CAB. IV

1Cre voish ta cheet caggaghyn as streeughyn nyn mast’ eu? nagh vel ad cheet veih shoh, dy jarroo veih nyn sayntyn, ta caggey ayns nyn oltyn? 2Ta shiu cur saynt, as cha vel eu: ta shiu dunverys, as dy jeean geearree dy gheddyn, as cha vel eh cheet lhieu: ta shiu streeu as caggey, ny-yeih cha vel shiu cosney, er-yn-oyr nagh vel shiu shirrey. 3Ta shiu geearree as cha vel shiu geddyn, er-y-fa dy vel shiu geearree ass y raad, dy vod shiu y vaarail eh er ny sayntyn eu hene. 4Shiuish gheiney as vraane maarderee [spyrrydoil], nagh vel fys eu dy vel caarjys y theihll noidys rish Jee? quoi-erbee er-y-fa shen saillish ve ny charrey da’n seihll, t’eh noid Yee. 5Vel shiu smooinaghtyn dy vel y scriptyr gra ayns fardail, Ta’n spyrryd ta cummal aynin greinnaghey gys troo? 6Agh t’eh coyrt ny smoo dy ghrayse: shen-y-fa t’eh gra, Ta Jee cur eddin da ny mooaralee, as coyrt grayse dauesyn ta imlee. 7Jean-jee shiu hene y injillaghey er-y-fa shen gys Jee; shass-jee seose noi’n drogh-spyrryd, as ver eh cooyl diu: 8Tayrn-jee er-gerrey gys Jee, as tayrnee eshyn er-gerrey diuish: niee-jee nyn laueyn, shiuish pheccee, as glen-jee nyn greeaghyn, shiuish dy aigney ghooble. 9Bee-jee seaghnit, as jean-jee dobberan as keayney: lhig da’n gharaghtee eu ve chyndaït gys dobberan, as y reaïd eu gys trimshey. 10Bee-jee er nyn injillaghey ayns shilley’n Chiarn, as troggee eh shiu seose. 11Ny loayr-jee olk yn derrey yeh jeh’n jeh elley, vraaraghyn. Eshyn ta goltooaney e vraar, as briwnys e vraar, t’eh goltooaney yn leigh, as briwnys y leigh: agh my t’ou briwnys y leigh, cha vel oo cooilleeney’n leigh, agh jannoo oo hene dty vriw. 12Ta un er ayn ta bun y leigh, echey ta pooar dy hauail, as dy stroie: quoi oo hene ta briwnys fer elley? 13Tar-jee nish, shiuish ta gra, Jiu ny mairagh hem mayd gys lheid yn ard-valley, as fuirree mayd ayn bleïn, kionnaghey as creck, as jannoo vondeish: 14Ayns wheesh as nagh vel fys eu cre vees er laa-ny-vairagh. Son cre ta nyn mea? Te dy jarroo myr gall ta ry-akin son shallid, as eisht lheïe ersooyl. 15Son shoh lhisagh shiu gra, My saillish y Chiarn, as bea sodjey ’ve ain, nee mayd shoh ny shid. 16Agh nish ta shiu goaill taitnys ayns y voggyssagh eu: ta ooilley lheid y voggyssagh peccoil. 17Shen-y-fa eshyn ta fys echey dy yannoo mie, as nagh vel dy yannoo eh, dasyn te peccah.