CAB. LXIII

1Quoi shoh ta cheet veih Edom, ayns garmadyn gorrym-jiarg veih Bozrah? eh shoh ta gloyroil ayns e choamrey, troailt ayns troshid e niart? Mish eh, ta loayrt ayns ynrickys, niartal dy hauail. 2Cre’n-fa ta dty choamrey’s jiarg, as dty gharmadyn casley rishyn ta stampey ’sy doagh-feeyney? 3Ta mee er stampey yn press-feeyney ny-lomarcan; as jeh’n pobble cha row fer jeu mârym: son nee’m stampey ad sheese ayns my chorree, as ver-ym ad fo-chosh ayns my eulys; as bee’n uill oc spreiht er my gharmadyn, as nee’m ooilley my choamrey y ghaahghey. 4Son ta laa yn lhiasaghey ayns my chree, as ta’n vleïn dy livrey my phobble er jeet. 5As yeeagh mee, as cha row fer erbee dy chooney lhiam; as ghow mee yindys nagh row fer erbee dy niartaghey lhiam: shen-y-fa hug my roih hene lesh livrey-ys hym; as ren my eulys hene niartaghey lhiam. 6As neem’s y pobble y stampey sheese ayns my chorree, as nee’m ad er-meshtey ayns my eulys, as ver-ym lhiam sheese yn niart oc gys y thalloo.

7Neem’s kenjallys-ghraihagh yn Chiarn y hoilshaghey magh, as moylley yn Chiarn, cordail rish ooilley ny ta’n Chiarn er stowal orrin, as y vieys vooar gys thie Israel, t’eh er yiootal orroo cordail rish e vyghinyn, as cordail rish ymmodee e chenjallys ghraihagh. 8Son dooyrt eh, Shickyr she my phobble ad, cloan nagh jean breg: myr shen v’eshyn nyn Saualtagh.

9Ayns yn seaghyn oc va eshyn seaghnit, as ren ainle yn enish echeysyn adsyn y hauail: ayns e ghraih as ayns e erreeish ren eh ad y livrey: as hrog eh ad, as ren eh ad y ymmyrkey ooilley laghyn y chenn earish. 10Agh dirree ad magh n’oï, as vrasnee ad yn Spyrryd casherick echey: shen-y-fa v’eh er ny hyndaa dy ve nyn noid, as hass eh nyn ’oï. 11Eisht chooinee eh er laghyn y chenn earish, er Moses as e phobble, gra, Cre vel eshyn hug lesh ad seose ass yn aarkey liorish bochilley e hioltane? cre vel eshyn hug e Spyrryd casherick er cheu-sthie jeh? 12Ren ad y leeideil liorish laue yesh Voses lesh e roih gloyroil, scarrey ny ushtaghyn rhymboo, dy chosney da hene ennym dy bragh farraghtyn? 13Ren adsyn y leeideil trooid y diunid, myr cabbyl ayns yn aasagh, nagh jinnagh ad snapperal? 14Myr ta baagh goll sheese gys y choan, hug Spyrryd y Chiarn fea da; myr shen ren uss dty phobble y leeideil, dy yannoo dhyt hene ennym gloyroil.

15Jeeagh neose veih niau, as cur-my-ner veih ynnyd dty chasherickys as dty ghloyr: cre vel dty ghraih’s jeean as dty niart, slane erreeish dty chree as dty vyghinyn? vel ad er nyn lhiettal voym? 16Shickyr uss yn ayr ain, ga nagh vel toiggal ec Abraham j’in, as nagh vel Israel goaill rooin: uss, O Hiarn, nyn Ayr, nyn Saualtagh, ta dty ennym er-dy-rieau.

17Cre’n-fa t’ou uss, O Hiarn, er lhiggey dooin goll er-shaghryn veih dty raaidyn, as er chreoghey nyn greeaghyn noi dty aggle? Chyndaa reesht er graih dty harvaantyn, sheelogheyn dty eiraght. 18Cha row eh agh son traa giare eiraght dty phobble’s casherick: ta nyn noidyn er stampey sheese dty ynnyd casherick. 19Lhiat’s ta shin: cha row adsyn rieau fo dty reill; cha row yn ennym ayd’s cowrit orroosyn.