CAB. XLV

1Myr shoh ta’n Chiarn dy ghra rish e er-ooilit, rish Cyrus, e laue yesh ta mee niartaghey, dy injillaghey ashoonyn kiongoyrt rish; as nee’m lhaggaghey meeghyn reeaghyn, dy osley roishyn ny giattyn coollee-dooble; as cha bee ny giattyn dooint: 2Hem’s royd, as neem’s ny ynnydyn cammey y yannoo jeeragh: brish-ym ayns peeshyn ny giattyn prashey, as giare-ym veih-my-cheilley ny boltyn yiarn: 3As ver-ym dhyt’s tashtaghyn y dorraghys, as berchys keillit ny ynnydyn follit, dy vod fys ’ve ayd’s, dy nee mish y Chiarn, ta geamagh ort’s liorish dty ennym, Jee Israel. 4Er graih Yacob my harvaant, as Israel my er-reiht, ta mee dy jarroo er n’eamagh ort liorish dty ennym: as ta mee er choyrt sliennoo ort, ga nagh vel enney er ny ve ayd’s orrym.

5Mish y Chiarn, as cha vel Jee erbee elley agh mish: ren mee dty niartaghey, ga nagh vel oo er choyrt enney orrym; 6Dy vod fys ’ve oc veih irree ny greïney, as veih’n neear, nagh vel Jee ayn er-lhimmey jeem’s: mish y Chiarn, as cha vel Jee erbee elley. 7Ta mee kiaddey yn soilshey, as croo yn dorraghys; ta mee jannoo shee as reill yn olk. Mish yn Chiarn ta bun ooilley ny reddyn shoh. 8Jean-jee shilley, shiuish niaughyn, veih’n yrjid, as lhig da’n aer ynrickys y gheayrtey neose: lhig da’n ooir fosley, as lhig daue saualtys y ymmyrkey magh, as lhig da ynrickys gaase seose cooidjagh. She mish y Chiarn t’er chroo eh. 9S’treih dasyn ta streeu rish e Er-croo! Lhig da’n shlig-craie streeu rish shligyn-craie y thallooin. Jean y chray gra rish y phasheyder, Cre t’ou dy yannoo? ny dty obbyr, Cha vel laueyn echey? 10Smerg dasyn ta gra rish e ayr, Cre t’ou dy gheddyn? ny rish e voir, Cre t’ou dy yientyn? ny rish e ven, Cre t’ou er choyrt son y theihll? 11Myr shoh ta’n Chiarn dy ghra, Jee casherick Israel, as e Er-croo, Jean-jee briaght jeem’s son reddyn ta ry-heet mychione my vec; as brie-jee dy imneagh jee’m mychione obbyr my laueyn. 12Ta mee er n’yannoo yn thalloo, as er chroo dooinney er: she mish, eer my laueyn hene, t’er heeyney magh ny niaughyn, as ooilley yn cheshaght-chaggee oc ta mee er oardrail. 13Ta mee er hroggal seose eh ayns ynrickys, as kiartee-ym ooilley e raaidyn: troggee eshyn yn ard-valley, as nee eh my phryssoonee y eaysley, cha nee son leagh ny coonrey, ta Chiarn ny flaunyssee dy ghra. 14Myr shoh ta’n Chiarn gra, Bee obbyr-lauee Egypt, as marchantys ny Ethiopianee, as ny Sabeanee, deiney thollee, er ny lhiantyn hood’s, as bee ad lhiat hene: hig ad geiyrt ort; ayns geulaghyn hig ad harrish, as tuittee ad sheese kiongoyrt rhyt, as nee ad aghin hood’s, gra, Dy shickyr ta Jee aynyd’s, as cha vel fer arragh; cha vel Jee elley. 15Dy firrinagh, uss y Jee ta follaghey oo hene, O Yee Israel yn Saualtagh. 16Bee nearey orroo, as bee ad myrgeddin er nyn gastey, dagh fer jeu: bee ad ooilley naardey dy cheilley ta jannoo jallooyn. 17Agh bee Israel er ny hauail ayns y Chiarn lesh saualtys dy bragh farraghtyn: cha bee shiuish er nyn goyrt gys nearey ny er nyn gastey seihll gyn jerrey. 18Son myr shoh ta’n Chiarn dy ghra chroo ny niaughyn, Jee hene ren y thalloo y chummey as chroo eh, t’eh er hickyraghey eh, cha chroo eh eh ayns fardail, ren eh cummey eh cour cummaltee; mish y Chiarn, as cha vel Jee erbee elley. 19Cha vel mee er loayrt dy follit, ayns corneil dorraghey jeh’n theihll: cha dooyrt mee rish sluight Yacob, Shir-jee mee ayns fardail. Mish y Chiarn ta loayrt ynrickys, ta mee soilshaghey magh reddyn cairal.

20Chaggle-jee shiu hene as tar-jee; tar-jee er-gerrey cooidjagh, shiuish scapailtee ny ashoonyn: t’ad gyn tushtey ta soiaghey seose fuygh nyn yalloo grainnit, as ta goaill padjer gys jee nagh vod sauail. 21Insh-jee, as cur-jee lhieu ad er-gerrey; dy jarroo, lhig daue coyrle y ghoaill ry-cheilley: quoi t’er hoilshaghey shoh er-dyn chenn earish? quoi t’er n’insh eh er-dyn traa shen? nagh vel mish yn Chiarn? as cha vel jee erbee elley agh mish; Jee cairal as Saualtagh; cha vel agh mee hene. 22Jeeagh-jee hym’s, as bee-jee er nyn sauail, ooilley shiuish ardjyn y theihll; son mish Jee, as cha vel Jee erbee elley. 23Ta mee er vreearrey liorym pene, ta’n fockle er n’gholl magh ass my veeal ayns ynrickys, as cha jean eh chyndaa, dy nee hym’s nee dy chooilley ghlioon lhoobey, dy chooilley hengey breearrey. 24Dy firrinagh nee fer gra, Ayns y Chiarn ta aym ynrickys as niart: eer huggeysyn nee deiney cheet; as bee ooilley ny ta fargagh n’oï er nyn goyrt gys nearey. 25Ayns y Chiarn bee ooilley sluight Israel er ny heyrey, as nee ad boggyssagh.