-fa, ta mee er hayrn mee-ooashley er princeyn y chiamble, as ta mee er n’yannoo Jacob son mollaght, as Israel son oltooan.