CAB. XVII

1Ta peccah Yudah scruit lesh pen yiarn, as lesh baare diamond; te grainnit er glaare nyn gree, as er eairkyn nyn altaryn; 2Choud as ta nyn gloan freayll ayns cooinaghtyn ny altaryn eu, as ny keylljyn dy viljyn glassey er ny croink ard. 3O my lieau ’sy vagher, ver-ym dty chooid as ooilley dty hashtaghyn son spooilley, as dty ard-ynnydyn son peccah, trooid ooilley dty ardjyn. 4As bee uss, dy jarroo oo hene, freilt magh ass dty eiraght hug mee dhyt; as ver-ym ort dy hirveish dty noidyn ayns cheer nagh nhione dhyt: son ta shiu er voaddey aile ayns my yymmoose, nee lostey son dy bragh.

5Myr shoh ta’n Chiarn dy ghra, Dy row mollaght ersyn ta cur e varrant er dooinney, as goaill mac dooinney son e endeilys, as ta ayns e chree treigeil y Chiarn. 6Son bee eh myr y freoagh ’syn aasagh, as cha vaik eh yn bannaght ta ry-hoi cheet; agh bee e chummal ayns ynnydyn sponkit yn aasagh, ayns thalloo sailjey as gyn cummaltee. 7Bannit ta’n dooinney ta coyrt e varrant er y Chiarn, as ta’n Chiarn e hreishteil: 8Son bee eh myr billey soit rish oirr yn ushtey, as ta skeayley magh e fraueyn rish yn awin, as cha n’ennee eh tra ta’n chiass loshtee cheet, agh bee e ghuillag glass; as ’sy vleïn ghonney cha bee eh anveagh, chamoo nee eh scuirr veih gymmyrkey mess.

9Ta’n cree molteyragh erskyn dy chooilley nhee, as mee-chrauee erskyn-towse: quoi oddys toiggal eh? 10Ta mish y Chiarn ronsaghey yn cree, ta mee prowal ny meeghyn, eer dy chooilleeney da dy chooilley ghooinney corrym rish e raaidyn, as cordail rish mess e obbraghyn. 11Myr ta’n kiark-rhennee soie er oohyn, as nagh vel ee guirr aalagh; myr shen eshyn ta cosney berchys, as cha nee dy cairagh, faagee eh ad ayns mean e laghyn, as ec y jerrey bee eh ny ommydan.

12Ta stoyl-reeoil ard-ghloyroil veih’n toshiaght ’sy chiamble casherick ain. 13O Hiarn, treishteil Israel, bee ooilley adsyn ta dty hreigeil er nyn goyrt gys nearey, as adsyn ta cur cooyl rhym’s bee ad scruit ’sy joan, er-yn-oyr dy vel ad er hreigeil y Chiarn, yn farrane dy ushtaghyn bio. 14Jean mish y lheihys, O Hiarn, as bee’m er my lheihys; saue mee, as bee’m er my hauail: son she uss my voylley.

15Cur-my-ner, t’ad gra rhym, Cre vel goo yn Chiarn? lhig da cheet nish. 16Er my hon’s, cha row mee ayns siyr dy ghoaill orrym currym y chaghteraght shoh; chamoo ta mee er yeearree son y laa seaghnagh, myr shione dhyt: va shen haink ass my veillyn jeeragh kiongoyrt rhyt’s. 17Ny bee son atchim dou: t’ou uss my hreishteil ’sy laa seaghnagh. 18Lhig dauesyn ve craghit ta jannoo tranlaase orrym, agh ny lhig dauesyn mish y chraghey; lhig dauesyn ve atchimit, agh ny lhig dooys ve atchimit: cur lhiat orroo yn laa doogh, as stroie ad lesh toyrt-mow ghooble.

19Myr shoh dooyrt y Chiarn rhym, Gow royd as shass ayns giat cloan y phobble, er ta reeaghyn Yudah cheet stiagh as goll magh, as ayns ooilley giattyn Yerusalem; 20As abbyr roo, Clasht-jee goo yn Chiarn, shiuish reeaghyn Yudah, as ooilley Yudah, as ooilley chummaltee Yerusalem, ta goll stiagh er ny giattyn shoh: 21Myr shoh ta’n Chiarn dy ghra, Cur-jee twoaie diu hene, as ny jean-jee errey erbee y ymmyrkey er y doonaght, chamoo cur-jee lhieu stiagh eh er giattyn Yerusalem; 22Chamoo cur-jee lhieu errey erbee magh ass nyn dhieyn er y doonaght, chamoo jean-jee monney erbee dy obbyr; agh freill-jee yn doonaght dy casherick, myr doardee mee da nyn ayraghyn. 23Agh cha dug adsyn biallys, chamoo chroym ad nyn gleaysh, agh ren ad nyn mwannal roonagh, nagh jinnagh ad geaishtagh, ny goaill ynsagh. 24As hig eh gy-kione, my nee shiu dy beasagh geaishtagh rhym’s, ta’n Chiarn dy ghra, nagh der shiu lhieu laad erbee stiagh er giattyn yn ard-valley shoh er y doonaght, agh dy vreill shiu yn doonaght dy casherick, gyn monney erbee dy obbyr y yannoo er; 25Eisht hig stiagh er giattyn yn ard-valley shoh reeaghyn as reejereeyn soie er stoyl-reeoil Ghavid, markiagh ayns fainee as er cabbil, adsyn, as nyn brinceyn, deiney Yudah, as cummaltee Yerusalem, as bee’n ard-valley shoh foddey-beayn. 26As hig ad veih ard-valjyn Yudah, as veih ny ynnydyn mygeayrt Jerusalem, as veih cheer Venjamin, as veih’n cheer-rea, as veih ny sleityn, as veih’n jiass, cur lhieu chebballyn-losht, as ourallyn, as ourallyn-arran, as incense, as cur lhieu ourallyn dy voylley, gys thie yn Chiarn. 27Agh mannagh n’eaisht shiu rhym dy reayll yn doonaght casherick, as gyn laad y ymmyrkey, eer goll stiagh er giattyn Yerusalem er y doonaght; eisht neem’s aile y oaddey ayns ny giattyn eck; as nee eh plaaseyn Yerusalem y stroie, as cha bee eh er ny vooghey.