CAB. LXI

1Ta Spyrryd y Chiarn Jee orrym; er-yn-oyr dy vel y Chiarn er m’ooilaghey dy phreacheil naightyn mie da ny imlee: t’eh er my choyrt dy lheihys ny creeaghyn brisht, dy ockley magh reamys da ny cappee, as fosley’n phryssoon da ny geuleydee; 2Dy ockley magh bleïn eunyssagh y Chiarn, as laa yn lhiasaghey veih yn Jee ainyn; dy gherjaghey ooilley ny ta dobberan; 3Dy chur caghlaa dauesyn ta dobberan ayns Zion, dy choyrt daue aalid son leoie, yn ooil dy yennallys son dobberan, coamrey dy voylley son spyrryd dy hrimshey; dy vod ad ve enmyssit Biljyn dy chairys, Plantal y Chiarn, dasyn dy ve er ny ghloyraghey.

4As troggee ad ny shenn tholtanyn, kerree ad traartys ny shenn earishyn, as coamree ad reesht ny ard-valjyn treigit, traartys ymmodee sheelogheyn. 5As nee joarreeyn shassoo as fassaghey ny shioltaneyn eu, as bee mec yn joarree eu son errooyn, as gareyderyn-feeyney. 6As bee shiuish enmyssit saggyrtyn y Chiarn; nee deiney genmys shiu shirveishee yn Jee ain: yiow shiu soylley jeh berchys ny ashoonee, as ayns y ghloyr ocsyn nee shiu boggyssagh.

7Son nyn nearey yiow shiu ooashley dooble, as son nyn oltooan gowee ad boggey ayns nyn gronney: shen-y-fa ayns y cheer oc hene yiow ad eiraght ghaa-wheesh; boggey dy bragh farraghtyn vees nyn gour. 8Son ta mish y Chiarn graihagh er cairys, ta griu vaarlee my ghwoaie son oural-losht; as ver-yms nyn obbyr er y hoshiaght ayns ynrickys, as neem’s conaant dy bragh farraghtyn y yannoo roo. 9As bee yn sluight oc ainjyssagh mastey ny ashoonee, as nyn gynney mastey’n pobble: nee ooilley ny ta fakin ad goaill roo, dy nee ad yn sluight ta’n Chiarn er vannaghey.

10Goyms mooarane boggey ayns y Chiarn, bee my annym gerjoil ayns my Yee: son t’eh er my choamrey lesh ny garmadyn dy haualtys, t’eh er my choodaghey lesh coamrey reeoil dy chairys, myr ta dooinney-poosee soiaghey magh eh-hene lesh coamrey aalin, as myr ta’n ven-phoosee soiaghey magh ee hene lesh e jewellyn. 11Son myr ta’n thalloo coyrt magh blaa, as myr ta ny rassyn ta cuirrit ’sy gharey cheet er-ash; myr shen ver y Chiarn Jee er cairys as moylley dy vlaaghey magh kiongoyrt rish ooilley ny ashoonyn.