CAB. I

1Goan Yeremiah mac Hilkiah, jeh ny saggyrtyn va ayns Anathoth, ayns cheer Venjamin: 2Huggeysyn haink goo yn Chiarn rish lhing Yosiah mac Amon ree Yudah, ayns y trass vleïn jeig jeh e reill. 3Haink eh myrgeddin rish lhing Yehoiakim mac Yosiah ree Yudah, gys jerrey yn un vleïn jeig dy Zedekiah mac Yosiah ree Yudah, derrey cappeeys Yerusalem ’sy wheiggoo vee. 4Eisht haink goo yn Chiarn hym, gra, 5Roish my ren mee dty chummey ’sy volg bione dou uss; as my daink oo magh ass y vreïn ren mish oo y chasherickey; as doardee mee uss dy ve phadeyr da ny ashoonyn. 6Eisht dooyrt mee, Ah, Hiarn Yee! cur-my-ner, cha voddym loayrt roo, son cha vel mee agh scollag.

7Agh dooyrt y Chiarn rhym, Ny abbyr, Cha vel mee agh scollag: son hed oo hucsyn ooilley ver-ym oo er chaghteraght, as cre-erbee ver-yms er dty churrym, shen loayrys oo. 8Ny bee aggle ort roish yn eddin oc: son ta mish mayrt dy dty livrey, ta’n Chiarn dy ghra. 9Eisht hug y Chiarn magh e laue, as venn eh rish my veeal, as dooyrt y Chiarn rhym, Cur-my-ner, ta mee er choyrt my ghoan ayns dty veeal. 10Jeeagh, ta mee jiu er hoiaghey oo harrish ny ashoonyn, as harrish ny reeriaghtyn, dy astyrt ass ny fraueyn, as dy raipey sheese, as dy stroie, as dy lhieggal, dy hroggal, as dy hoiaghey.

11Ny-sodjey, haink goo’n Chiarn hym, gra, Yeremiah, cre t’ou fakin? As dooyrt mee, Ta mee fakin slatt dy villey-almond. 12Eisht dooyrt y Chiarn rhym, T’ou er n’akin cowrey mie: son nee’m siyr er my ghoo dy chooilleeney eh. 13As haink goo yn Chiarn hym yn nah cheayrt, gra, Cre t’ou fakin? As dreggyr mee, Ta mee fakin pot aarlee, as te soit lesh y twoaie. 14Eisht dooyrt y Chiarn rhym, Ass y twoaie nee olk brishey magh er ooilley cummaltee’n cheer. 15Son cur-my-ner, neem’s geamagh er ooilley cummaltee reeriaghtyn y twoaie, ta’n Chiarn dy ghra; as hig ad, as nee ad soiaghey dagh fer jeu e stoyl-reeoil eddyr giattyn Yerusalem, as noi ooilley e voallaghyn cruin mygeayrt, as noi ooilley ard-valjyn Yudah. 16As neem’s my vriwnyssyn y ockley magh noi oc son ooilley yn vee-chraueeaght ocsyn, t’er my hreigeil, as er lostey incense da jeeghyn elley, as er choyrt ooashley da obbraghyn nyn laueyn hene.

17Jean uss er-y-fa shen dty veeghyn y chryssey seose, trog ort, as loayr roo ooilley ny ta mee coyrt ayns sarey dhyt: ny bee aggle ort roish yn eddin oc, er-aggle dy jean-ym uss y stroie kiongoyrt roo. 18Son cur-my-ner, ta mee er n’yannoo uss jiu ard-valley fencit, as pillar yiarn, as voallaghyn prashey, noi’n slane cheer; noi reeaghyn Yudah, noi e princeyn, noi ny saggyrtyn eck, as noi pobble y cheer. 19As nee ad caggey dt’oï, agh cha vow ad yn varriaght ort; son ta mish mayrt, ta’n Chiarn dy ghra, dy dty livrey.