CAB. II

1My vraaraghyn, ny lhig da credjue nyn Jiarn gloyroil Yeesey Creest ve eu, jannoo soiagh jeh persoonyn deiney. 2Son my ta cheet stiagh ’sy whaiyl eu dooinney lesh fainey airh, ayns coamrey seyr, as dy jig stiagh myrgeddin dooinney boght ayns drogh choamrey; 3As dy vel shiu goaill tastey jehsyn ta ceau yn coamrey mie, as gra rish, Soie uss ayns shoh ayns ynnyd ooasle; as gra rish y voght, Shass uss ayns shid, ny, soie ayns shoh fo stoyl my choshey: 4Cha vel shiu eisht jannoo briwnys kiart nyn mast’ eu hene, agh jannoo shiu hene briwnyn neu-chorrym. 5Toig-jee, my vraaraghyn ghraihagh, Nagh vel Jee er reih boghtyn y theihll shoh, berchagh ayns credjue, as eiraghyn y reeriaght t’eh er ghialdyn dauesyn ta graihagh er? 6Agh ta shiuish er hoiaghey beg jeh ny boghtyn. Nagh vel ny berchee jannoo tranlaase erriu, as tayrn shiu fenish stuill-vriwnys? 7Nagh vel ad goltooan yn ennym ooasle shen ta enmyssit erriu? 8My ta shiu cooilleeney yn leigh reeoil, cordail rish y scriptyr, Ver oo graih da dty naboo myr dhyt hene, ta shiu jannoo dy mie. 9Agh my ta shiu jannoo soiagh jeh persoonyn, ta shiu jannoo peccah, as ta shiu deyrit liorish y leigh myr drogh-yantee. 10Son quoi-erbee nee freayll yn slane leigh, as ny-yeih ta foiljagh ayns un phoint, t’eh kyndagh jeu ooilley. 11Son eshyn dooyrt, Ny jean poosey vrishey; dooyrt myrgeddin, Ny jean dunverys. Nish ga nagh vel oo brishey poosey, ny-yeih my t’ou dunverys, t’ou brishey’n leigh. 12Myr shen loayr-jee, as myr shen jean-jee, myr adsyn vees er nyn mriwnys liorish y leigh dy reamys [Creestee]. 13Son yiow eshyn briwnys dyn myghin, nagh vel er hoilshaghey myghin; as ta myghin boggyssagh harrish briwnys. 14Cre sheeagh eh, my vraaraghyn, da dooinney dy ghra dy vel credjue echey, as nagh vel obbraghyn echey? vod credjue y hauail eh? 15My ta braar ny shuyr rooisht, ny feme beaghey gagh-laa; 16As unnane eu dy ghra roo, Immee-jee reue ayns shee, dy row fastee as beaghey eu: as nagh vel shiu coyrt daue ny reddyn shen ta ymmyrchagh da’n chorp; cre-woad share ad? 17Eer myr shen credjue, mannagh vel obbraghyn goll mârish, te dyn vree ny-lomarcan. 18Agh foddee fer gra, Ta credjue ayd’s, as ta obbraghyn aym’s: jeeagh dooys yn credjue ayd’s fegooish dty obbraghyn, as jeeagh-yms dhyt’s yn credjue aym’s liorish my obbraghyn. 19T’ou credjal dy vel un Jee ayn; t’ou jannoo dy mie: ta ny drogh-spyrrydyn hene credjal, as er-creau. 20Agh nailt fys ’ve ayd, O ghooinney ardalagh, dy vel credjue fegooish obbraghyn marroo? 21Nagh row Abraham nyn ayr er ny heyrey liorish obbraghyn, tra v’eh er n’ouralley e vac Isaac er yn altar? 22Nagh vaik oo kys ren credjue niartaghey lesh e obbraghyn, as liorish obbraghyn va slane mullagh er credjue? 23As va’n scriptyr er ny chooilleeney ta gra, Chred Abraham Jee, as ve coontit da son cairys: as v’eh enmyssit carrey Yee. 24Hee shiu eisht kys dy nee liorish obbraghyn ta dooinney er ny heyrey, as cha nee liorish credjue ny-lomarcan. 25Myrgeddin neesht, nagh row Rahab yn ven-oast er ny heyrey liorish obbraghyn, tra v’ee er n’ghoaill stiagh ny chaghteryn, as er choyrt magh ad raad elley? 26Son myr ta’n corp fegooish y spyrryd marroo, myr shen ta credjue fegooish obbraghyn marroo myrgeddin.