CAB. LVI

1Myr shoh ta’n Chiarn gra, Freill-jee briwnys, as eiyr-jee da cairys: son ta my haualtys er-gerrey dy laue, as my ynrickys dy ve er ny hoilshaghey. 2S’bannit y dooinney ta jannoo shoh, as mac y dooinney ta goaill greme er; ta freayll yn doonaght veih brishey eh, as freayll e laue veih jannoo aggair.

3Chamoo lhig da mac y joarree, t’er hyndaa gys y Chiarn, gra, Ta’n Chiarn dy bollagh er scarrey mee veih e phobble: chamoo lhig da’n dooinney gennish gra, Cur-my-ner, ta mee my villey creen. 4Son shoh ta’n Chiarn gra rish ny deiney gennish ta freayll my ghooneeyn, as reih ny reddyn shen ta dy my wooiys, as ta goaill greme er my chonaant; 5Dy jarroo dauesyn ver-yms ayns my hie, as er cheu-sthie jeh my voallaghyn, ynnyd as ennym share na jeh mec as inneenyn: ver-yms daue ennym dy bragh farraghtyn, nagh bee er ny yiarey jeh. 6Myrgeddin mec y joarree ta lhiantyn ad-hene gys y Chiarn, dy hirveish eh, as dy choyrt graih da ennym y Chiarn, dy ve e hirveishee, dagh unnane ta freayll yn doonaght veih brishey eh, as ta goaill greme er my chonaant; 7Eer ad shen ver-ym lhiam gys my lieau casherick, as nee’m ad gerjoil ayns my hie dy phadjer; bee soiaghey jeant jeh ny ourallyn-losht as ny chebballyn oc er my altar: son bee my hie’s enmyssit thie dy phadjer son dy chooilley phobble. 8Ta’n Chiarn Jee, ta chaglym cooidjagh eebyrtee Israel, gra, Foast chagl-yms t’ooilley huggey, mâroosyn ta hannah er jeet stiagh huggey.

9Ooilley shiuish vaase y vagheragh, tar-jee dy stroie, dy jarroo, ooilley shiuish veiyn ny keylley. 10Ta ny arreyderyn echey doal; t’ad ooilley mee-hushtagh, t’ad ooilley nyn moddee valloo, cha vod ad gounstyrnee, agh cadley, lhie sheese ayns trome-saveenys. 11Dy jarroo t’ad nyn moddee yollyssagh nagh vel dy bragh dy liooar oc; as t’ad nyn mochillyn gyn tushtey: t’ad ooilley geiyrt er nyn raaidyn hene, dagh unnane lurg e chosney hene veih dy chooilley ard. 12Tar-jee, as adsyn, ver-ym lhiam feeyn as lhieen mayd shin hene lesh jough lajer, as bee mairagh myr y laa jiu, as foddey s’rouanee.