CAB. XVIII

1Yn goo haink gys Jeremiah veih’n Chiarn, gra, 2Trog ort, as gow sheese gys thie yn phasheyder, as ayns shen ver-ym ort dy chlashtyn my ghoan’s. 3Eisht hie mee sheese gys thie yn phasheyder, as cur-my-ner, v’eh ec obbyr er ny queeylyn. 4As va’n saagh craie v’eh dy yannoo mhillit ayns laue yn phasheyder; myr shen dy ren eh jeh reesht saagh elley, myr s’mie lesh hene dy yannoo eh. 5Eisht haink goo yn Chiarn hym, gra, 6Nagh voddym’s jannoo riuish, O hie Israel, myr ta’n phasheyder shoh? ta’n Chiarn dy ghra. Cur-my-ner, myr ta’n chray ayns laue yn phasheyder, myr shen ta shiuish ayns my laue’s, O hie Israel. 7Cre-erbee yn traa loayr-yms mychione ashoon, as mychione reeriaght, dy astyrt, as dy lhieggal, as dy stroie eh: 8My ta’n ashoon shen, n’oï ta mee er n’ockley magh my vriwnys, chyndaa veih’n olkys oc, goym arrys jeh yn olk shen va mee kiarit dy yannoo roo. 9As cre-erbee’n traa loayr-yms mychione ashoon, as mychione reeriaght, dy hroggal, as dy hoiaghey seose eh: 10My nee ad olk y yannoo ayns my hilley’s, nagh der ad biallys da my choraa, eisht bee my aigney er ny chaghlaa mychione dy bannaghtyn shen yiall mee daue.

11Nish er-y-fa shen, gow royd, loayr rish deiney Yudah, as rish cummaltee Yerusalem, gra, Myr shoh ta’n Chiarn dy ghra, Cur-jee my-ner, ta mee kiarail olk nyn ’oï, as ta mee smooinaghtyn son kerraghey dy choyrt erriu: chyndaa-jee nish dagh unnane veih e ghrogh raad, as jean-jee nyn raaidyn as nyn obbraghyn y lhiasaghey. 12As dooyrt ad, Cha vel saase nyn gour; agh nee mayd gimmeeaght lurg nyn aghtyn hene, as nee mayd dy chooilley ghooinney geiyrt da smooinaghtyn e chree mee-chrauee hene. 13Shen-y-fa shoh myr ta’n Chiarn dy ghra, Brie-jee nish mastey ny ashoonee, quoi t’er chlashtyn y lheid roïe? ta moidyn Israel er n’yannoo red feer atchimagh. 14Jean dooinney treigeil meeaylys y vagher, son sniaghtey Lebanon, ta cheet veih’n chreg? ny bee ny ushtaghyn follan-feayr treigit, son ushtaghyn veih boayl elley? 15Er-yn-oyr dy vel my phobble’s er my yarrood, t’ad er lostey incense gys fardalys, as t’adsyn er chur orroo dy skyrraghtyn veih my raaidyn, treigeil ny shenn cassanyn, dy hooyl ayns cassanyn cammey ayns raad neu-chiart; 16Dy yannoo yn cheer ny hraartys, as son oltooan kinjagh: bee atchim er dy chooilley unnane hed shaghey, as craa-ee ad nyn ghing. 17Nee’m ad y skeayley myr lesh y gheay-niar roish y noid: chyndaa-ym my chooyl orroo, as cha nee my eddin ayns laa nyn seaghyn.

18Eisht dooyrt ad, Tar-jee, as lhig dooin kialgyn croutagh y ghoaill noi Jeremiah; son cha vaillee yn leigh veih’n taggyrt, ny coyrle veih’n er-creeney, ny’n goo veih’n adeyr: tar-jee, as lhig dooin eh y woalley lesh y chengey, as gyn geill y choyrt da veg jeh e ghoan. 19Gow tastey jee’m, O Hiarn, as eaisht rish y choraa ocsyn ta girree foym. 20Nee olk vees er ny chooilleeney son mie? son t’ad er chleiy ooig son m’annym. Cooinee dy hass mish seose kiongoyrt rhyt’s dy loayrt ass y lieh oc, as dy hyndaa ersooyl voue dty yymmoose. 21Shen-y-fa livrey uss seose nyn gloan da’n ghortey, as deayrt magh yn uill oc lesh niart y chliwe; as lhig da ny mraane oc ve er nyn roostey jeh nyn gloan, as ve nyn mraane-treoghe; as ny deiney oc ve er nyn goyrt gy-baase; lhig da ny deiney aegey oc ve stroit lesh y chliwe ayns caggey. 22Lhig da yllagh ve er ny chlashtyn veih nyn dhieyn, tra ver oo lhiat troop-caggee doaltattym orroo; son t’ad er chleiy ooig dy my ghoaill, as er hoiaghey ribbaghyn follit son my chassyn. 23Ny-yeih, Hiarn, t’ou uss toiggal ooilley’n choyrle oc m’oï’s dy my stroie: ny jean yn vee-chairys oc y leih daue, chamoo cur y peccah oc ersooyl ass dty enish, agh lhig daue tuittym kiongoyrt rhyt’s: dell myr shoh roo ayns laa dty yymmoose.