CAB. L

1Myr shoh ta’n Chiarn dy ghra, Cre vel screeuyn-scarree nyn moir, r’ee ta mee er scarrey? ny rish quoi jeh my yiatteryn ta mee er chreck shiu? Cur-my-ner, she son nyn mee-chraueeaght ta shiu er chreck shiu hene, as son y drogh-yannoo euish ta mee er scarrey rish nyn moir. 2Kys ve, tra haink mee, nagh row dooinney erbee? tra deïe mee, nagh ren fer freggyrt? Vel my laue cha giare shen, nagh voddym livrey? as nagh vel pooar aym dy hauail? cur-my-ner, ec my oghsan ta mee chyrmaghey seose yn aarkey, ta mee chyndaa ny awinyn gys faasagh: ta’n eeast oc breinnaghey laccal ushtey, as goll naardey ’sy chyrmid. 3Ta mee skeayley dullyr er ny niaughyn, as ta mee dy choodaghey ad myr lesh aanrit-sack. 4Ta’n Chiarn Jee er choyrt dou chengey ny fir-ynsee, ry-hoi fys ’ve aym dy loayrt fockle [gerjoilagh] ayns traa cooie dasyn ta seaghnit: moghrey lurg moghrey t’eh dy my ghoostey; t’eh doostey my chleaysh dy chlashtyn myr ny fir-ynsee.

5Ta’n Chiarn Jee er vosley my chleaysh, as cha row mee mee-viallagh, chamoo hyndaa mee ersooyl. 6Heb mee my ghreeym dauesyn ren m’y woalley, as my lieckanyn dauesyn va raipey jee’m yn aasaag; cha dollee mee my eddin veih nearey as shellaghyn.

7Son nee yn Chiarn Jee cooney lhiam; shen-y-fa cha gaill-ym my chree: er-yn-oyr shoh ta mee er hoiaghey my eddin myr y chlagh-flint, as ta fys aym nagh bee oyr nearey orrym. 8T’eshyn er-gerrey ta dy my heyrey; quoi nee streeu rhym? lhig dooin shassoo seose noi-ry-hoi; quoi ta m’oï? lhig da tayrn er-gerrey. 9Cur-my-ner, nee’n Chiarn Jee cooney lhiam; quoi eshyn nee mish y gheyrey? cur-my-ner, nee ad ooilley gaase shenn myr garmad; nee’n lhemeen adsyn y ee.

10Quoi ny-vud eu ta goaill aggle roish y Chiarn, ta biallagh da coraa e harvaant, ta shooyl ’sy dorraghys, as fegooish soilshey? lhig da treishteil ayns ennym y Chiarn, as barrant y choyrt er e Yee. 11Cur-jee my-ner, ooilley shiuish ta greesaghey aile, t’er nyn gruinnaghey mygeayrt lesh smarageyn; shooill-jee ayns soilshey yn aile eu hene, as ny smarageyn ta shin hene er n’oaddey. Shoh ny vees eu veih my laue’s, nee shiu lhie sheese ayns trimshey.