CAB. LIII

1Quoi ta er chredjal yn goo ain? as quoi gys ta roih yn Chiarn er ny hoilshaghey? 2Son nee eh gaase seose kiongoyrt rish myr slattag meiygh, as myr fraue ass thalloo sponkit; cha vel stayd ny stoamid ry-akin ayn; as tra hee mayd eh, cha vaik mayd ayn aalid erbee dy ghoaill nyn aigney. 3T’eh beg soit jeh as obbit liorish deiney; dooinney dy hrimshey, as taaghit gys seaghyn: as dollee shin myr dy beagh eh nyn eddinyn veih; v’eh dwoaiagh dooin, as cha ren shin veg y scansh jeh.

4Dy firrinagh t’eh er n’ghoaill er hene nyn aslayntyn, as er n’ymmyrkey nyn drimshey: foast yeeagh shin er myr lourane, fo laue Yee, as seaghnit. 5Agh v’eh guint son ny peccaghyn ainyn, v’eh broojit son nyn loghtyn: va kerraghey yn chee ain ersyn; as liorish ny lhottyn echeysyn ta shin er nyn lheihys. 6Ta shinyn ooilley, myr kirree, er n’gholl er-shaghryn; ta shin er jyndaa dagh unnane ain gys e raad hene; as ta’n Chiarn er lhie ersyn yn loght ain ooilley. 7V’eh tranlaasit, as v’eh seaghnit; foast cha doshil eh e veeal: t’eh er ny leeideil myr eayn gys y skynn; as myr ta keyrrey valloo fo laue e lommyrtagh, myr shen cha doshil eshyn e veeal. 8V’eh er ny ghoaill veih pryssoon as veih briwnys: as quoi nee yn veayntys echey y hoilshaghey? son v’eh giarit jeh veih cheer ny bioee: son loghtyn my phobble’s ren eshyn surranse. 9As ren eh e oaie marish ny mee-chrauee, as marish ny berchee ayns e vaase: er-yn-oyr nagh row eh er n’yannoo aggair erbee, chamoo va molteyrys ry-gheddyn ayns e veeal. 10Foast ve aigney yn Chiarn dy choyrt er surranse; t’eh er laadey eh lesh trimshey: tra nee oo yn annym echey ny oural son peccah, ver eh my-ner e luight, bee e laghyn beayn, as nee taitnys yn Chiarn bishaghey fo e laue. 11Ver eh my-ner seaghyn e annym hene, as bee eh er ny gherjaghey: liorish e hushtey nee my harvaant ynrick ymmodee y heyrey; son nee eh gymmyrkey nyn loghtyn. 12Shen-y-fa ver-yms cronney da mastey ny mooaralee, as nee eh rheynn yn spooilley marish ny treanee; er-yn-oyr dy vel eh er gheayrtey magh e annym gys baase; as v’eh er ny earroo marish ny drogh-yantee: as dymmyrk eh peccaghyn ymmodee, as ren eh lhiasaghey son ny drogh-yantee.