CAB. XLIX

1Eaisht-jee rhym, O ellanyn; as jean-jee clashtyn, shiuish phobble veih foddey; ta’n Chiarn er n’eamagh orrym veih’n vreïn, veih breïn my vayrey t’eh er n’yannoo imraa jeh my ennym. 2T’eh er n’yannoo my veeal myr cliwe gyere; fo scaa e laue t’eh er my choodaghey, as er my yannoo e reih side; ayns e whiver t’eh er my ollaghey; 3As dooyrt eh rhym, Uss my harvaant, O Israel, aynyd’s beem’s er my ghloyraghey. 4Eisht dooyrt mee, Ta mee er laboragh ayns fardail, ta mee er vaarail my niart gyn ymmyd as ayns fardail; foast dy shickyr ta my vriwnys marish y Chiarn, as leagh my obbyr marish my Yee.

5As nish, ta’n Chiarn dy ghra ren mish y chroo veih’n vreïn dy ve e harvaant, dy chur lesh Jacob huggey reesht, Ga nagh vel Israel er ny haglym, foast beem’s gloyroil ayns shilley yn Chiarn, as bee my Yee my niart. 6As dooyrt eh, S’aashagh te dhyt dy ve my harvaant, dy hroggal seose sheelogheyn Yacob, as dy hyndaa reesht cloan sauchey Israel; ver-yms oo myrgeddin dy ve son soilshey da ny ashoonyn, dy vod oo ve my haualtys gys ny ardjyn sodjey magh jeh’n theihll. 7Myr shoh ta’n Chiarn, Saualtagh Israel, dy ghra, as e Er-casherick, rishyn ta sleih soiaghey beg jeh, rishyn ta dwoaie yn ashoon, rish sharvaant dy ir-reill; Ver reeaghyn my-ner as troggee ad orroo; princeyn myrgeddin, as ver ad ooashley, er graih yn Chiarn, yn Er ynrick, as Jee casherick Israel, as nee eh uss y reih. 8Myr shoh ta’n Chiarn gra, Ayns traa cooie ta mee er dty chlashtyn, as ayns laa yn taualtys ta mee er chooney lhiat: as nee’m oo y choadey, as ver-ym oo son conaant da’n pobble, dy chur shee da’n thalloo, dy chur cummaltee reesht ayns ny eiraghyn treigit: 9Dy vod oo gra rish ny pryssoonee, Gow-jee magh; roosyn t’ayns dorraghys, Jeeagh-jee shiu hene: nee ad gyndyr er ny raaidyn, as bee nyn aber harrish ooilley yn yrjey. 10Cha bee ad accryssagh ny paagh; chamoo nee chiass loshtee yn ghrian skielley daue: son eshyn ta chymmoil orroo nee ad y leeideil, eer gys ny farraneyn ushtey ver eh lesh ad. 11As nee’m raad rea trooid ooilley my leityn, as bee my raaidyn mooarey er nyn daaghey. 12Cur-my-ner, hig ad shoh veih foddey; as cur-my-ner, ad shen veih’n twoaie as veih’n neear; as ad shid veih cheer Sinim.

13Gow-jee arrane, O shiuish niaughyn; as gow uss boggey, O halloo; as brish-jee magh ayns bingys, O leityn; son ta’n Chiarn er gherjaghey e phobble, as bee eh myghinagh da e vooinjer seaghnit. 14Agh dooyrt Zion, Ta’n Chiarn er m’y hreigeil, as ta my Hiarn er my yarrood. 15Vod ben jarrood yn lhiannoo ta jiole urree, nagh beagh ee chymmoil er oikan e breïn? dy jarroo, foddee ad jarrood; agh foast cha jean-yms uss y yarrood. 16Cur-my-ner, ta mee er dty ghrainney er bassyn my laueyn; ta dty voallaghyn dy kinjagh kiongoyrt rhym. 17Dty chloan nee ad siyr; dty stroideryn, as adsyn ta dy dty choyrt mow, hig ad magh assyd.

18Trog seose dty hooillyn mygeayrt-y-mood, as cur-my-ner: t’ad shoh ooilley chaglym ad-hene cooidjagh, as cheet hood’s. Myr ta mee bio, ta’n Chiarn dy ghra, nee oo son shickyrys oo hene y hoiaghey magh lhieu shoh ooilley myr lesh coamrey aalin, as ver oo mood ad myr ta ben-phoosee dy yannoo. 19Son dty ynnydyn-vaghee faase as treigit, as cheer dty hraartys, bee ad dy jarroo nish ro choon son ny cummaltee, as bee adsyn ren uss y lhuggey seose eebrit foddey jeh. 20Yn chloan shen vees ayd, lurg dhyt v’er choayl yn chied chloan, jir ad reesht ayns dty chlashtyn, Ta’n ynnyd ro choon dou: jean room dou dy vaghey ayn. 21Eisht nee oo gra ayns dty chree, Quoi t’er n’gheddyn y chloan shoh dou, fakin dy vel mee er choayl my chloan v’aym, as dy vel mee treigit, my chappee, as garragh noon as noal? as quoi t’er droggal ad shoh? Cur-my-ner, va mee faagit my-lomarcan; ad shoh, cre’n raad t’ad er ve? 22Myr shoh ta’n Chiarn Jee dy ghra, Cur-my-ner, trog-yms seose my laue gys ny ashoonee, as soie-ym seose my chullee da’n pobble: as ver ad lhieu dty vec ayns nyn roihaghyn, as dty inneenyn er nyn gheayltyn. 23As bee ayd reeaghyn son dty ayraghyn boandyrys, as ny mraane-reïn son dty voiraghyn boandyr: nee ad croymmey sheese hood’s lesh nyn eddin gys y thalloo, as nee ad joan dty chassyn y liee; as bee fys ayd’s dy nee mish y Chiarn: son cha bee oyr nearey orroosyn ta farkiaght er my hon.

24Bee yn spooilley er ny ghoaill veih ny treanee, ny bee yn cappee lowal livreit seose? 25Agh myr shoh ta’n Chiarn dy ghra, Dy jarroo bee eer cappee ny treanee goit voue, as bee spooilley yn vooinjer atchimagh livreit seose: son streeu-yms rishyn ta streeu rhyt’s, as nee’m dty chloan y hauail. 26As ver-ym er dty hranlaasee dy n’ee ad yn eill oc hene; as dy bee ad er-meshtey lesh yn uill oc hene, myr lesh feeyn noa: as bee fys ec dy chooilley eill dy nee mish y Chiarn dty Haualtagh, as dty Er-kionnee, Fer-niartal Yacob.