CAB. LIV

1Gow arrane, O ven ghennish, uss nagh ren gymmyrkey cloan; brish magh ayns kiaulleeaght, as eïe dy ard, uss nagh row er-troailt: son ta foddey smoo dy chloan ecksh va treigit na t’ecksh ta sheshey eck, ta’n Chiarn dy ghra. 2Jean mooadaghey ynnyd dty chabbane, as lhig daue sheeyney magh curtanyn dty ynnydyn-vaghee: ny lhaggee dty laue, lhig magh dty choyrdyn, as niartee dty stakyn: 3Son brishee oo magh er y laue yesh as er y laue chiare; as gowee dty luight ny ashoonee myr eiraght, as ver ad cummaltee ayns ny ard-valjyn treigit. 4Ny gow aggle; son cha bee oyr nearey ort: chamoo bee uss er dty chastey; son cha bee oyr nearey ort: son nee oo jarrood nearey dty aegid, as cha gooinee oo ny smoo er oltooan dty stayd-treoghe. 5Son ta dty Er-croo dty ghooinney-poost; (ta’n ennym echey Chiarn ny flaunyssee;) as dty Haualtagh, Fer-casherick Israel; Jee yn slane seihll bee eshyn enmyssit. 6Son ta’n Chiarn er n’eamagh ort reesht, myr ben va treigit as seaghnit ayns spyrryd, as eer myr ben-phoost ayns e aegid, lurg dhyt ve obbit, ta dty Yee gra. 7Son earish yiare ta mee er dty hreigeil: agh lesh myghinyn mooarey nee’m oo y ghoaill stiagh. 8Rish tammylt beg dy chorree hyndaa mee son shallid my eddin voïd; agh lesh kenjallys dy bragh farraghtyn nee’m myghin ort, ta’n Chiarn dty Er-kionnee gra. 9Son ta shoh dooys myr va thooilley Noah: son myr ta mee er vreearrey nagh ragh thooilley Noah ny smoo harrish yn seihll; myrgeddin ta mee er vreearrey nagh beign jymmoosagh dt’oï, ny cur oghsan dhyt. 10Son nee ny sleityn lheïe ersooyl, as bee ny croink er nyn scughey; agh cha jean my chenjallys uss y hreigeil, chamoo vees my chonaant dy hee er ny vrishey, ta’n Chiarn gra, echeysyn ta myghin ort.

11O uss ta seaghnit, ta eiyrit noon as noal lesh y dorrin, as nagh vel er dty gherjaghey, cur-my-ner, neem’s layal dty chlaghyn dy chullyryn aalin, as ny undinyn ayd’s lesh sapphireyn. 12As neem’s ny uinniagyn ayd’s jeh agateyn, as ny giattyn ayd jeh carbuncleyn, as ooilley dty voallaghyn jeh claghyn costal. 13As bee ooilley dty chloan ynsit liorish y Chiarn; as s’mooar vees shee dty chlienney. 14Ayns ynrickys bee oo er dty hickyraghey: bee oo foddey veih tranlaase; son cha bee aggle ort: as bee oo foddey veih atchim; son cha jig eh dty choair. 15Cur-my-ner, bee ad dy jarroo er nyn jaglym cooidjagh, agh cha nee liorym’s: quoi-erbee nee troggal seose ad-hene dt’oï, nee ad tuittym er y choontey ayd’s. 16Cur-my-ner, ta mee er chroo yn gaaue ta sheidey ny smarageyn ’syn aile, as ta bwoalley magh greïe son e obbyr hene: as ta mee er chroo yn stroider dy choyrt mow.

17Greïe-caggee erbee ta troggit dt’oï, cha jig eh lesh; as dy chooilley hengey hroggys dt’oï ayns briwnys nee oo y gheyrey. Shoh eiraght shirveishee yn Chiarn; as ta’n ynrickys oc voym’s, ta’n Chiarn dy ghra.