CAB. XIV

1Goo’n Chiarn haink gys Jeremiah mychione y ghortey. 2Ta Judah dobberan, as ny giattyn eck goll naardey; t’ad doogh er y thalloo, as ta eam Yerusalem er droggal. 3As ta ny chiarnyn oc er chur magh nyn mooinjer veggey gys ny ushtaghyn: haink ad gys ny puill, as cha row bine ry-gheddyn; hyndaa ad reesht lesh nyn siyn follym; v’ad mooar-seaghnit as ec kione nyn geiley, as dollee ad nyn eddin. 4Er-yn-oyr dy vel y thalloo gaagey, gyn fliaghey er yn ooir, va ny errooyn ass cree, choodee ad nyn ghing. 5Ren eer y feeaïh e lheiy y vreh ’sy vagher, as hreig ee eh, er-y-fa nagh row veg y faiyr ry-gheddyn. 6As hass ny assylyn feïe er ny sleityn, ren ad yn gheay y stronnal myr dragonyn; daase ny sooillyn oc moal, er-y-fa nagh row faiyr ry-gheddyn.

7O Hiarn, ga dy vel nyn olkys hene gymmyrkey feanish nyn ’oï, cur uss feaysley dooin, son graih dty ennym: son s’mooar ta nyn gooyl-skyrraghtyn; ta shin er n’yannoo peccah dt’oï’s. 8O hreishteil Israel, yn Saualtagh oc ayns earish seaghyn, kys t’ou myr joarree ’sy cheer, as myr troailtagh ta cheet stiagh dy ghoaill aaght oie? 9Cre’n-fa veagh oo myr dooinney fo atchim, myr dooinney lajer t’er choayl e vree? foast t’ou uss, O Hiarn, ny mast’ ain, as ort’s ta shin enmyssit; ny treig shin.

10Myr shoh ta’n Chiarn dy ghra rish y pobble shoh, Shoh myr bynney lhieu dy rouail mygeayrt, cha gow ny cassyn oc fea; shen-y-fa cha vel y Chiarn goaill roo: nee eh nish cooinaghtyn er y vee-chairys oc, as smaghtaghey nyn beccaghyn. 11Eisht dooyrt y Chiarn rhym, Ny jean uss guee son maynrys y phobble shoh. 12Tra t’ad freayll trostey, cha n’eaisht-ym rish yn accan oc; as tra t’ad jannoo oural-losht as chebballyn, cha jean-ym soiaghey jeu; agh ver-ym mow ad lesh y chliwe, as lesh y ghortey, as lesh y chramp.

13Eisht dooyrt mee, Ah, Hiarn Yee! cur-my-ner, ta ny phadeyryn oc gra roo, Cha vaik shiu yn cliwe, chamoo hig erriu gortey; agh ver-ym diu shee shickyr ’sy voayl shoh. 14Eisht dooyrt y Chiarn rhym, Ta ny phadeyryn jannoo phadeyrys breagagh ayns m’ennym’s; cha dug mee ad er y chaghteraght shoh, chamoo hug mee sarey daue, chamoo loayr mee roo: t’ad fockley magh diu ashlish foalsey, as faishnaghyn breagagh, as red gyn veg, as molteyrys yn chree oc hene. 15Shen-y-fa shoh myr ta’n Chiarn dy ghra mychione ny phadeyryn ta jannoo phadeyrys ayns m’ennym’s, as nagh dug mee ad er y chaghteraght, ny-yeih t’ad gra, Cha bee cliwe ny gortey ’sy cheer shoh; Liorish y chliwe as y ghortey hed ny phadeyryn shoh er nyn stroie. 16As bee yn pobble daue t’ad phadeyrys er nyn dilgey magh ayns straïdyn Yerusalem, kyndagh rish y ghortey as y cliwe; as cha bee unnane erbee dy oanluckey ad, ad-hene, nyn mraane, ny nyn mec, ny nyn inneenyn; son neem’s kerraghey nyn mee-chraueeaght y gheayrtey magh orroo.

17Shen-y-fa jir oo ny goan shoh roo, Lhig da my hooillyn’s roie sheese lesh jeïr oie as laa, as ny lhig fea ’ve orroo: son ta brishey trome er jeet er y voidyn inneen my phobble, eer builley baaish. 18My hem magh ’sy vagher, eisht cur-my-ner ad shen ta stroit lesh y chliwe! as my hem stiagh ’syn ard-valley, eisht cur-my-ner adsyn t’ayns raad y vaaish lesh y ghortey! dy jarroo, ta chammah yn phadeyr as yn saggyrt goll mygeayrt gys cheer nagh vel oayll oc er. 19Vel oo dy bollagh er hreigeil Judah? vel Zion dwoaie dty annym? cre’n-fa t’ou er woalley shin, as nagh vel saase nyn gour? va shin jerkal son shee, as cha vel veg y vie; as son earish slayntoil, as cur-my-ner seaghyn! 20Ta shin goaill-rish, O Hiarn, nyn ghrogh-yannoo hene, as loghtyn nyn ayraghyn; son ta shin er n’yannoo peccah dt’oï’s. 21Ny cur feoh dooin, son graih dty ennym; ny lhig da stoyl-reeoil dty ghloyr ve er ny oltooan: cooinee orrin, ny brish dty chonaant rooin. 22Vel fer erbee mastey fardalyssyn ny ashoonee oddys fliaghey y choyrt? ny vod ny niaughyn jeu hene jannoo frassyn? Nagh nee uss eh, O Hiarn nyn Yee? shen-y-fa nee mayd farkiaght ort; son she uss t’er n’yannoo ooilley ny reddyn shoh.