CAB. I

1Jamys sharvaant Yee as nyn Jiarn Yeesey Creest, gys y daa heeloghe jeig ta skeaylt fud y theihll, bea as slaynt. 2My vraaraghyn, jeeagh-jee er myr oyr dy ard-voggey tra huittys shiu ayns caghlaaghyn dy heaghyn; 3Toiggal shoh, dy vel prowal nyn gredjue gobbraghey meenid. 4Agh cur-jee slane raad da meenid dy yannoo e obbyr hene, dy vod shiu ve slane ynrick, gyn ve ergooyl ayns nhee erbee. 5My ta veg euish feme creenaght, lhig da geearree er Jee, ta coyrt dy feoilt da dy chooilley ghooinney, as nagh vel mooaraghey, as bee eh er ny choyrt da. 6Agh lhig da geearree ayns credjue, fegooish leaystey; son t’eshyn ta leaystey [’sy chredjue] goll-rish tonn ny marrey, immanit lesh y gheay noon as noal. 7Son ny lhig da’n dooinney shen smooinaghtyn dy vow eh nhee erbee veih’n Chiarn. 8Ta dooinney dy aigney ghooble neu-hickyr ayns ooilley e raaidyn. 9Lhig da’n braar jeh stayd injil goaill boggey ayns dy vel eh er ny hroggal seose; 10Agh y verchagh ayns dy vel eh er ny injillaghey; son myr blaa yn aiyr nee eh lheïe ersooyl. 11Son cha vel y ghrian ny sleaie er n’irree lesh chiass loshtee, agh t’ee fioghey yn faiyr, as ta’n blaa echey tuittym, as aalid yn chummey echey goll naardey: myr shen myrgeddin nee yn dooinney berchagh shymley ersooyl ayns e raaidyn. 12S’maynrey yn dooinney ta gymmyrkey fo seaghyn; son tra vees eh er ny phrowal, yiow eh yn attey dy vea, ta’n Chiarn er ghialdyn dauesyn ta graihagh er. 13Ny lhig da dooinney erbee gra tra t’eh er ny violaghey, Ta mee miolit liorish Jee: son ta Jee erskyn miolagh gys olk, chamoo t’eh miolaghey dooinney erbee. 14Agh ta dagh dooinney miolit, tra t’eh er ny hayrn ersooyl liorish e haynt hene, as cleaynit. 15Eisht tra ta saynt er ghientyn, t’eh gymmyrkey magh peccah: as ta peccah, tra te cooilleenit, gymmyrkey magh baase. 16Ny bee-jee mollit, my chaarjyn ghraihagh. 17Ta dy chooilley ghioot mie, as dy chooilley ghioot firrinagh veih’n yrjey, as cheet neose veih Ayr y toilshey, mârish nagh vel caghlaa erbee, ny scadoo dy hyndaa. 18Jeh e aigney hene ren eh shinyn y gheddyn, liorish goo ny firrinys, dy voddagh shin ve myr ny chied-vessyn jeh e chretooryn. 19Shen-y-fa, my vraaraghyn ghraihagh, lhig da dy chooilley ghooinney ve arryltagh dy chlashtyn, liastey dy loayrt, moal gys corree: 20Son cha vel corree dooinney gobbraghey cairys Yee. 21Shen-y-fa cur-jee dy lhiattee dy chooilley neu-ghlennid, as rouyr dy olkys, as gow-jee lesh meenid yn goo ta fraueit ayndiu, ta fondagh dy hauail nyn anmeenyn. 22Agh bee-jee shiuish jeantee jeh’n goo, as cha nee ny-lomarcan clashtyn rish, molley shiu hene. 23Son my ta fer erbee ta clashtyn y goo, as gyn dy yannoo eh, t’eh casley rish dooinney cur-my-ner yn eddin dooghyssagh echey ayns gless. 24Son yeeagh eh er hene, as hie eh roish, as chelleeragh yarrood eh cre’n keint dy ghooinney v’eh. 25Agh quoi-erbee ta jeeaghyn dy dowin ayns leigh yn seyrsnys firrinagh, as tannaghtyn ayn; nagh vel jarrood ny t’eh dy chlashtyn, agh fer ta jannoo yn obbyr, bee’n dooinney shoh bannit ayns e yannoo. 26My ta dooinney erbee nyn mast’ eu ta ayns fakin dy ve crauee, as nagh vel smaghtaghey e hengey, agh molley yn cree echey hene, ta craueeaght yn dooinney shoh fardail. 27Craueeaght firrinagh as glen kiongoyrt rish Jee, dy jarroo yn Ayr, shoh eh, Dy ghoaill kiarail jeh cloan gyn ayr as mraane-treoghe ayns nyn seaghyn, as dy reayll eh hene glen veih broïd y theihll.