CAB. XLVII

1Tar neose, as soie ayns y joan, O voidyn inneen Vabylon; soie er y thalloo: cha vel stoyl-reeoil sodjey dty chour’s, O inneen ny Caldeanee: son cha bee oo ny smoo enmyssit seyr as mettey. 2Gow ny claghyn-mwyllin, as jean meinn y vlieh: cur jeed dty vreidyn, rooisht dty chass, an-choodee dty lheayst, immee trooid ny awinyn. 3Bee dty scammylt er ny hoilshaghey, eer bee dty nearey er ny akin: goym’s cooilleeney, as cha jig-ym dty whail myr dooinney. 4Er son y Fer-kionnee ain, ta’n ennym echey Chiarn ny flaunyssee, Jee casherick Israel. 5Soie uss dty host, as stiagh oo ayns dorraghys, O inneen ny Caldeanee: son cha bee oo ny smoo enmyssit, Ard-lady ny reeriaghtyn. 6Va mee jymmoosagh rish my phobble; ta mee er n’yannoo my eiraght feohdoil, as er livrey ad gys dty laue: cha ren oo myghin y hoilshaghey daue; er y chenndeeaght t’ou dy feer trome er lhie yn whing.

7As t’ou er ghra, Bee’m my ard-lady son dy bragh: as cha ren oo ny reddyn shoh y ghoaill gys dty chree, chamoo ren oo smooinaghtyn cre’n jerrey harragh er. 8Shen-y-fa clasht nish rish shoh, uss ven rouanagh as almoragh; ta gra ayns dty chree, Mish ta, as quoi agh mee hene? cha beem’s my hoie myr ben-treoghe, chamoo vees fys aym cre ta baase clienney: 9Agh berree yn daa red shoh ort’s ’sy tullogh, er yn un laa, baase clienney, as treoghys: hig ad ort dy dewil kyndagh rish earroo mooar dty phishagyn, as dty ymmodee obbeeys.

10Son t’ou er hreishteil ayns dty vee-chraueeaght hene: t’ou er ghra, Cha vel unnane dy my akin. Ta dty chreenaght as dty hushtey er choyrt oo fo shaghrynys; as t’ou er ghra ayns dty chree, Shee mee hene t’ayn, as cha vel ayn agh mee. 11Shen-y-fa berree yn olk ort; cha bee fys ayd cre veih te troggal: as taghyrys assee dhyt; cha bee oo abyl shaghney: as hig traartys ort doaltattym, nagh bee fys ayd cre veih. 12Shass nish er dty obbeeys, as er ymmodee dty phishagyn, t’ou er chur roo veih dty aegid; my she shen dy vod oo laue y yannoo jeu, as geddyn foays erbee lioroo. 13T’ou tooillit ayns ymmodee dty haaseyn. Lhig da nish ny fir-ysseree, ny rollageydee, as ny fallogyssee meeagh, shassoo seose as sauail oo veih shen ta kiarit dy heet ort. 14Cur-my-ner, bee ad myr y yiare-choonlagh; nee yn aile ad y lostey; cha jean ad livrey ad-hene veih pooar y lossey: cha bee ayn smarage dy nyn jiow, ny aile dy hoie sheese huggey. 15Shoh myr nee adsyn rhyt’s t’ou er ghellal roo, eer marchanyn dty aegid: hed ad roue dagh dooinney gys e ynnyd hene; cha jean fer dty hauail.