CAB. LXV

1Ta mee er my hoilshaghey dauesyn nagh row dy my hirrey; ta mee er my gheddyn magh lioroosyn nagh ren briaght my yeï: dooyrt mee, Cur-jee my-ner, cur-jee my-ner, rish ashoon nagh row enmyssit orrym. 2Ta mee er heeyney magh my laueyn fey-ny-laa gys pobble mee-viallagh, ta gimmeeaght ayns raad nagh row mie, lurg ny smooinaghtyn oc hene; 3Pobble ta dy my vrasnaghey gys corree dy kinjagh gys my eddin; ta ouralley gys nyn yallooyn ayns ny garaghyn, as lostey incense er altaryn dy vreek; 4Ta tannaghtyn fud ny oaiaghyn, as taaghey lhiaghtyn ny merriu; ta gee feill vee-lowit; as ta an-vroie cretooryn dwoaiagh ayns ny siyn oc; 5Ta gra, Shass ort hene, ny tar my choair; son ta mee ny s’casherick na uss. T’ad shoh myr jaagh my eulys, aile ta lostey fey-ny-laa. 6Cur-my-ner, te scruit kiongoyrt rhym; cha bee’m my host, agh goym cooilleeney, eer slane cooilleeney ayns nyn oghrish, 7Yn vee-chairys eu hene, ta’n Chiarn dy ghra, as mee-chairys nyn ayraghyn ry-cheilley, t’er lostey incense er ny sleityn, as er loayrt goan mollaghtagh m’oï er ny croink: shen-y-fa ver-yms daue slane towse nyn shenn obbraghyn ayns nyn oghrish.

8Shoh myr ta’n Chiarn dy ghra, Myr ta’n feeyn noa er ny gheddyn ’sy dhossan, as jir fer, Ny stroie eh; son ta bannaght ayn: myr shen neem’s er graih my harvaantyn, nagh stroie-ym ad ooilley. 9As ver-ym lhiam sluight magh ass Jacob, as magh ass Judah eirey ny sleityn aym’s: shoh vees eiraght my vooinjer reiht, as nee my harvaantyn cummal ayns shen. 10As bee Sharon bwoaillee dy hioltaneyn, as coan Achor ynnyd da ny shellooyn dy ghoaill nyn aash ayn, ec my phobble t’er vriaght my yeï. 11Agh shiuish adsyn ta treigeil y Chiarn, ta jarrood my lieau’s casherick, ta gaarlagh boayrd da’n cheshaght shen, as jannoo magh oural-feeyney da’n earroo shen. 12Shen-y-fa neem’s shiuish y earroo gys y chliwe, as nee shiu ooilley croymmey gys y toyrt-mow: son tra deïe mee, cha ren shiu freggyrt; tra loayr mee, cha ren shiu clashtyn; agh ren shiu olk roish my hooillyn, as ghow shiu myr reih shen nagh by-haittin lhiam. 13Shen-y-fa shoh myr ta’n Chiarn dy ghra, Cur-my-ner, nee my harvaantyn gee, agh bee shiuish accryssagh: cur-my-ner, nee my harvaantyn giu, agh bee shiuish paagh: cur-my-ner, nee my harvaantyn goaill boggey, agh bee shiuish fo nearey: 14Cur-my-ner, gowee my harvaantyn arrane son boggey nyn gree, agh nee shiuish coe son trimshey nyn gree, as dobberan son sproght nyn spyrryd. 15As faagee shiu nyn ennym son mollaght da my vooinjer reiht: son nee yn Chiarn uss y stroie, as cowree eh e harvaantyn liorish ennym elley: 16Dy jean eshyn ta bannaghey eh-hene er y thalloo, eh-hene y vannaghey ayns Jee yn ynrickys; as eshyn ta loo er y thalloo, nee eh loo liorish Jee yn ynrickys; er-yn-oyr dy vel yn chenn seaghyn jarroodit, as dy vel ad keillit veih my hooillyn. 17Son cur-my-ner, ta mee croo niaughyn noa, as thalloo noa: cha bee cooinaghtyn er yn seihll va roïe, as cha jig eh ayns my aigney. 18Agh bee shiuish gennal as gow-jee boggey son dy bragh ayns shen ta mee dy chroo: son cur-my-ner, ta mee croo Jerusalem ny voayl eunyssagh, as yn pobble eck boggey. 19As goyms boggey ayns Jerusalem, as bee’m jeh gien mie ayns my phobble: as cha bee yn coraa dy hrimshey ny-sodjey er ny chlashtyn aynjee, ny’n coraa dy ghobberan. 20Cha bee maghey shen oikan dy laghyn, ny shenn ghooinney nagh vel er n’yannoo magh laghyn e vea: son yiow yn lhiannoo baase ec keead bleïn dy eash; agh bee yn drogh-yantagh jeh keead bleïn er ny gheyrey. 21As troggee ad thieyn, as cummee ad ayndoo; as nee ad soiaghey garaghyn, as gee jeh’n vess oc. 22Cha jean adsyn troggal, as fer elley cummal ayn; cha jean ad soiaghey, as fer elley gee jeh: son myr laghyn billey ta laghyn my phobble, as yiow my chloan reiht soylley beayn jeh obbyr nyn laueyn. 23Cha jean ad laboragh ayns fardail, ny cur son y theihll lesh arkys: son t’ad sluight pobble bannee yn Chiarn, as cloan nyn glienney mâroo. 24As hig eh gy-kione, roish my jean adsyn geamagh, dy jean-yms freggyrt; as choud as t’ad foast loayrt, neem’s clashtyn. 25Nee yn moddey-oaldey as yn eayn gyndyr cooidjagh, as nee yn lion gee coonlagh myr dow: as joan vees beaghey yn ard-nieu. Cha jean ad skielley ny aggair ayns ooilley my lieau’s casherick, ta’n Chiarn dy ghra.