CAB. III

1My vraaraghyn, ny shir-jee dy ve ymmodee fir-ynsee, toiggal [liorish shoh] dy bee mayd ny s’gyere er nyn mriwnys. 2Son ayns ymmodee reddyn ta shin ooilley foiljagh. My ta dooinney erbee nagh vel foiljagh ayns e ghlare, ta’n fer cheddin ny ghooinney ynrick, as abyl myrgeddin dy reayll yn slane corp fo smaght. 3Cur-my-ner ta shin coyrt streeanyn ayns beïll ny cabbil, dy bee ad beasagh dooin; as ta shin reill yn slane corp oc. 4Cur-jee my-ner neesht ny lhongyn, ga dy vel ad wheesh, as er ny imman lesh geayghyn niartal, foast t’ad er ny hyndaa mygeayrt lesh stiurey beg fardalagh, raad saillish yn mainshter. 5Myr shen ta’n chengey ny olt beg, as boggyssagh reddyn mooarey. Cur-my-ner, cre’n lossey mooar ta drillin dy aile foaddey! 6As ta’n chengey ny aile, seihll dy vee-chairys: myr shen ta’n chengey mastey ny oltyn ain, dy vel ee mhilley yn slane corp, as cur yn seihll bun-ry-skyn; as t’ee soit er aile liorish niurin. 7Son ta dy chooilley ghooghys dy veïyn, as dy eeanlee, as dy ard-nieughyn, as reddyn ayns yn aarkey, er ny veenaghey, as er ny ve jeant meen liorish deiney: 8Agh y chengey cha vod dooinney erbee y smaghtaghey; t’ee olk mee-reiltagh, lane dy physhoon baasoil. 9Lesh ta shin bannaghey Jee, dy jarroo yn Ayr; as lesh ta shin gweeaghyn da deiney, ta jeant lurg caslys Yee. 10Ass yn un veeal ta cheet bannaght as mollaght. My vraaraghyn, cha lhisagh ny reddyn shoh ve myr shen. 11Vel farrane cur magh ass yn un gheill ushtey millish as sharroo? 12Vod y billey-figgagh, my vraaraghyn, gymmyrkey berrishyn-olive? ny billey-feeyney figgyn? myr shen cha vod farrane erbee cur magh ushtey sailjey as oor? 13Quoi ta ny ghooinney creeney as tushtagh ny mast’ eu? lhig da soilshaghey, liorish ymmyrkey mie, e obbraghyn ayns y veenid dy chreenaght. 14Agh my ta eu myskid sharroo as streeu ayns nyn greeaghyn, ny jean-jee boggyssagh, as ny jean-jee breg noi’n irriney. 15Cha vel y chreenaght shoh cheet neose veih’n yrjey, agh te thallooinagh, beishtagh, niurinagh. 16Son raad ta troo as streeu, ayns shen ta anvea, as dy chooilley ghrogh obbyr. 17Agh y chreenaght ta veih’n yrjey t’ee hoshiaght glen, eisht sheeoil, meen, as aashagh dy ve coyrlit, lane dy erreeish as dy vessyn mie, fegooish neu-chorrymid, as fegooish craueeaght-oalsey. 18As ta’n mess dy ynrickys er ny chuirr ayns shee dauesyn ta cur rish shee.