CAB. LII

1Dooisht oo, dooisht oo; cur mood dty niart, O Zion; cur mood dty gharmadyn aalin, O Yerusalem, yn ard-valley casherick: veih shoh magh cha jig ny smoo stiagh aynyd’s ny chymmyltee as y neu-ghlen. 2Crie oo hene veih’n joan; trog ort, as soie sheese er dty stoyl-reeoil, O Yerusalem: feayshil geulaghyn dty wannal, O inneen chappee Zion. 3Son myr shoh ta’n Chiarn gra, Ta shiu er ve creckit nastee; as bee shiu er ny chionnaghey reesht fegooish argid. 4Son myr shoh ta’n Chiarn Jee dy ghra, Hie my phobble sheese traa dy row gys Egypt er nyn yoarreeaght; as ren yn Assyrian tranlaase orroo gyn oyr. 5Nish er-y-fa shen, cre t’aym dy yannoo ny-sodjey roo shoh, ta’n Chiarn gra, dy vel my phobble goit ersooyl son veg? T’adsyn ta reill harrystoo coyrt orroo dobberan, ta’n Chiarn dy ghra, as ta my ennym gagh laa dy kinjagh er ny oltooan. 6Shen-y-fa bee enney ec y pobble er my ennym: shen-y-fa yiow ad fys er y laa shen dy nee mish mee hene eh ta loayrt; cur-my-ner, she mish eh.

7Cre cha aalin er ny sleityn ta ny cassyn echeysyn ta coyrt lesh naightyn bannee [yn tushtal], ta preacheil shee, ta coyrt lesh naightyn eunyssagh dy nheeghyn mie, ta fockley-magh saualtys, ta gra rish Zion, Ta dty Yee reill! 8Nee ny arreyderyn ayd’s troggal seose nyn goraa; lesh yn un choraa nee ad kiaulleeaght: son hee ad y cheilley sooill ry sooill, tra ver y Chiarn lesh Zion dy valley reesht.

9Brish-jee magh ayns boggey, gow-jee lesh yn arrane dy cheilley, shiuish ynnydyn faase Yerusalem: son ta’n Chiarn er gherjaghey e phobble, t’eh reesht er livrey Jerusalem: 10Ta’n Chiarn er roostey e roih casherick ayns shilley ooilley ny ashoonee; as nee dy chooilley ard sodjey magh jeh’n theihll cur-my-ner saualtys yn Jee ain.

11Scugh-jee, scugh-jee, reue-jee magh veih shen, ny benn-jee rish yn red neu-ghlen; tar-jee magh veih ny mast’ eck; bee-jee glen ta gymmyrkey siyn y Chiarn. 12Son cha jed shiu magh ayns siyr, ny roie er-chea: son hed y Chiarn rhymbiu; as bee Jee Israel fendeilagh er nyn gooyl.

13Cur-my-ner, nee my harvaant eh-hene y ymmyrkey dy creeney, bee eh er ny ghloyraghey as er ny voylley, as feer ard ayns ooashley. 14Myr va ymmodee goaill yindys jeed; (va e eddin jeant ny s’eajee na eddin dooinney erbee, as e chummey ny smessey na veg jeh cloan gheiney;) 15Myr shen nee eh skeayley yindys harrish ymmodee ashoonyn; bee beïll ny reeaghyn nyn dhost kiongoyrt rish: son nee ad fakin shen nagh row inshit daue, as ver ad my-ner shen nagh row ad er chlashtyn.