CAB. XLVIII

1Clasht-jee nish rish shoh, O hie Yacob, ta ennym Israel cowrit erriu, as t’er jeet magh ass moir-ushtaghyn Yudah; ta breearrey liorish ennym y Chiarn, as gimraa mychione Jee Israel, agh cha nee ayns firrinys ny ayns ynrickys. 2Son t’ad genmys ad-hene lurg yn ard-valley casherick, as coyrt nyn marrant er Jee Israel; Chiarn ny flaunyssee e ennym. 3Dockle mee magh ro-laue ny reddyn va jeant veih’n toshiaght; as hie ad magh ass my veeal, as hoilshee mee ad; chooilleen mee ad dy leah, as haink ad gy-kione. 4Er-y-fa dy row fys aym’s dy vel oo roonagh, as ta dty wannal feh-yiarn, as dty vaaish prash; 5Ta mee er n’insh dhyt eh ro-laue veih’n toshiaght; roish my daink eh gy-kione hoilshee mee dhyt eh: nagh beagh oyr ayd gra, She my yalloo t’er n’yannoo ad, she my yalloo grainnit, as my yalloo lheït, t’er harey ad. 6T’ou er chlashtyn, cur-my-ner shoh ooilley; as nagh jean-jee soilshaghey eh? ta mee er yeeaghyn dhyt reddyn noa veih’n traa shoh, eer reddyn follit, as cha row toiggal ayd jeu. 7T’ad nish er nyn groo, as cha nee veih’n toshiaght; dy jarroo roish y laa nagh geayll oo jeu; er-aggle dy niarragh oo, Cur-my-ner, va toiggal aym jeu. 8Dy jarroo, cha ren oo clashtyn, chamoo ren oo toiggal; eer veih’n traa shen cha row dty chleaysh foshlit: son va fys aym’s dy jinnagh oo dellal dy feer volteyragh, as dy r’ou enmyssit dty ghrogh-yantagh veih’n vreïn.

9Er graih my ennym nee’m my yymmoose y lhiettal, as er graih my voylley lhig-ym shaghey, nagh stroie-ym oo. 10Cur-my-ner, ta mee er lheïe oo ’syn aile, agh cha nee myr argid; ta mee er dty phrowal ayns y choirrey dy heaghyn. 11Er my ghraih hene, eer er my ghraih hene, nee’m y yannoo eh: son cre’n-fa veagh my ennym er ny oltooaney? as cha der-yms my ghloyr hene da fer elley.

12Clasht rhym, O Yacob as Israel, ta enmyssit orrym; she mish eh, mish yn chied er, as myrgeddin mish y fer s’jerree. 13Ta my laue myrgeddin er hoiaghey undin y thallooin, as ta my laue yesh er skeayley magh ny niaughyn: tra ta mee geamagh orroo, t’ad shassoo seose dy cheilley. 14Ooilley shiuish, chaggle-jee shiu hene cooidjagh, as clasht-jee: quoi eh ny mast’ oc t’er hoilshaghey ny reddyn shoh? Ta’n Chiarn er ve graihagh er: cooilleenee eh e aigney er Babylon, as bee e roih trome er ny Caldeanee. 15Mish, dy jarroo mish, t’er loayrt; dy jarroo, ta mee er n’eamagh er; ta mee er chur lhiam eh, as ver eh aïgh vie lesh ’sy raad.

16Tar-jee er-gerrey hym’s, clasht-jee rish shoh; cha vel mee er loayrt dy follit veih’n toshiaght; er-dyn traa ve, ayns shen ta mee: as nish ta’n Chiarn Jee as e Spyrryd er my choyrt magh. 17Myr shoh ta’n Chiarn dty Er-kionnee gra, Jee casherick Israel; Mish y Chiarn dty Yee ta dty ynsaghey gys dty vondeish hene, ta dty leeideil er y raad ayn lhisagh oo gimmeeaght. 18O dy beagh oo er n’eaishtagh rish my annaghyn! eisht veagh dty hee er ve myr awin, as dty ynrickys myr tonnyn ny marrey; 19Veagh dty chloan myrgeddin er ny ve myr y gheinnagh, as sluight dty chorp myr genniagh-gharroo ny marrey; cha beagh e ennym er ny ve giarit jeh ny er ny stroie veih kiongoyrt rhym.

20Cosne-jee magh ass Babylon, roie-jee er-chea veih ny Caldeanee; lesh y choraa dy vingys jean-jee gimraa er shoh, insh-jee shoh, fockle-jee eh dy jarroo gys ny ard-valjyn sodjey magh jeh’n theihll; abbyr-jee, Ta’n Chiarn er choyrt livrey-ys da e harvaant Jacob. 21Tra leeid eh ad trooid yn aasagh cha row ad paagh: hug eh er ny ushtaghyn dy gheill magh ass y chreg er nyn son; scelt eh yn chreg myrgeddin, as ren ny ushtaghyn brishey magh. 22Cha vel shee erbee cour ny mee-chrauee, ta’n Chiarn dy ghra.