CAB. XLVI

1Ta Bel lhoobey sheese, ta Nebo croymmey; va ny jallooyn oc er y maase, as er yn ollagh: va’n carriads eu trome laadit; t’ad errey da’n baagh tooillit. 2T’ad lhoobey; t’ad croymmey sheese cooidjagh; cha voddagh ad yn errey y livrey, agh t’ad-hene er n’gholl roue ayns cappeeys.

3Clasht rhym, O hie Yacob, as ooilley fooilliagh thie Israel, t’er nyn ymmyrkey liorym veih’n volg, as troggit veih’n vreïn: 4As eer gys nyn shenn eash she mish eh; as dy jarroo gys nyn gione lheeah ver-yms lhiam shiu: ta mee er chroo, as nee’m gymmyrkey; dy jarroo ver-ym lhiam, as nee’m shiu y livrey.

5Quoi gys nee shiu mee y hoylaghey, as m’y chormal, as jannoo my huarystal, shin dy ve co-laik? 6T’ad dy feoilt deayrtey magh airh ass y sporran, as towse argid ayns y veih, as t’ad failley gaaue-airh, as ta eshyn jannoo jee jeh: t’ad tuittym sheese; dy jarroo, t’ad ooashlaghey. 7T’ad dy hroggal eh er y gheaylin, t’ad dy ymmyrkey lhieu eh, as soiaghey eh ayns e ynnyd, as te shassoo; veih e ynnyd cha jean eh gleashagh: dy jarroo, nee fer geamagh huggey, ny-yeih cha vod eh freggyrt, ny sauail eh ass e heaghyn. 8Cooinee-jee er shoh, as jeeagh-jee shiu hene dy ve deiney; gow-jee shoh gys nyn gree, O shiuish ghrogh-yantee. 9Cooinee-jee er cooishyn y chenn earish: son mish yn Jee, as cha vel Jee erbee elley; mish yn Jee, as cha vel fer erbee casley rhym; 10Soilshaghey yn jerrey veih’n toshiaght, as veih ny shenn earishyn ny reddyn nagh vel foast er daghyrt, gra, Nee my choyrle shassoo, as cooilleen-ym ooilley my aigney: 11Geamagh er eean jollyssagh veih’n niar, yn dooinney ta cooilleeney my choyrle veih cheer joarree: dy jarroo, ta mee er loayrt eh, ver-ym lhiam eh myrgeddin gys kione; ta mee myrgeddin er chiarail eh, nee’m myrgeddin cooilleeney eh.

12Clasht-jee rhym, shiuish ard-chreeagh, ta foddey veih’n ynrickys: 13Ver-ym lhiam my ynrickys er-gerrey; cha bee eh foddey jeh, as cha jean my haualtys cumrail; as soie-yms saualtys ayns Zion cour Israel my ghloyr.