CAB. XI

1Yn goo haink gys Jeremiah veih’n Chiarn, gra, 2Clasht-jee goan y chonaant shoh, as loayr rish deiney Yudah, as rish cummaltee Yerusalem; 3As abbyr uss roo, Myr shoh ta’n Chiarn Jee Israel dy ghra, Dy row mollaght er y dooinney nagh vel biallagh da goan y chonaant shoh, 4Shen hug mee ayns currym da nyn ayraghyn ’sy laa hug mee lhiam magh ad veih cheer Egypt, veih’n choirrey yiarn, gra, Bee-jee biallagh da goan my choraa, as jean-jee ad y chooilleeney, cordail rish ooilley ta mee dy harey diu: myr shen bee shiuish yn pobble aym’s, as beem’s yn Jee euish; 5Dy yannoo mie yn breearrey ren mee rish nyn ayraghyn, dy choyrt daue cheer palchey ayns bainney as mill, myr te er y laa t’ayn jiu. Eisht dreggyr mee, as dooyrt mee, Myr shen dy row, O Hiarn. 6Eisht dooyrt y Chiarn rhym, Jean ooilley ny goan shoh y ockley magh ayns ard-valjyn Yudah, as ayns straïdyn Yerusalem, gra, Clasht-jee goan y chonaant shoh, as jean-jee ad y chooilleeney. 7Son ren mee breearrey chion noi nyn ayraghyn, ’sy laa hug mee lhiam ad seose ass cheer Egypt, eer gys y laa t’ayn jiu, girree dy moghey as cur raaue chion, as gra, Cur-jee biallys da my choraa. 8Ny-yeih cha dug ad biallys, chamoo ren ad nyn gleaysh y chroymmey, agh jimmee ad dy chooilley ghooinney ayns roonid e chree mee-chrauee hene: shen-y-fa ver-ym lhiam orroo ooilley goan y chonaant shoh hug mee ayns sarey daue dy yannoo; agh cha vel ad er n’yannoo ad. 9As dooyrt y Chiarn rhym, Ta coyrle chroutagh er ny gheddyn mastey deiney Yudah, as mastey cummaltee Yerusalem. 10T’ad er hyndaa reesht gys drogh-yannoo nyn shenn-ayryn, ren gobbal dy eaishtagh rish my ghoan’s; as hie ad geiyrt er jeeghyn elley dy hirveish ad: ta thie Israel as thie Yudah er vrishey my chonaant, ren mee rish nyn ayraghyn.

11Shen-y-fa myr shoh ta’n Chiarn dy ghra, Cur-my-ner, ver-ym lhiam olk orroo, nagh vod ad shaghney; as ga dy n’eam ad hym, cha der-ym clashtyn daue. 12Eisht hed ard-valjyn Yudah, as cummaltee Yerusalem, as eamee ad gys ny jeeghyn shen daue t’ad chebbal incense: agh ad shen cha vod sauail ad edyr ayns earish nyn seaghyn. 13Son corrym rish earroo dty ard-valjyn va ny jeeghyn ayd’s, O Yudah; as corrym rish earroo straïdyn Yerusalem ta shiu er hroggal altaryn da’n red dwoaiagh shen, eer altaryn dy lostey incense da Baal. 14Shen-y-fa ny jean uss guee ass lieh yn phobble shoh, chamoo jean aghin ny padjer y hebbal er nyn son: son cha n’eaisht-ym roo tra nee ad geamagh hym ayns earish nyn seaghyn. 15Cre t’ec my ghraih’s dy yannoo ayns my hie, fakin dy vel ee er n’yannoo maarderys rish ymmodee, as ta’n eill chasherick goit voïd; t’ou goaill boggey ayns jannoo dy olk. 16Ren y Chiarn uss y enmys, Billey-olive glass, aalin, as lesh mess menoyr; lesh feiyr anveagh t’eh er voaddey aile er, as ta ny banglaneyn eck er ny vrishey. 17Son ta Chiarn ny sheshaghtyn flaunyssagh ren dty hoiaghey er n’ockley magh olk dt’oï, son drogh-yannoo thie Israel, as thie Yudah, t’ad er n’yannoo gys yn assee oc hene, dy my vrasnaghey gys corree, liorish chebbal incense da Baal.

18As hug y Chiarn dou toiggal jeh shoh, as ta fys aym er: eisht hoilshee oo dou nyn obbraghyn. 19Agh va mish goll-rish eayn ny dow t’er ny chur lesh dy ve er ny varroo; as cha row fys aym dy row ad er ghoaill drogh-choyrle m’oï, gra, Lhig dooin yn billey y stroie marish e vess, as lhig dooin eh y yiarey jeh veih cheer ny bioee, nagh bee yn ennym echey ny-sodjey ayns cooinaghtyn. 20Agh, O Hiarn ny sheshaghtyn flaunyssagh, ta cur briwnys cairagh, ta prowal ny meeghyn as y cree, lhig dou fakin dty cherraghey orroo; son hood’s ta mee er hoilshaghey my chooish. 21Shen-y-fa myr shoh ta’n Chiarn dy ghra mychione deiney Anathoth, ta shêgin er dty vioys, gra, Ny jean phadeyrys ayns ennym y Chiarn, er-aggle dy jed oo er stroie liorish ny laueyn ainyn: 22Shen-y-fa shoh myr ta Chiarn ny sheshaghtyn flaunyssagh dy ghra, Cur-my-ner, neem’s ad y cherraghey; yiow ny deiney aegey oc baase liorish y chliwe, yiow ny mec as ny inneenyn oc baase lesh y ghortey; 23As cha bee fooilliagh erbee jeu faagit, son ver-yms lhiam olk er deiney Anathoth, eer bleïn nyn gerraghey.