CAB. LVIII

1Yllee dy ard, ny lhig sheese dty ghoo; trog seose dty choraa myr trumpet, as soilshee da my phobble nyn ghrogh-yannoo, as da thie Yacob nyn beccaghyn. 2Foast t’ad shirrey mee gagh laa, as goaill taitnys dy hoiggal my raaidyn, myr ashoon ren geiyrt er ynrickys, as nagh ren treigeil oardaghyn yn Jee oc: t’ad geearree voym oardaghyn dy chairys; t’ad goaill taitnys ayns tayrn er-gerrey da Jee.

3Cre’n-oyr ta shin er drostey, jir adsyn, as cha vel oo cur-my-ner? cre’n-fa ta shin er heaghney nyn annym, as cha vel oo coyrt geill? Cur-my-ner, ayns laa nyn drostey ta soaillid eu, as ta shiu ro ghyere ayns troggal ny feeaghyn eu. 4Cur-my-ner, ta’n trostey eu baarit ayns streeu as argane, as dy woalley lesh y ghoayrn dy hranlaase: cha jean shiu trostey myr er y laa t’ayn jiu, dy vod nyn goraa ve er ny chlashtyn dy ard. 5Nee shoh lheid y trostey as ta mee er reih? laa son dooinney dy heaghney e annym? nee dy chroymmey sheese e chione myr shuin, as dy skeayley aanrit-sack as leoie fo? jean oo genmys shoh ny hrostey, as laa taitnyssagh da’n Chiarn? 6Nagh nee shoh yn trostey ta mee er reih? dy eaysley ny geulaghyn dy vee-chraueeaght, dy eddrymaghey ny erraghyn tromey, as dy chur nyn reamys dauesyn ta tranlaasit, as dy vrishey dy chooilley whing? 7Nagh nee dy rheynn dty arran er ny accryssee, as dy der oo lhiat ny ymmyrchee ta gyn fastee gys dty hie? tra hee oo yn roosteen, dy der oo eaddagh da; as nagh jean oo oo hene y cheiltyn veih dty eill hene?

8Eisht nee dty hoilshey brishey magh myr y voghrey, as nee dty lhaynt dy gerrit cheet er-ash; as bee dty ynrickys er dty chione goll royd, as gloyr y Chiarn goll mayrt er dty chooylloo. 9Eisht nee oo geamagh, as nee yn Chiarn freggyrt; gowee oo padjer, as nee eshyn gra, Ta mee ayns shoh. My scughys oo veih ny mast’ eu yn whing, yn vair dy ghannidys, as drogh ghoan: 10My nee dty chree meiyghey gys ny accryssee, as dy jean oo magh yn annym seaghnit; eisht nee dty hoilshey brishey magh ayns y dullyr, as bee dty ghorraghys myr y vun-laa: 11As nee yn Chiarn oo y leeideil dy kinjagh, as nee eh dty annym y ooraghey ayns y ghortey, as jannoo magh dty chraueyn lesh smuir; as bee oo goll-rish garey ushtit, as myr farrane ushtey ta geill dy kinjagh. 12As nee adsyn hig jeed’s troggal ny shenn tholtanyn: nee oo troggal er undinyn ymmodee sheelogheyn; as bee oo enmyssit Lhiaseyder yn vrishey, dy chiartaghey raaidyn rea gys nyn gummallyn.

13My hyndaa-ys oo dty chass veih cooishyn seihltagh er y doonaght, veih geiyrt da dty aigney hene er my laa casherick; as genmys yn doonaght Laa eunyssagh, Casherick gys y Chiarn, as Onnoroil; as dy der oo ooashley da, gyn geiyrt er dty raaidyn hene, ny shirrey dty haitnys hene, ny cur reamys da dty ghoan hene: 14Eisht gowee oo ard-voggey ayns y Chiarn; as ver-yms ort’s markiaght er ynnydyn ard ny hooirey, as nee’m oo y veaghey marish eiraght Yacob dty ayr: son ta beeal y Chiarn er loayrt eh.