CAB. LXVI

1Myr shoh ta’n Chiarn dy ghra, Ta niau my stoyl-reeoil, as y thalloo stoyl my choshey: c’raad ta’n thie hroggys shiu dooys? as cre raad ta ynnyd y fea aym? 2Son dy chooilley nhee jeu shoh ooilley ta my laue hene er chummey, as liorym’s ta ooilley ny reddyn shoh tannaghtyn, ta’n Chiarn dy ghra: agh gys y dooinney shoh neem’s jeeaghyn, dy jarroo dasyn ta boght as dy chree arryssagh, as arrymagh da my ghoo. 3Ta eshyn ta marroo dow myr dy marragh eh dooinney; eshyn ta ouralley eayn, myr eshyn ta chebbal kione moddey; eshyn ta chebbal oural, goll-rishyn hebbagh fuill muickey; eshyn ta lostey incense, myr eshyn ta ooashlaghey jalloo: dy jarroo, t’ad er reih ny raaidyn oc hene, as ta’n annym oc goaill taitnys ayns nyn obbraghyn dwoaiagh. 4Faag-yms ad myrgeddin fo yn shaghrynys oc hene, as ver-ym lhiam nyn aggle orroo; er-yn-oyr tra deïe mee, nagh ren fer hene freggyrt; tra loayr mee, cha ren ad clashtyn: agh ren ad olk roish my hooillyn, as reih ad shen nagh ghow mee taitnys ayn.

5Clasht-jee rish goo yn Chiarn, shiuish ta craa ec y ghoo; dooyrt nyn mraaraghyn hug dwoaie diu, as hilg magh shiu er graih my ennym’s, Lhig da’n Chiarn v’er ny ghloyraghey: agh hig eshyn kionfenish gys y gherjagh euish, as bee adsyn er nyn naaraghey. 6Feiyr tharmane veih’n ard-valley, coraa veih’n chiamble, coraa yn Chiarn ta goaill cooilleeney er e noidyn. 7Roish my row ee er-troailt, ren ee gymmyrkey magh; roish my daink yn pian eck, hug ee lhiannoo-mac son y theihll. 8Quoi t’er chlashtyn lheid y skeeal? quoi t’er vakin lheid ny reddyn? Vod y thalloo gymmyrkey ayns un laa? ny ashoon ve ruggit ’sy tullogh? son cha leah’s va Zion er-troailt, hug ec son y theihll e cloan. 9Der-ym lhiam gys y chennar, as lhiettal yn ymmyrkey? ta’n Chiarn dy ghra: ny dooney seose yn vreïn ta coyrt son y theihll? ta dty Yee dy ghra. 10Gow-jee boggey marish Jerusalem, as bee-jee gennal mâree, ooilley shiuish ta graihagh urree; gow-jee ard-gherjaghey mâree, ooilley shiuish ta dobberan er e son: 11Dy vod shiu jiole, as ve jeant magh lesh keeaghyn yn gherjagh eck; dy vod shiu blieauin, as goaill nyn soylley ayns ymmodee e gloyr. 12Son myr shoh ta’n Chiarn dy ghra, Cur-my-ner, sheeyn-yms magh shee urree goll-rish awin, as gloyr ny ashoonyn myr slane thooilley roie: eisht nee shiu jiole; rish y lhiattee ecksh bee shiu troggit, as er nyn moandyrys er e glioonyn. 13Goll-rishyn ta e voir dy gherjaghey, myr shen neem’s shiuish y gherjaghey; as bee shiu er nyn gherjaghey ayns Jerusalem. 14As lurg diu shoh y akin, gowee yn cree eu boggey, as nee ny craueyn eu blaaghey myr losserey; as bee laue yn Chiarn cronnal gys e hirveishee, as e yymmoose er e noidyn. 15Son cur-my-ner, hig y Chiarn lesh aile, as lesh e ainee myr geay-chassee, dy chooilleeney e yymmoose lesh eulys, as e oghsan lesh lossaghyn ailey. 16Son liorish aile as y chliwe nee yn Chiarn pleadeil rish dy chooilley eill: as bee merriu yn Chiarn ymmodee. 17Adsyn ta casherickey as sheayney ad-hene ayns ny garaghyn, cooyl un villey ayns y vean, gee feill vee-lowit, as yn red dwoaiagh, as y lugh, vees er nyn goyrt-mow cooidjagh, ta’n Chiarn dy ghra. 18Son shione dou ny obbraghyn as ny smooinaghtyn oc: hig eh gy-kione, dy jean-yms chaglym dy chooilley ashoon as glare; as hig ad, as ver ad my-ner my ghloyr. 19As soie-yms cowrey orroo, as ver-ym ny scapailtee jeu gys ny ashoonyn, gys Tarshish, Pul, as Lud, ta tayrn y vhow, gys Tubal as Javan, gys ny ellanyn foddey jeh, nagh vel er chlashtyn my ghoo, chamoo er vakin my ghloyr; as nee ad soilshaghey my ghloyr mastey ny ashoonee. 20As ver ad lhieu ooilley nyn mraaraghyn son chebbal da’n Chiarn, ass dy chooilley ashoon, er cabbil, as ayns fainee, as er carriads, as er muleyn, as er maase bieau, gys my lieau’s casherick Jerusalem, ta’n Chiarn dy ghra, myr ta cloan Israel coyrt lhieu oural ayns saagh glen gys thie yn Chiarn. 21As goym’s jeusyn son saggyrtyn, as Leviteyn, ta’n Chiarn dy ghra. 22Son ’naght myr nee ny niaughyn noa as y thalloo noa, neem’s y chroo, tannaghtyn kiongoyrt rhym, ta’n Chiarn dy ghra, myr shen nee yn sluight as yn ennym euish tannaghtyn. 23As hig eh gy-kione, veih un eayst-noa gys eayst-noa elley, as veih doonaght dy doonaght, dy jig dy chooilley eill dy choyrt ooashley kiongoyrt rhym, ta’n Chiarn dy ghra. 24As hed ad magh, dy yeeaghyn er kirp marroo ny deiney t’er n’irree-magh m’oï; son cha vow yn veishteig oc baase, chamoo vees yn aile oc er ny vooghey; as bee ad dwoaiagh da dy chooilley chretoor.