CAB. V

1Nish goym’s arrane da my ghraih, arrane my ghraih er e gharey-feeyney. Ta garey-feeyney ec my ghraih er cronk reih messoil: 2As ren eh cleiy mysh, as haggil eh ny claghyn, as phlant eh ayn ny reih biljyn-feeyney, as hrog eh toor ’sy vean echey, as ren eh myrgeddin press-feeyney ayn: as ren eh jerkal dy n’ymmyrkagh eh berrishyn-feeyney, as dymmyrk eh berrishyn-feeyney feïe. 3As nish, O chummaltee Yerusalem, as gheiney Yudah, jean-jee briwnys, ta mee guee erriu, eddyr mish as my gharey-feeyney. 4Cre smoo oddagh ve jeant son my gharey-feeyney, nagh vel mish er n’yannoo ayn? cre’n-fa eisht, tra yeeagh mee dy n’ymmyrkagh eh berrishyn-feeyney, dy dymmyrk eh berrishyn-feeyney feïe? 5Agh nish, tar-jee; insh-ym diu cre nee’m rish my gharey-feeyney: goym ersooyl yn cleiy echey, as bee eh er ny ee seose; as brish-ym sheese yn voalley echey, as bee eh er ny stampey sheese. 6As lhig-ym naardey eh: as cha bee eh er ny phollal, chamoo vees eh er ny rourey; agh ver eh magh dressyn as drineyn: ver-yms ny bodjallyn myrgeddin fo harey, nagh shill ad fliaghey er. 7Son ta lught-thie Israel garey-feeyney Chiarn ny flaunyssee, as ta deiney Yudah yn billey eunyssagh echey: as yeeagh eh son briwnys, agh cur-my-ner tranlaase; son cairys, agh cur-my-ner eam.

8Smerg dauesyn ta cur thie ry hie, as magher ry magher, derrey nagh bee boayl faagit, agh ad dy chummal ooilley cooidjagh orroo hene ayns mean ny cheerey! 9Ayns my chlashtyn’s dooyrt Chiarn ny flaunyssee, Son shickyrys bee ymmodee thieyn treigit, eer thieyn mooar as aalin gyn cummaltagh. 10Dy jarroo nee jeih acreyn dy gharey-feeyney gymmyrkey un bath, as nee rass homer gymmyrkey un ephah.

11Smerg dauesyn ta girree ’sy vadran dy chur-rish jough lajer, as tannaghtyn ayn fud-ny-hoie, derrey ta feeyn dy chur er-rouyl ad! 12As ta’n chlaasagh as y viol, yn tabret as y feddan, as feeyn, ayns nyn guirraghyn agh cha vel geill oc da jannoo yn Chiarn, chamoo t’ad smooinaghtyn er obbyr e laueyn.

13Shen-y-fa ta my phobble er n’gholl ayns cappeeys, er-yn-oyr dy vel ad gyn tushtey; as ta ny deiney oc er n’gholl neeu ’sy ghortey, as ta’n slane pobble oc craghit lesh paays, 14Shen-y-fa ta’n oaie er vooadaghey ee hene, as er vosley e beeal erskyn-towse: as nyn ghloyr, as y slane shiartanse jeu, as nyn mooaralys, as yn er boggyssagh, hed sheese ayn dy cheilley. 15As bee yn kercheen currit sheese, as yn dooinney ooasle ayns stayd treih, as bee sooillyn ny mooaralee er nyn injillaghey. 16Agh bee Chiarn ny flaunyssee er ny ooashlaghey ayns briwnys, as bee yn Jee casherick er ny chasherickey ayns cairys. 17Eisht nee ny eayin gyndyr ayns nyn oayll hene, as jeh ynnydyn treigit ny berchee gowee joarreeyn yn soylley. 18Smerg dauesyn ta tayrn mee-chraueeaght lesh coyrdyn dy ardalys, as peccah myr dy beagh eh lesh tedd cart! 19Ta gra, Lhig da siyr y yannoo, as ve tarroogh mysh e obbyr, dy vod mayd baght ’ghoaill jeh: as lhig da coyrle Fer-casherick Israel tayrn er-gerrey as cheet, dy vod mayd cur-my-ner eh! 20Smerg dauesyn ta genmys olk mie, as mie olk: ta cur dorraghys son soilshey, as soilshey son dorraghys; ta cur sharroo son miljid, as miljid son sherriuid! 21Smerg dauesyn ta creeney ayns ny sooillyn oc hene, as keeayllagh ’sy chilley oc hene! 22Smerg dauesyn ta trean dy iu feeyn, as deiney niartal dy heiy jough veshtyllagh: 23Ta seyrey ny mee-chrauee son leagh, as cassey cairys yn dooinney cairal! 24Shen-y-fa myr ta’n aile stroie yn stubble, as y lossey stroie yn coau, myr shen bee yn fraue oc myr loauid, as hed y blaa oc seose myr y joan; son dy vel ad er n’yiooldey rish leigh Chiarn ny flaunyssee, as dy vel ad er hoiaghey beg jeh goo Yee casherick Israel. 25Shen-y-fa ta corree yn Chiarn er ny oaddey noi e phobble, as t’eh er heeyney magh e laue nyn ’oï, as er woalley ad: myr shen dy row ny croink er-creau, as va ny kirp marroo oc er ny raipey ayns mean ny straïdyn. Son ooilley shoh cha vel e chorree er ny hyndaa ersooyl, agh ta e laue foast er ny heeyney magh.

26As nee eh cowrey-caggee y hroggal seose da ny ashoonyn veih foddey, as nee eh sheidey daue veih’n derrey chione jeh’n thalloo gys y chione elley: as cur-my-ner, hig ad lesh siyr dy tappee. 27Cha bee fer skee ny snapperal ny mast’ oc; cha jig saveenys ny cadley orroo; chamoo vees cryss ny meeghyn oc er ny eaysley, ny kiangley nyn mraagyn er nyn mrishey: 28Ny sideyn oc ta gyere, as ny bowghyn oc lhoobit, bee yngnyn ny cabbil oc myr y chlagh-flint, as ny queeylyn oc myr geay-chassee. 29Bee yn buirroogh oc myr lion, nee ad garveigagh myr lionyn aegey: nee ad buirroogh, as neesht greimmey yn spooilley, as ver ad lhieu ersooyl eh dy sauchey, as cha by-loys da fer erbee ’hauail eh. 30As ayns y laa shen nee ad buirroogh nyn ’oï, myr freaney ny marrey; as my yeeaghys fer stiagh ’sy cheer, ver eh my-ner dorraghys as trimshey; as ta’n soilshey er ny hyndaa gys dorraghys ayns yn aer er-y-skyn.