CAB. XV

1Eisht dooyrt y Chiarn rhym, Ga dy shassagh Moses as Samuel kiongoyrt rhym, ny-yeih cha vod my aigney y ve lesh y pobble shoh; ceau magh ad ass my hilley, as lhig daue goll. 2As hig eh gy-kione, my jir ad rhyt, Cre’n raad hem mayd magh? eisht jir oo roo, Myr shoh ta’n Chiarn dy ghra, Nyn lheid as ta cour baase, dy baase; as lheid as ta cour y chliwe, da’n chliwe; as lheid as ta cour y ghortey, da’n ghortey; as lheid as ta cour cappeeys, gys cappeeys. 3As ver-yms kiare briwnyssyn magh orroo, ta’n Chiarn dy ghra; yn cliwe dy varroo, as ny moddee dy raipey, as eeanlee’n aer, as beishtyn yn ooir, dy chur mow as dy yannoo jeeill. 4As ver-ym orroo dy v’er nyn scughey gys ooilley reeriaghtyn y theihll, kyndagh rish Manasseh mac Hezekiah ree Yudah, son shen ny ren eh ayns Jerusalem. 5Son quoi vees trocoil ort, O Yerusalem? ny quoi nee uss y ghobberan? ny quoi hed dy lhiattee dy ênaght kys t’ou? 6T’ou er hreigeil mish, ta’n Chiarn dy ghra, t’ou er chur cooyl rhym; shen-y-fa sheeyn-ym magh ort my laue, as nee’m dty stroie; ta mee skee lesh surranse-foddey rhyt. 7As nee’m ad y asney lesh dollan ayns giattyn y cheer; nee’m ad y roostey jeh nyn gloan, nee’m my phobble y stroie, fakin nagh vel ad chyndaa veih nyn raaidyn. 8Ta ny mraane-treoghe oc ayns earroo erskyn genniagh ny marrey: ta mee er lhiggey magh orroo, noi moir ny deiney aegey, roosteyryn ec y vun-laa; ver-ym orroo dy huittym urree doaltattym, as atchim agglagh er yn ard-valley. 9T’eeish t’er n’ymmyrkey shiaght dy chloan raad y vaaish; t’ee er phaartail; ta’n ghrian er n’gholl sheese urree choud as va’n laa foast ayn; v’ee coodit lesh nearey as atchim: as yn fooilliagh jeu livrey-ym da’n chliwe roish ny noidyn oc, ta’n Chiarn dy ghra.

10Smerg dooys, my voir, dy dug oo mee son y theihll my ghooinney ry-hoi streeu as argane rish ooilley’n seihll! cha vel mee er chur magh er use, chamoo ta mee er ghoaill er use; ny-yeih ta dy chooilley unnane jeu gwee mollaght orrym. 11Dooyrt y Chiarn, Dy firrinagh hig eh dy mie lhiat ’sy jerrey, dy feer ver-ym er y noid cur dellal vie dhyt ’syn earish anveagh, as ’sy traa seaghnagh. 12Jean yiarn yn yiarn twoaie as y steillyn y vrishey. 13Dty chooid as dty chowryn livrey-ym son spooilley nastee, as shen son ooilley dty pheccaghyn, eer ayns ooilley dty ardjyn. 14As ver-ym ort dy gholl marish dty noidyn gys cheer nagh vel oayll ayd er; son ta aile er ny oaddey ayns my yymmoose, nee shiu y lostey.

15O Hiarn, t’ou uss toiggal: cooinee, as jeeagh orrym, as gow cooilleeney jeh my hranlaasee er my hon; ny gow mee ersooyl ayns dty hurranse-foddey: cooinee dy nee er dty ghraih’s ta mee er hurranse oghsan. 16Hooar mee dty ghoan, as d’ee mee ad; as va dty ghoo dooys boggey as gerjagh my chree; son ort’s ta mee enmyssit, O Hiarn, Jee ny sheshaghtyn flaunyssagh. 17Cha hoie mee ayns sheshaght ny gannidee, cha row taitnys aym ayndoo; chum mee orrym pene, fo dty laue’s orrym: son t’ou er my lhieeney lesh dty yymmoose. 18Cre’n-fa ta my ghuin kinjagh? as my lhott nagh vel saase ny chour? bee uss dooys er aght erbee myr molteyr, as myr ny ushtaghyn ta failleil?

19Shen-y-fa myr shoh ta’n Chiarn dy ghra, My hyndaa-ys oo, eisht ver-ym lhiam oo reesht, as nee oo shassoo kiongoyrt rhym: as my scarrys oo yn mie veih yn sie, bee oo myr y beeal aym’s: lhig dauesyn chyndaa hood’s; agh ny chyndaa uss hucsyn. 20As neem’s uss y yannoo da’n pobble shoh dty voalley lajer prashey; as nee ad caggey rhyt, agh cha vow ad yn varriaght ort: son ta mish mayrt dy hauail oo, as dy livrey oo, ta’n Chiarn dy ghra. 21As livrey-ym oo ass laue ny mee-chrauee, as nee’m oo y eaysley veih pooar ny tranlaasee dewilley.