CAB. VI

1Ayns y vleïn hooar ree Uzziah baase, honnick mee yn Chiarn ny hoie er stoyl-reeoil ard as troggit seose, as ren e ghloyr yn chiamble y lhieeney. 2Er-e-skyn hass ny seraphim: er dagh fer jeu va shey skianyn; lesh jees choodee eh e eddin, as lesh jees choodee eh e chassyn, as lesh jees ren eh getlagh. 3As deïe yn derrey yeh gys y jeh elley, gra, Casherick, casherick, casherick ta Chiarn ny flaunyssee; ta’n slane seihll lane jeh e ghloyr. 4As ren essynyn y dorrys craa ec y choraa echeysyn ren geamagh, as va’n thie lhieent lesh jaagh.

5Eisht dooyrt mee, Smerg dooys! cre’n erree hig orrym; er-yn-oyr dy vel mee my ghooinney jeh meillyn neu-ghlen, as ta mee cummal mastey pobble jeh meillyn neu-ghlen: son ta my hooillyn er vakin y Ree, Chiarn ny flaunyssee. 6Eisht ren fer jeh ny seraphim getlagh hym, as smarage yiarg ny laue, v’eh er ghoaill lesh y chlou jeh’n altar; 7As venn eh rish my veeal eh, as dooyrt eh, Cur-my-ner, ta shoh er ventyn rish dty veillyn, as ta dty vee-chairys goit ersooyl, as dty pheccah er ny ghlenney. 8Myrgeddin cheayll mee coraa yn Chiarn, gra, Quoi nee’m y choyrt, as quoi hed er chaghteraght er nyn son? Eisht dooyrt mee, Ta mish ayns shoh; lhig dooys goll.

9As dooyrt eh, Immee as insh da’n pobble shoh, Nee shiu clashtyn dy jarroo, agh cha jean shiu toiggal; as nee shiu fakin dy jarroo, agh cha der shiu tastey. 10Bee cree yn phobble shoh jeant roauyr, as bee far-chlashtyn ayns nyn gleayshyn, as nee ad jeigh nyn sooillyn; er-aggle dy vaik ad lesh nyn sooillyn, as dy glin ad lesh nyn gleayshyn, as dy doig ad lesh nyn gree, as dy bee ad er nyn jyndaa, as er nyn lheihys. 11Eisht dooyrt mee, Hiarn, caïd? As dreggyr eh, Derrey vees ny ard-valjyn naardey fegooish cummaltagh, as ny thieyn fegooish dooinney, as y cheer dy bollagh treigit. 12As dy vel y Chiarn er scughey deiney foddey jeh, as bee traartys vooar ayns mean ny cheerey.

13Agh ga dy bee yn jeihoo ayrn jeu faagit, as dy jean ad chyndaa, bee ad shen son spooilley: myr bun billey-unjin ny darragh, ta’n soo oc ayndoo, tra t’ad tilgey nyn ghuillagyn, shen myr vees yn sluight chrauee ayns y bun echey.