CAB. XVI

1Haink goo yn Chiarn hym ny-sodjey, gra, 2Cha jean oo ben y ghoaill dhyt hene, chamoo vees ayd mec ny inneenyn ’sy voayl shoh. 3Son shoh myr ta’n Chiarn dy ghra mychione ny mec as ny inneenyn t’er nyn ruggey ’sy voayl shoh, as mychione ny mraane ren ad y ymmyrkey, as mychione nyn ayraghyn hooar ad ’sy cheer shoh; 4Yiow ad baase atchimagh: cha bee dobberan jeant er nyn son, chamoo vees ad er n’oanluckey; agh bee ad myr eoylley er eaghtyr y thallooin; as hed ad er stroie lesh y chliwe, as lesh gortey; as bee ny callinyn oc son beaghey da eeanlee yn aer, as son beishtyn y thallooin. 5Son myr shoh ta’n Chiarn dy ghra, Ny gow stiagh ayns thie ny farrarey, chamoo dy yannoo keayney ny dobberan er nyn son: son ta mee er ghoaill ersooyl my hee’s veih’n pobble shoh, ta’n Chiarn dy ghra, eer my chenjallys ghooie as vyghinagh. 6Yiow chammah beg as mooar baase ’sy cheer shoh: cha bee ad er nyn oanluckey, chamoo nee sleih dobberan er nyn son, tayrn fuill orroo hene, ny jannoo ad-hene meayl er nyn son. 7Chamoo vees arran er ny vrishey er nyn son ayns trimshey, dy gherjaghey ad son ny merriu; chamoo ver deiney daue yn cappan dy gherjagh dy iu son ayr ny moir. 8Chamoo hed oo stiagh gys thie ny cuirraghyn, dy hoie mâroo dy ee as dy iu. 9Son shoh myr ta Chiarn ny sheshaghtyn flaunyssagh, Jee Israel, dy ghra, Cur-my-ner, ver-ym er dy scuirr ass y voayl shoh ayns y chilley euish, as ayns ny laghyn eu, yn coraa dy voggey, as yn coraa dy yennallys, coraa’n dooinney-poosee, as coraa yn ven-phoosee.

10As hig eh gy-kione, tra vees oo er hoilshaghey ooilley ny goan shoh da’n pobble shoh, as dy jir ad rhyt, Cre’n-fa ta’n Chiarn er n’ockley magh ooilley yn olk vooar shoh nyn ’oï? ny cre ta nyn loght? ny cre’n peccah ta shin er n’yannoo noi’n Chiarn nyn Yee? 11Eisht dy jir uss roo, Er-y-fa dy vel nyn ayraghyn er my hreigeil, ta’n Chiarn dy ghra, as son dy vel ad er n’eiyrt er jeeghyn joarree, as er hirveish ad, as er chur ooashley daue, as er hreigeil mish, as nagh vel ad er reayll my leigh’s: 12As ta shiuish er n’yannoo ny smessey na nyn ayraghyn; son cur-my-ner, ta shiu gimmeeaght dy chooilley ghooinney lurg roonid e chree mee-chrauee hene, nagh n’eaisht ad rhym’s; 13Shen-y-fa neem’s shiu y heebey magh ass y cheer shoh, gys cheer nagh nhione diu, chamoo shiuish ny nyn ayraghyn; as ayns shen nee shiu jeeghyn joarree y hirveish laa as oie, raad nagh jean-ym foayr y yeeaghyn diu.

14Shen-y-fa, cur-jee my-ner, ta ny laghyn cheet, ta’n Chiarn dy ghra, nagh jir ad arragh, Ta’n Chiarn bio hug lesh seose cloan Israel veih cheer Egypt; 15Agh, ta’n Chiarn bio hug lesh seose cloan Israel veih’n cheer my-hwoaie, as veih dy chooilley heer raad va mee er n’imman ad: as ver-ym lhiam ad reesht gys y cheer oc hene hug mee da nyn ayraghyn.

16Cur-my-ner, ver-ym fys er ymmodee eeasteyryn, ta’n Chiarn dy ghra, as nee ad y hayrtyn ad; as ver-ym fys er ymmodee shelgeyryn, as nee ad y helg ad veih dy chooilley lieau, as veih dy chooilley chronk, as veih guaggyn ny creggey. 17Son ta my hooillyn er ooilley nyn raaidyn; cha vel ad follit veih my eddin, chamoo ta’n vee-chairys oc er ny cheiltyn veih my hooillyn. 18As hoshiaght nee’m cooilleeney dooble y ghoaill son nyn mee-chairys as nyn beccah; er-yn-oyr dy vel ad er n’yannoo my heer neu-ghlen, t’ad er lhieeney my eiraght lesh callinyn nyn reddyn feohdoil as eajee. 19O Hiarn my niart, as my chashtal lajer, as my chemmyrk ’sy laa dy heaghyn, hig ny ashoonee hood’s veih ardjyn sodjey magh yn ooir, as jir ad, Son shickyrys va eiraght nyn ayraghyn ayns breagyn, fardalys, as reddyn gyn ymmyd. 20Jean dooinney jeeghyn y yannoo da hene, as cha nee jeeghyn ad? 21Shen-y-fa, cur-my-ner, ver-ym toiggal daue yn un cheayrt shoh, ver-ym orroo goaill tastey jeh my laue as jeh my niart; as bee fys oc dy vel mish enmyssit y Chiarn.