CAB. LI

1Clasht-jee rhym’s, shiuish ta geiyrt da’n ynrickys, shiuish ta shirrey yn Chiarn: jeeagh-jee gys y chreg veih hie shiu er giarey magh, as gys beeal yn ooig veih hie shiu er cleiy. 2Jeeagh-jee gys Abraham nyn ayr, as gys Sarah ren shiu y ymmyrkey: son deïe mee ersyn ny-lomarcan, as vannee mee eh, as ren mee eshyn y vishaghey. 3Son nee’n Chiarn Zion y gherjaghey: nee eh gerjaghey ooilley ny ynnydyn treigit eck, as nee eh yn aasagh eck myr Eden, as yn eaynagh eck myr garey yn Chiarn; bee boggey as gennallys er ny gheddyn ayn, toyrt-booise as coraa dy vingys.

4Eaisht-jee, my phobble, as clasht-jee rhym, O my ashoon: son voym’s hed magh y leigh, as ver-yms er my vriwnys dy hannaghtyn son soilshey da’n pobble. 5Ta my ynrickys er-gerrey; ta my haualtys er n’gholl magh, as nee niart my roihaghyn briwnys y pobble: nee ny ellanyn farkiaght orrym, as er my roih ver ad nyn marrant. 6Trog-jee seose nyn sooillyn gys ny niaughyn, as jeeagh-jee er y thalloo wass; son nee ny niaughyn lheïe ersooyl myr jaagh, as nee’n thalloo gaase shenn myr garmad, as ny cummaltee t’ayn yiow ad baase er yn aght cheddin: agh bee my haualtys son dy bragh, as cha bee my ynrickys er ny leodaghey.

7Clasht-jee rhym, shiuish ta toiggal ynrickys, yn pobble ta my leigh ayns nyn gree; ny gow-jee aggle roish drogh ghoo veih deiney, chamoo jean-jee soiaghey jeh’n oltooan oc. 8Son nee’n lhemeen ad y rassey myr garmad, as nee yn veishteig ad y ee myr ollan: agh bee my ynrickys er son dy bragh, as my haualtys veih sheeloghe gys sheeloghe.

9Trog ort, trog ort, coamree oo hene lesh niart, O roih’n Chiarn; trog ort, myr ayns ny shenn laghyn, ayns ny sheelogheyn t’er n’gholl shaghey. Nagh nee uss eh t’er chraghey Rahab, as er lhottey yn dragon? 10Nagh nee uss eh t’er jyrmagh seose yn aarkey, ushtaghyn y diunid vooar; t’er n’yannoo diunid ny marrey ny raad-vooar son e chloan chionnit dy gholl ny hrooid? 11Shen-y-fa chyndaa-ee adsyn reesht ta’n Chiarn er hauail, as hig ad lesh bingys gys Zion; as bee boggey dy bragh beayn er nyn ghing: cosnee ad gennallys as boggey, as nee trimshey as dobberan lheïe ersooyl. 12Mish, dy jarroo mish eh, ta dy dty gherjaghey: quoi uss, dy beagh aggle ort roish dooinney marvaanagh, as roish mac y dooinney vees myr y faiyr; 13As dy vel oo jarrood yn Chiarn dty Er-croo, eh t’er heeyney magh ny niaughyn, as er hoiaghey undinyn y thallooin; as t’ou er ny ve ayns aggle kinjagh gagh laa, kyndagh rish dewilys y tranlaasagh, myr dy beagh eh aarloo dy stroie? as cre’n erree t’er dewilys y tranlaasagh? 14Ta’n pryssoonagh joarree ayns siyr dy v’er ny eaysley, as nagh voghe eh baase ’sy phryssoon, as nagh jinnagh e arran failleil. 15Agh mish y Chiarn dty Yee, ren rheynn yn aarkey, va ny tonnyn eck freaney: Chiarn ny flaunyssee yn ennym echey. 16As ta mee er choyrt my ghoan ayns dty veeal, as er dty choodaghey ayns scadoo my laue, dy choamrey ny niaughyn, as dy hoiaghey undinyn y thallooin, as dy ghra rish Zion, Uss my phobble.

17Dooisht, dooisht, shass seose, O Yerusalem, t’er n’iu veih laue yn Chiarn cappan e eulys: t’ou uss er n’iu drundin y chappan atchimagh, as er hraastey ad. 18Cha vel fer eck dy chooney lh’ee mastey ooilley ny mec t’ee er n’ymmyrkey; chamoo ta fer dy ghoaill ee er laue, jeh ooilley e cloan t’ee er droggal. 19Ta’n daa olk shoh er jeet ort; quoi vees trimshagh er dty hon? traartys, as toyrt-mow, as yn ghenney, as yn cliwe: quoi liorish nee’m dty gherjaghey? 20Ta dty vec er n’gholl neeal, t’ad nyn lhie ayns king ooilley ny straïdyn myr tarroo feïe ayns ribbey: t’ad lane dy eulys y Chiarn, jeh oghsan dty Yee. 21Shen-y-fa clasht nish rish shoh, uss ta seaghnit, as er-meshtey, agh cha nee lesh feeyn: 22Shoh myr ta dty Hiarn, yn Chiarn, as dty Yee ta pleadeil cooish e phobble, dy ghra, Cur-my-ner, ta mee er n’ghoaill ass dty laue yn cappan atchimagh, eer drundin cappan my eulys; cha n’iu oo jeh arragh: 23Agh ver-yms eh ayns y laue ocsyn ta dy dty heaghney; ta er ghra rish dty annym, Croym sheese, dy vod mayd goll harrish: as t’ou er lhie dty chorp dy ve myr y thalloo, as myr y straïd, dauesyn hie harrish.